ايتا سالعانعا جەڭىل, ايتسە دە اركىمنىڭ كوكەيىنە قونا كەتەتىن بەيبىتشىلىك اتاۋلى ۇلاعاتتى ۇعىم بار. بەيبىت ومىرگە بويىمىز ۇيرەنىپ كەتكەنى سونشالىق, مۇنى قالىپتى جاعداي رەتىندە كورىپ, كادىمگى كۇندەلىكتى ءوزىمىز جۇتىپ جۇرگەن اۋاداي سەزىنەمىز. ال ءبىر ءسات اۋا جەتپەي قالعان ادامنىڭ جاعدايى بەلگىلى عوي.
وكىنىشكە قاراي, بارلىق ەلدەر بەيبىت جاعدايدا ءومىر كەشىپ وتىر دەپ جانە ايتا المايمىز. سيريادا ءالى دە اسكەري قاقتىعىستار تولاستار ەمەس. سولتۇستىك كورەيانىڭ بالليستيكالىق زىمىراندى كەزەكتى رەت ۇشىرۋى, سونداي-اق پحەنيان باسشىلىعىنىڭ اقش تاراپىنان قىسىم كورسەتىلۋ توقتاماسا سىناق جاساۋدى دوعارمايتىنىن رەسمي مالىمدەۋى كورەي تۇبەگىندە سوعىس ءورتىنىڭ تۇتانۋ قاۋپىن كۇشەيتۋدە. ناتو اسكەري بازالارى رەسەيگە جاقىن اۋماققا شوعىرلانۋدا, ال رەسەي قارۋلى كۇشتەرى اقش-قا قارسى لاتىن امەريكاسىنا ورنىعا باستادى.
تەررورلىق ارەكەتتەر دە بەيبىت ءومىردىڭ شىرقىن بۇزۋدا. سونىڭ ناقتى كورىنىسى وسى اپتا باسىندا ۇلىبريتانيانىڭ مانچەستەر قالاسىندا ورىن الدى. «مانچەستەر ارەنا» زالىندا امەريكالىق ءانشى اريانا گراندەنىڭ كونتسەرتىنىڭ ءدال اياقتالار ساتىندە جانكەشتى ەر ادام جارىلىس جاساپ, سونىڭ سالدارىنان 22 ادام قازا تاۋىپ, 59-ى جارالاندى. الەم ايىپتاپ وتىرعان بۇل تەررورلىق اكت 2005 جىلى لوندوندا 50 ادامنىڭ ءومىرىن قيعان لاڭكەستىك وقيعادان كەيىنگى بريتانيا تاريحىنداعى ەڭ اۋىرى بولىپ وتىر. وسىعان بايلانىستى پرەزيدەنت نۇرسۇلتان نازارباەۆ ۇلىبريتانيا حالقىنا, قايعىلى وقيعا قۇرباندارىنىڭ وتباسىلارى مەن جاقىندارىنا كوڭىل ايتۋ جەدەلحاتىن جولدادى.
وسى ورايدا, تەرروريزممەن كۇرەستىڭ جايى ساۋد ارابياسى پاتشالىعىنىڭ استاناسى ەر-ريادتا العاش وتكەن «اقش – يسلام الەمى» سامميتىندە كەڭىنەن ءسوز بولعانىن اتاپ وتكەن ءجون. 55 مەملەكەتتىڭ باسشىلارى قاتىسقان مارتەبەلى جيىندا ءبىرىنشى بولىپ ءسوز العان اقش پرەزيدەنتى دونالد ترامپ, تەررورمەن كۇرەس «دىندەر سوعىسى ەمەس, شىعىس پەن باتىستىڭ تەكەتىرەسى ەمەس, ول نەگىزىنەن جاقسىلىق پەن جاماندىقتىڭ كۇرەسى» دەپ جاريالاپ, مۇسىلمان مەملەكەتتەرى باسشىلارىن تەرروريزمدى بىرلەسىپ جويۋعا شاقىردى. مۇنىڭ سىرتىندا, ترامپ بۇل ەرەكشە سامميت تاياۋ شىعىستا, كەرەك دەسەڭىز, بۇكىل پلانەتادا بەيبىتشىلىك ورناتۋعا تاماشا باستاما بولادى دەگەن سەنىمىن ءبىلدىردى.
سامميتتە نۇرسۇلتان نازارباەۆتىڭ دونالد ترامپپەن تۇڭعىش كەزدەسۋى ءوتىپ, حالىقارالىق ماسەلەلەر, ەكىجاقتى ءوزارا ءىس-قيمىلدىڭ نەگىزگى باعىتتارى, سونىڭ ىشىندە ساۋدا-ەكونوميكالىق, ساياسي, مادەني-گۋمانيتارلىق سالالارداعى بايلانىستاردى تەرەڭدەتۋ پەرسپەكتيۆاسى تالقىلاندى. سونداي-اق, پرەزيدەنت مەملەكەتارالىق ىنتىماقتاستىقتىڭ ءتۇرلى ماسەلەلەرى جونىندە بىرقاتار ەلدەر باسشىلارىمەن ءتيىمدى كەلىسسوزدەر جۇرگىزدى. جالپى, قازاقستاننىڭ بۇل كەڭەستە ورنى ەرەكشە بولعانى ساۋد ارابياسىنىڭ كورولى سالمان بەن ابدەل ءازيز ءال ساۋدتىڭ ىقىلاسىنان بايقالىپ تۇردى. بۇل – ەلىمىزدىڭ بەيبىت باستامالارىنا بەرىلگەن ۇلكەن باعا دەگەن ءسوز. بىرىككەن اراب امىرلىكتەرى ۇكىمەتىنىڭ قازاقستان ازاماتتارىنا وسى ەلگە ءبىر اي شاماسىندا ۆيزاسىز كەلۋ ءتارتىبىن ەنگىزۋى دە تەگىن ەمەس.
كەنجەبولات جولدىباي,
ساياساتتانۋشى
