نۇر-سۇلتان قالاسىنىڭ اكىمى التاي كولگىنوۆ پوليتسيا دەپارتامەنتىنىڭ باسشىلىعىمەن بىرىگىپ, ۆەدومستۆوارالىق كوميسسيانىڭ وتىرىسىندا ەلورداداعى قۇقىق بۇزۋشىلىقتىڭ الدىن الۋعا قاتىستى ماسەلەلەردى تالقىلادى.
«قالا تۇرعىندارى ءوزىن قاۋىپسىز سەزىنۋى كەرەك. قوعامدىق ءتارتىپ پەن قاۋىپسىزدىكتى جۇيەلى نەگىزدە نىعايتۋ ءۇشىن ماتەريالدىق-تەحنيكالىق بازانى جاڭارتىپ, قادامدىق قولجەتىمدىلىك اياسىندا مودۋلدىك بەكەتتەر اشامىز, پوليتسيانىڭ تىرەك نۇكتەلەرىن قالپىنا كەلتىرەمىز جانە تاعى باسقا ءىس-شارالاردى ىسكە اسىرامىز. مەملەكەت باسشىسى جولداۋىندا ىشكى ىستەر ورگاندارىن جاڭعىرتۋدىڭ باسىمدىقتارى مەن قاۋىپسىزدىكتى قامتاماسىز ەتۋدىڭ سەرۆيستىك مودەلىنە كوشۋدى بەلگىلەدى. ماسەلەن, بيىلدىڭ وزىندە عانا قالانىڭ ءارتۇرلى اۋدانىندا 10 مودۋلدىك پوليتسيا بەكەتى ورناتىلىپ, ۋچاسكەلىك پۋنكتتەردى ورنالاستىرۋ ءۇشىن تاعى دا وسىنداي كولەمدە ءۇي-جاي بەرىلدى. بۇل جوسپاردان ەكى ەسە جوعارى كورسەتكىش» دەدى اتالعان جيىندا ا.كولگىنوۆ.
سونىمەن قاتار, قالا باسشىسى وسىعان دەيىن پوليتسيا دەپارتامەنتىنە 65 بىرلىك ارنايى تەحنيكا بەرىلگەنىن, ەسىل اۋدانىندا جاڭا اكىمشىلىك اشىلعانىن, وندا 400-دەن استام قىزمەتكەر ەڭبەك ەتەتىنىن ايتتى. جاڭادان بوي كوتەرگەن تۇرعىن ءۇي كەشەندەرىنىڭ ءبىرىنشى قاباتتارىندا جانە جاڭا دەنە شىنىقتىرۋ-ساۋىقتىرۋ كەشەندەرىندە الەۋمەتتىك نىسانداردان باسقا پوليتسيانىڭ تىرەك نۇكتەلەرى اشىلاتىنىن ءمالىم ەتتى. «سارىارقا اۋدانىندا پوليتسيا دەپارتامەنتىنىڭ بولىمشەسىنە ارنالعان عيماراتتىڭ قۇرىلىسى ءجۇرىپ جاتىر. سونداي-اق كامەلەتكە تولماعاندارعا قاتىستى قىلمىستاردىڭ الدىن الۋ, جول قوزعالىسىن ۇيىمداستىرۋدى جەتىلدىرۋ جانە جول قاۋىپسىزدىگى دەڭگەيىن ارتتىرۋ بويىنشا جۇمىستار جۇرگىزەمىز. «قاۋىپسىز اۋلا» جانە تاعى باسقا جوبالاردى كەڭەيتۋدى جالعاستىرۋدامىز. اتالعان شارالاردىڭ ءبارى تۇرعىندارعا جەدەل كومەك كورسەتۋگە, قۇقىق بۇزۋشىلىقتى بولدىرماۋعا, قىلمىستاردىڭ اشىلۋىن ارتتىرۋعا مۇمكىندىك بەرەدى» دەپ ءتۇسىندىردى ەلوردا اكىمى.
