كينوسى شىققاننان كەيىن 48 جىل وتكەندە قويىلىمى استانانىڭ مۋزىكالىق جاس كورەرمەن تەاترىندا العاش ساحنالانعان ايگىلى «گاۋھارتاس» تۋىندىسى تالاي تالانتتاردىڭ جۇلدىزىن جاقتى. كوگىلدىر ەكران ارقىلى سۇلۋ دا تاربيەلى قازاق كەلىنىنىڭ وبرازىن سومداعان تانىمال اكتريسا جاننا قۋانىشەۆانى دا كەزىندە وسى شىعارماداعى سالتانات ءرولى اتاق-داڭققا بولەدى. ال پوۆەست جەلىسىمەن بىلتىرعى پرەمەراسىنان بەرى 157 رەت قويىلعان تەاترداعى سپەكتاكلىندە دارىندى اكتريسا ينابات ريزابەكوۆا ناعىز قازاق كەلىنىنىڭ ەتالونىن شىنايى بولمىسىمەن بەينەلەپ, كورەرمەن كوزايىمىنا اينالدى.
«Umai-2023» ۇلتتىق سىيلىعىن جەڭىپ العان مۋزىكالىق درامانى وتكەن جىلى 70 مىڭنان استام كورەرمەن تاماشالاپتى. كوپتىڭ جۇرەگىن جاۋلاعان «گاۋھارتاستى» كورۋگە ەلىمىزدىڭ وزگە ايماقتارىنان دا كەلەتىن كورەرمەندەر از ەمەس. سپەكتاكل سوڭىندا كوزگە جاس ءۇيىرىلىپ, كوڭىل بوسايتىنى سونشا كورەرمەن تاماشا ادەبي شىعارمانى ساحنا تورىندە اۋەلەتكەن اكتەرلەر قۇرامىنىڭ ەڭبەگىنە تولاسسىز قوشەمەت كورسەتىپ جاتادى. پرەمەراسىنان بەرى قويىلىمنىڭ انشلاگسىز وتكەن كەزى جوق, بيلەتتەر ساتىلىمعا شىققان كۇنى-اق جىلدام ءوتىپ كەتەدى. جالپى قويىلىمدى سومدايتىن اكتەرلەردىڭ ءۇش قۇرامى, ياعني سالتاناتتى وينايتىن ءۇش اكتريسا بار. سولاردىڭ ىشىندە ينابات بىلتىر قويىلىمدى باستاپقىدا ءبىرىنشى قۇرامدا جالعىز, كەيىننەن جاڭادان قوسىلعان ەكى قۇرامداعى ارىپتەستەرىمەن الماسىپ 100-گە جۋىق رەت ويناعان. اكتەرلىك شەبەرلىگىنە قوسا انشىلىك ونەرىمەن تامساندىرعان ينابات «گاۋھارتاس» قويىلىمىنداعى (اۆتورى – د.يسابەكوۆ, رەجيسسەرى – ا.ماەميروۆ) وسى سالتانات ءرولى ءۇشىن بىلتىر «سىنشىلار جۇلدەسى – 2023» ماراپاتتاۋ كەشىندە «جىل اكتريساسى – 2023» جۇلدەسىنە يە بولدى.
ساحنا ادامى بولسا دا, ومىردە سابىرلى, بيازى مىنەزدىڭ يەسى ەكەنى بىردەن بايقالعان ينابات شىعىس قازاقستان وبلىسى تارباعاتاي اۋدانى اقجار اۋىلىندا دۇنيەگە كەلىپتى. اكتريساعا ونەر ناعاشىلارىنان دارىپ, العاش ءان ايتۋ قابىلەتى اكەسىنىڭ 50 جاس مەرەيتويىندا بايقالعان. سودان باستاپ اتا-اناسى ونى ۇنەمى قولداپ, مەكتەپتە تالاي بايقاۋلارعا قاتىستىرعان. 9-سىنىپتان كەيىن الماتىداعى پ.چايكوۆسكي اتىنداعى مۋزىكالىق كوللەدجگە ەسترادالىق ۆوكال بويىنشا ورىن بولماي, حور ديريجەرى ماماندىعىنا گرانتقا وقۋعا تۇسەدى. ودان ءارى ت.جۇرگەنوۆ اتىنداعى ونەر اكادەمياسىندا مۋزىكالىق تەاتر ءارتىسى ماماندىعى بويىنشا 2014-2018 جىلدار ارالىعىندا جوعارى ءبىلىم, كەيىنگى تاعى ەكى جىلدا ماگيسترلىك ءبىلىم الادى. ءۇشىنشى كۋرستان باستاپ, وقۋىن ءدۋالدى جۇيە بويىنشا جالعاستىرىپ, ەلورداداعى «Astana Musical» تەاترىندا ەڭبەك جولىن باستايدى. ساحناداعى ءبىرىنشى دەبيۋتتىك ءرولىن وسى تەاتردا 2017 جىلى «قىز جىبەك» قويىلىمىنداعى باستى رولدەن باستادى. 2020 جىلى ەلوردا تورىندە استانا قالاسى اكىمدىگىنىڭ قولداۋىمەن اشىلعان مۋزىكالىق جاس كورەرمەن تەاترىندا جۇمىسىن جالعاستىردى.
– بۇگىندە تەاتردا 7 سپەكتاكلدە رولدەرىم بار. «Chanel №5» قويىلىمىندا – دامەش ءرولى, «شامشىدە» – روزا باعلانوۆا, «جىلى ورىندا» – اننا پاۆلوۆنا, «ماحاببات بار ما؟» قويىلىمىندا – كاۋسار, «گاۋھارتاستا» – سالتانات, «قىز جىبەكتە» – جىبەك, بىلتىر جەلتوقساندا ساحنالانعان «قوشتاسقىم كەلمەيدى» سپەكتاكلىندە كاتيا رولدەرىن سومدايمىن. ال قازىر دايىندىق جۇرگىزىپ, پرەمەراسى ءبىر ايدان سوڭ بولاتىن «مادەمۋازەل نيتۋش» قويىلىمىندا نيتۋشتىڭ ءرولىن وينايمىن, – دەيدى اكتريسا.
«گاۋھارتاس» مۋزىكالىق دراما رەتىندە قويىلعاندىقتان وعان اكتريسالار تاڭداعاندا ۆوكالدىق جاعىنان داۋسىنىڭ كۇشى بار, دياپازونى كەڭ, ءان ايتا الاتىن اكتريسالارعا باسىمدىق بەرىلگەن. سەبەبى بيبىگۇل تولەگەنوۆا سياقتى وپەرا جۇلدىزى ورىنداعان «گاۋھارتاس» ءانىن «مەن» دەگەن انشىلەردىڭ ءوزى جەتەرىنە جەتكىزىپ ايتا المايدى. ال اكتريسالارعا بۇل تۇرعىدا وزىندىك انشىلىك قابىلەت كەرەك.
– كەز كەلگەن رەجيسسەر بەلگىلى ءبىر رولگە اكتەردى بەكىتەر الدىندا ونى شاماسى كەلەدى-اۋ دەگەن ادامعا ۇسىنادى. نەگىزى بۇل ورىندالۋى قيىن ءان, ونىڭ ءماتىنى جاعىنان بىرنەشە نۇسقاسى بار, ءاندى دايىنداۋدا دارىندى ءانشى سۆەتا ايتباەۆا اپايىمىزدىڭ كومەگىنە كوپ جۇگىندىك. ەكىنشىدەن, سالتانات وبرازىنا بولمىسى ۇقسايتىن اكتريسالارعا نازار اۋدارىلدى. ءوزىم دە ۇلكەن ءبىر اۋلەتتىڭ كەلىنىمىن, وسى جاعىنان دا كەلىن ءرولىن سومداۋعا ءبىر قۇرامعا مەن تاڭدالدىم. ءبىر جىل بۇرىن وسىنداي دراما قويىلاتىنى ايتىلا باستاعاننان دەرەۋ كينوسىن قايتالاپ كورىپ, دۋلات اتامىزدىڭ كىتابىن تاعى تەرەڭ زەردەلەپ, وقىپ شىقتىم. جالپى قويىلىمنىڭ ءوزىن دايىنداۋعا 6 اي ۋاقىت كەتتى. سول ارالىقتا ءبىزدىڭ بۇكىل اكتەرلىك قۇرام تەك «گاۋھارتاس» دەپ ويانىپ, سونى تالقىلاپ ۇيقىعا كەتىپ ءجۇردى, راسىن ايتقاندا, ءبارىمىز وسى قويىلىممەن «اۋىردىق». كىتابىن وقىعان كەزدە كوز الدىما ەلەستەتىپ تۇرىپ, تامسانىپ وتىرىپ وقىدىم, ءوزىمدى سول رولدە «كوردىم». سالتاناتقا بىردەن عاشىق بولدىم, وبرازى مەنى بىردەن باۋراپ الدى. باستى كەيىپكەردىڭ وزىممەن ۇقساس تۇستارىن جانە نەسىمەن ۇقسامايتىنىن دا انىقتاپ, ءوز ءرولىمدى تولىق زەرتتەدىم. ودان كەيىن ۆوكالدىق جاعىنان ۇزاق دايىندالدىم. بۇكىل اكتەرلىك قۇرام تاڭنان كەشكە دەيىن دايىندىقتى ۇزبەدىك, پرەمەراعا جاقىنداعاندا تاڭعا دەيىن قالىپ دايىندالاتىنبىز. سەبەبى وسىنداي كلاسسيكالىق ادەبي شىعارمانى ساحناعا العاش رەت الىپ شىعۋ ۇلكەن جاۋاپكەرشىلىك جۇكتەدى. ونىڭ ۇستىنە پرەمەراسىنا پوۆەست اۆتورى دۋلات اتامىز دا كەلەتىن بولدى. مىنە, سول كۇن-ءتۇن دەمەي ەتكەن ەڭبەك اقتالىپ جاتىر, كەلگەن ءاربىر كورەرمەننىڭ ىستىق ىقىلاسىنا بولەندىك, حالىقتىڭ باتاسىن الدىق. سوندىقتان ساحناعا شىققان سايىن ءوزىمدى باقىتتى سەزىنەمىن. ءتىپتى ساحناعا اۋىرىپ شىقسام دا سول ساتتە ءبارىن ۇمىتىپ, تەك سالتانات وبرازىنا كىرىپ كەتەمىن, – دەيدى ينابات.
ونىڭ ايتۋىنشا, شىعارمادا كوتەرىلگەن ماسەلە سودان بەرى جارتى عاسىر وتسە دە ءالى دە وزەكتى. قازىرگى داۋىرمەن ۇقساستىقتارى وتە كوپ. بۇگىنگى تاڭداعى وتباسىنداعى زورلىق-زومبىلىق تۋرالى كۇن سايىن تارايتىن اقپاراتتار – سونىڭ ايعاعى.
– بۇل قويىلىمدا ەنە مەن كەلىننىڭ, قاينىسى مەن جەڭەشەسىنىڭ اراسىنداعى قارىم-قاتىناس, كەلىننىڭ اتاسىنا دەگەن قۇرمەتى, ەرلى-زايىپتىلار اراسىنداعى ءتۇرلى سەزىم كورسەتىلەدى. ارينە, ول كەزدە تاربيە باسقا, قازاق قىزىنىڭ, كەلىنىنىڭ بولمىسى ءسال وزگەشە بولۋى مۇمكىن. ءتارتىپ قاتتى. دەگەنمەن اق-قارانى تەاتر قويىلىمدارى ارقىلى سىرتتاي باقىلاۋمەن اجىراتقان كورەرمەنگە بۇل كوپ وي سالادى. ءبىز ويناپ تۇرعاندا زالدا ءتىپتى كەيبىر ەر ادامداردىڭ دا جىلاپ وتىرعانىن بايقايمىز. قويىلىم بىتكەن سوڭ ولار بىزگە كەلىپ: «ساحنادان ءوزىمدى, ايەلىمدى كورگەندەي بولدىم» دەپ قويىلىم ولارعا قاتتى اسەر ەتكەنىن ايتادى. كورەرمەننىڭ بۇلاي اقتارىلۋى, زالدا جىلاپ وتىرۋى ءبىزدىڭ جۇرەگىمىزدى ودان سايىن ەلجىرەتىپ, سەنىمىمىزدى ارتتىردى, ءوزىمىزدىڭ دۇرىس باعىتتا ەكەنىمىزدى ءتۇسىندىردى, – دەيدى ول.
جالپى قويىلىمنىڭ كورەرمەن جۇرەگىن جاۋلاپ الۋىندا رەجيسسەرلىك جۇمىستان باستاپ بۇكىل اكتەرلىك قۇرامنىڭ, ساحنا سىرتىنداعى باسقا دا قىزمەتكەرلەردىڭ قوسار ۇلەسى وتە زور. ەڭ ءبىرىنشى كەزەكتە ساحناداعى شىنايىلىق ۇلكەن ءرول وينايدى. سوسىن ءاربىر اكتەردىڭ قاجىرلى ەڭبەگىنىڭ جەمىسى. تەاتر ارتىستەرىنىڭ ءبارى دەرلىك وتىزدىڭ ۇستىندەگى جاستار بولسا دا, قويىلىمداعى ەگدە جاستاعى كەيىپكەرلەردى شىنايى سومدايدى. بۇكىل قۇرام التى اي بويى وبراز جاساۋعا ازىرلىكتەن بولەك, حور مەن بيگە دايىندالدى. بۇگىندە وسى قويىلىمداعى «قۇداشا», «ءلايلىم شىراق» اندەرى مەن بيلەرى جاستار اراسىندا ترەندكە اينالىپ, كەڭىنەن تارالىپ كەتتى. قويىلىم ارقىلى حالىق اندەرى دارىپتەلىپ, جاڭاشا لەپپەن ەلگە جەتكىزىلدى. «گاۋھارتاس» گاسترولدەر كەزىندە ايىنا 22, ال قالىپتى ۋاقىتتا ايىنا 13-14 رەتتەن قويىلدى.
اتىراۋدىڭ كەلىنى يناباتتىڭ جۇبايى ورازالى دا – وسى تەاتردىڭ بەلدى اكتەرى. ەكەۋىن تابىستىرعان تەاتردا ولار سياقتى بارلىعى 14 جۇپ وتباسى بار. يناباتتىڭ اكتەرلىك ومىرىندەگى ەڭ جۇرەگىنە ىستىق قويىلىم «قىز جىبەكتە» ەكەۋى جىبەك پەن تولەگەننىڭ ءرولىن سومداپ ءجۇرىپ, ءبىر-بىرىنە شىنايى ومىردە دە عاشىق بولىپ قالادى. قويىلىمعا دايىندىق بارىسىن كورگەن مارقۇم قۇمان تاستانبەكوۆ باستى رولدەگى ەكى اكتەردىڭ سەزىمىن بىردەن بايقاپ, جاقىندا ءبىر جاڭا جۇپ پايدا بولاتىنىن ايتقان ەكەن جانە جاس تەاتر ۇجىمىنا باتاسىن بەرىپ كەتكەن. ءسويتىپ كوپ ۇزاماي بۇل سەزىمنىڭ سوڭى ۇيلەنۋ تويىنا جالعاسىپ, ەكى جاس دۇنيەگە كەلگەن قىزىنىڭ ەسىمىن جىبەك دەپ قويادى. ەرىن وزىنەن جوعارى قوياتىن قازاق ايەلىنە ءتان قاسيەتپەن ينابات تا جۇبايىنىڭ بويىنداعى قابىلەتىن بيىك باعالاپ, ونىڭ اكتەرلىك ونەردەگى تاجىريبەسى مول ەكەنىن, وسىنداي جەتىستىككە تەك سونىڭ قولداۋىمەن جەتىپ جۇرگەنىن اقتارىلا باياندادى. بولاشاقتا قازىرگىدەن باسقاشا تاريحي تۇلعالاردى جانە جاعىمسىز كەيىپكەرلەردى دە سومداپ, شىعارماشىلىعىن شىڭداي ءتۇسۋدى, تەاتر دەگەن ۇلى ونەردىڭ شىڭىنا جەتۋدى ارماندايدى. جاس تا دارىندى شىعارماشىلىق يەلەرىن ونەردە دە, ومىردە دە تاربيەلەپ وتىرعان تەاتر ديرەكتورى ءارى رەجيسسەرى اسحات ماەميروۆتىڭ وسى تۇرعىدا ەڭبەگى وراسان زور. ۇجىمدى شىعارماشىلىق جاعىنان ۇنەمى دامىتىپ, تاربيە مەن ادالدىقتى وسيەت ەتەتىن باسشىنى ينابات تا, تەاترداعى ءاربىر اكتەر دە ونەردەگى اكەسى, ونەگەلى تالىمگەرى سانايدى.
