استانادا العاش رەت جالاۋىن جەلبىرەتكەن جامبى اتۋدان «التىن جەبە» حالىقارالىق ءتۋرنيرى مارەسىنە جەتتى. «قازانات» اتشابارىندا سالتانات قۇرعان بايراقتى باسەكەنىڭ اقتىق سايىسىن ەلباسى نۇرسۇلتان نازارباەۆ تاماشالادى.
جامبى اتۋ سايىسى حالىقارالىق «ەكسپو-2017» مامانداندىرىلعان كورمەسىنىڭ مادەني-دۋماندى جانە سپورتتىق ءىس-شارالارىنىڭ كەشەندى باعدارلاماسى اياسىندا ۇيىمداستىرىلدى. سونىمەن قاتار, مەملەكەت باسشىسى نۇرسۇلتان نازارباەۆ يپپودروم اۋماعىندا ورنالاسقان «ەتنواۋىل» ۇلتتىق-مادەني كەشەنىن ارالاپ كوردى.
ەلباسىعا قازاق حالقىنىڭ ۇلتتىق تاعامدارىنىڭ تۇرلەرى, قولونەر بۇيىمدارى, سپورتتىق ويىندار مەن سالت-ءداستۇر ۇلگىلەرى كورسەتىلدى.تۇڭعىش رەت ۇيىمداستىرىلعان تۋرنير ءۇش كەزەڭنەن قۇرالدى. ءبىرىنشىسى – «شاپشاڭ اتۋ». مۇندا ات ۇستىندە شاۋىپ كەلگەن مەرگەندەر مەجەلى جەرگە كەلگەندە كىلت توقتاپ, تورەشىنىڭ پارمەنىمەن عانا اتادى. ءار مۇمكىندىك 10 سەكۋندتان اسپاۋى كەرەك. ەگەر كوزدەگەنى قىزىل شەڭبەرگە ءدال تيسە – 3 ۇپاي, سارىعا – 2 ۇپاي, ال كوك جولاققا قادالسا – 1 ۇپاي.
ەكىنشى سايىس «قالقان اتۋ» دەپ اتالادى. بۇل كەزەڭدە قاتىسۋشىلار سايگۇلىكتىڭ ەكپىنىن باسپاي ءۇش نىسانانى كوزدەيدى. ولاردىڭ ارقايسىسى 35 مەتر اراقاشىقتىقتا ورنالاستى. ءار مەرگەنگە ەكى مۇمكىندىك بەرىلدى.
جارىس ەكى كۇنگە جالعاستى. اقتىق كەزەڭ – «جامبى اتۋ». دودانىڭ سوڭعى كۇنى قاتىسۋشىلار قولا جامبىنى, كۇمىس جامبىنى جانە التىن جامبىنى دالدەدى. ولار 8-10-12 مەتر قاشىقتىقتا قويىلعان.سايىس كەزىندە مەرگەندەردىڭ جەبەسىنىڭ ءتۇزۋ ۇشۋىنا جەل اجەپتاۋىر كەدەرگى كەلتىردى. سونىڭ سەبەبىمەن كوبى ءمۇلت كەتىپ, دىتتەگەنىنە ءدوپ تيگىزە المادى.
جارىستىڭ كورىگىن فينليانديا مەن موڭعوليادان كەلگەن ەكى قىز قىزدىردى. جەبەسىن قولا جامبىعا قاداعاندارعا – 5 ۇپاي, كۇمىسكە – 10 ۇپاي جانە التىنعا 15 ۇپاي بەرىلدى. ەگەر مەرگەندەر جامبىنى ءىلىپ تۇرعان ارقاندى كوزدەپ, قيىپ تۇسسە, 20 ۇپايدى قانجىعاسىنا بايلايدى.
ءبىر قىزىعى, «التىن جەبەدە» بەسىنشى ورىنعا دەيىن ەرەكشەلەنگەندەرگە بايگە بۇيىردى. سونىمەن, باس جۇلدە – 2 ملن تەڭگەنى 55 ۇپاي جيناعان رۋمىنيالىق ميحاي كۋزمي يەلەندى. 40 ۇپايمەن كۇمىس جۇلدەگەر اتانعان قازاقستاندىق سارىباي ايتباي 1 ملن تەڭگە الدى. 37 ۇپايى بار قولاعا قول جەتكىزگەن تاعى ءبىر وتانداسىمىز ايكوز ەرالحاننىڭ جۇلدەسى – 700 مىڭ تەڭگە. ال 29 ۇپايمەن ءتورتىنشى ورىنعا تۇراقتاعان ماجارستاندىق نەموتي كريستوف ارپاد – 400 مىڭ تەڭگە, مالايزيادان كەلگەن مۇحاممەد اكمال بين موحاماد داكالان 20 ۇپايمەن بەسىنشى ورىننان كورىنىپ, 200 مىڭ تەڭگە الدى.تۋرنيرگە 11 ەلدەن 20 سۇرمەرگەن قاتىستى.
