«ەكسپو-2017» حالىقارالىق مامانداندىرىلعان كورمەسىنىڭ اياسىندا استانادا 3 مىڭ مادەني-ويىن-ساۋىق شاراسى وتەدى. قازاقستاندىق جانە شەتەلدىك بەلگىلى ونەر ۇجىمدارى مەن جەكە ورىنداۋشىلار ءۇش اي بويى ەلوردانى دۋمانعا بولەيدى. اتالعان ۋاقىت ارالىعىندا سپورتتىق شارالار دا ۇيىمداستىرىلادى. ماسەلەن, قر مادەنيەت جانە سپورت مينيسترلىگى كورمە شەڭبەرىندە 18 اۋقىمدى شارا وتكىزۋدى جوسپارلاپ وتىر.
ەرتەڭ «قازانات» اتشابارىندا ات سپورتى تۇرلەرىنەن قازاقستان پرەزيدەنتى نۇرسۇلتان نازارباەۆتىڭ جۇلدەسىنە «ەكسپو-2017» كۋبوگى وتەدى. ءبىراز شەتەلدىك قوناقتىڭ كورمەنى كورۋگە كەلەتىنىن ەسكەرسەك, بۇل بايگەنىڭ سالماعى دا ارتادى.
تۇلپارلار سايىسى الامان بايگە – 25 شاقىرىم, توپ بايگە – 15 شاقىرىم, جورعا جارىس – 7 شاقىرىم, قۇنان بايگە – 7 شاقىرىم, 2400 جانە 1800 مەترگە شاباتىن ۇشقىر اتتار جارىسى بويىنشا وتەدى. بەسىنشى ورىن العاندارعا دەيىن جۇلدە بەرىلەدى. بايگەگە بارلىعى 130-دان استام جۇيرىك تىركەلدى. وعان ەلىمىزدىڭ بارلىق ايماعىنان شاباندوزدار قاتىسادى. سونداي-اق, رەسەي, قىرعىزستان, تاجىكستان, تۇركيا, بولگاريا سىندى مەملەكەتتەردەن كەلگەن قاتىسۋشىلار بار.
قازاقتىڭ مۋزىكاسىنا دا شەتەلدىكتەردىڭ قۇلاق قۇرىشى قاناتىنى ءسوزسىز. اسىرەسە, بۇگىن-ەرتەڭ «استانا بالەت» تەاترىندا وتەتىن ن.تىلەنديەۆ اتىنداعى «وتىرار سازى» اكادەميالىق فولكلورلىق-ەتنوگرافيالىق وركەسترىنىڭ كونتسەرتى جۇرتتى تامساندىرادى دەپ ويلايمىز.
«وتىرار سازى» وركەسترىنىڭ قۇرىلعانىنا 40 جىلعا جۋىقتاپ قالدى. بۇل باسىندا شاعىن انسامبل بولعان ونەر ۇجىمىن بيىككە اسا كورنەكتى كومپوزيتور, ديريجەر, دومبىراشى نۇرعيسا تىلەنديەۆ كوتەرىپ كەتتى. سول سەبەپتەن دە وركەسترگە مۋزىكا مايتالمانىنىڭ اتى بەرىلدى. قازىرگى تاڭدا اتاقتى تۇلعانىڭ قىزى ءدىنزۋحرا تىلەنديەۆا وركەستردىڭ كوركەمدىك جەتەكشىسى ءارى باس ديريجەرى بولىپ وتىرعانىن جۇرتشىلىق بىلەدى. سونداي-اق, وسى ۇجىم شىلدەنىڭ اياعىندا ءتورت كۇن بويى كورمە اۋماعىندا كونتسەرت قويادى.
شىلدە ايىنىڭ ورتا كەزىندە حالىق قازاقتىڭ تۇڭعىش كاسىبي مۋزىكالىق ۇجىمى – قۇرمانعازى اتىنداعى قازاق مەملەكەتتىك اكادەميالىق ۇلتتىق اسپاپتار وركەسترىنىڭ كونتسەرتىن دە كورە الادى. بۇل ۇجىمدى اكادەميك احمەت جۇبانوۆ وتكەن عاسىردىڭ وتىزىنشى جىلدارى قۇردى. تاريحى سەكسەن جىلدان اساتىن وركەستردىڭ رەپەرتۋارىندا سان الۋان شىعارما بار.
ونەرىمەن الەمدى مويىنداتقان تۇلعالار دا حالىقارالىق كورمە ۋاقىتىسىندا استانادا كونتسەرت بەرەدى. اتاپ ايتساق, اتاقتى سكريپكاشى مارات بيسەنعاليەۆ باستاعان سيمفونيالىق وركەستر «دىبىس ەنەرگياسى» اتتى شوۋ كونتسەرتتى ۇسىنادى.
ال قىتايدىڭ «مەن ءانشىمىن» جوباسىنا قاتىسىپ, دۇنيەنى ءدۇر سىلكىندىرگەن, ازيانىڭ ۇزدىك ءانشىسى اتانعان ديماش قۇدايبەرگەننىڭ 27 ماۋسىمدا «استانا ارەنا» ستاديونىندا وتەتىن كونتسەرتىنە قازىردىڭ وزىندە جۇرتتىڭ قىزىعۋشىلىعى ۇلكەن.
بۇلاردان وزگە, قازاقستانداعى ۇزدىك مۋزىكالىق ءبىلىم بەرۋ ورىندارى – قازاق ۇلتتىق ونەر ۋنيۆەرسيتەتى مەن قۇرمانعازى اتىنداعى قازاق ۇلتتىق كونسەرۆاتورياسى ۇجىمدارى دا «ەكسپو» اياسىندا كونتسەرت بەرەدى. سونداي-اق, وسى جازدا استانادا قازاقستاننىڭ حالىق ءارتىسى, ءانشى, كومپوزيتور التىنبەك قورازباەۆتىڭ, كۇيشى-كومپوزيتور سەكەن تۇرىسبەكتىڭ, «مۋزارت» توبىنىڭ جانە وزگە دە بىرنەشە تانىمال ءانشى مەن توپتاردىڭ كونتسەرتى ۇيىمداستىرىلادى. جىل سايىن وتەتىن ءداستۇرلى «استانا ارقاۋ», «سەرپەر» سىندى فەستيۆالدەر كەزەكتى مارتە شىمىلدىعىن تۇرەدى. ءبىر سوزبەن ايتقاندا, «ەكسپو» كەزىندە استانادا قۇلاقتان كىرىپ, بويدى الار اسەم ءان مەن ءتاتتى كۇي مولىنان توگىلەدى.
امانعالي قالجانوۆ
