ۇلتتىق اكادەميالىق كىتاپحانادا «قازاق ادەبيەتى» گازەتىنىڭ 90 جىلدىعىنا ارنالعان «ادەبيەت. رۋح. قوعام» اتتى دوڭگەلەك ۇستەل ءماجىلىسى ءوتتى. ءىس-شاراعا مەملەكەت جانە قوعام قايراتكەرلەرى, بەلگىلى قالامگەرلەر مەن وقىرماندار قاتىستى.
ۇلتىمىزدىڭ رۋحاني ايناسى, ەلىمىزدىڭ ادەبي-مادەني ءومىرىن ورنەكتەيتىن باسىلىمنىڭ بيىلعى مەرەيتويى قازاقستان جازۋشىلار وداعىنىڭ 90 جىلدىعىمەن قاتار كەلىپ وتىر. جيىندى جۇرگىزگەن وسى ۇيىمنىڭ حاتشىسى, استانا قالالىق فيليالىنىڭ ديرەكتورى داۋلەتكەرەي كاپۇلى وسىنى اتاپ ءوتتى.
بەلگىلى عالىم, اكادەميك, «قازاق گازەتتەرى» جشس باس ديرەكتورى ديحان قامزابەكۇلى ۇلتتىق ءباسپاسوزدىڭ كەشەگىسى مەن بۇگىنگىسىن شولىپ ءوتىپ, قازىرگى كۇردەلى جاعدايىنا توقتالدى. سونىڭ ىشىندە گازەتتەرگە جازىلۋ ماسەلەسى قيىن بولىپ وتىرعانىن ايتتى.
«قازاق ادەبيەتى» باسقا دا ۇلتقا قىزمەت ەتەتىن باسىلىمدار ءبىلىم جۇيەسىن الساق, مۇعالىمدەر كۇندەلىكتى پايدالاناتىن وقۋ-ادىستەمەلىك قۇرالدار قاتارىنا كىرۋى كەرەك. سوندا ول ءومىر سۇرەدى, اقىن-جازۋشىلاردىڭ نە ايتىپ وتىرعانىن حالىق تا, وقۋشى دا, قوعام دا تۇسىنەدى. مۇعالىم احمەت بايتۇرسىنۇلى كەزەڭىندەگىدەي حالىقتىڭ ءۇنىن دە, ماقسات-مۇددەسىن دە بيلىككە دە, قوعامعا دا جەتكىزەتىن التىن كوپىرگە اينالادى» دەدى ديحان قامزابەكۇلى.
جيىنعا ونلاين فورماتتا قاتىسقان بەلگىلى اقىن, قازاقستان جازۋشىلار وداعى باسقارماسى توراعاسىنىڭ ورىنباسارى باۋىرجان جاقىپ وسى كۇندەرى قازاق باسىلىمدارىنا جازىلۋ ۇلكەن پروبلەماعا اينالىپ وتىرعانىن, ونىڭ مەملەكەتتىك دەڭگەيدە شەشەتىن تەتىكتەرى بار ەكەنىن اتاپ ءوتتى. ساكەن سەيفۋللين, ءىلياس جانسۇگىروۆ, بەيىمبەت مايلين, عابيت مۇسىرەپوۆ باستاپ بەرگەن «قازاق ادەبيەتى» گازەتىنىڭ كوش-كەرۋەنى جالعاسىپ كەلە جاتقانىن ايتتى.
«قازاق ادەبيەتى» گازەتى 90 جىل بويى ۇلتىمىزدىڭ ءسوزىن سويلەپ كەلە جاتىر. وتكەندە 1991 جىلى جازعان دۇنيەلەرىن قاراپ شىقسام, تاۋەلسىزدىك ماسەلەسى, قازاقستان تەرريتورياسىنىڭ تۇتاستىعى, ءتىل ساياساتى, ەگەمەندىك, قوعامدى دامىتۋ, قازاقتاردىڭ تاريحي اتامەكەنىنە ورالۋ, حاندارىمىز بەن بيلەرىمىز تۋرالى, رەپرەسسياعا ۇشىراعان الاشتىڭ زيالىلارى جايىندا, جالپى شەراعاڭنىڭ, ورالحان اعامىز, تولەن اعامىز باس رەداكتور بولعان كەزىندە قانشاما ماتەريال بەرىلگەن. «قازاق ادەبيەتى» قازىرگە دەيىن كۇندەلىكتى ومىرىمىزدە بولىپ جاتقان دۇنيەلەردى قامتۋعا تىرىسادى, تەك قانا ادەبيەتتىڭ, مادەنيەتتىڭ, ونەردىڭ عانا گازەتى ەمەس, ۇلتىمىزدىڭ جانىنا باتاتىن نەبىر ماسەلەلەردى قوزعاپ كەلە جاتىر» دەگەن باۋىرجان جاقىپ گازەت پەن جازۋشىلار وداعىنىڭ مەرەيتويىن اتاپ ءوتۋ جوسپارىمەن تانىستىردى.
ءىس-شاراعا جينالعاندار ادەبيەت پەن مادەنيەتتىڭ جاۋھارىن تەرىپ, قۇندىلىقتىڭ قازىعى مەن ءتىلدىڭ تازالىعىن ساقتاپ وتىرعان ىرگەلى باسىلىمنىڭ وتكەنى, بۇگىنى, كەلەشەگى جايلى وزەكتى اڭگىمە ءوربىتتى. سونىڭ ىشىندە بەلگىلى قالامگەرلەر الىبەك اسقاروۆ, جارىلقاپ بەيسەنبايۇلى, روزا مۇقانوۆا, قۋانىش جيەنباي, بايانعالي ءالىمجان, سۇراعان راحمەتۇلى, ت. ب. ءسوز سويلەدى.
