حالىقارالىق «قازاق ءتىلى» قوعامى استانالىق فيليالىنىڭ ۇيىمداستىرۋىمەن قازاق ءتىلى مەن مادەنيەتى I فورۋمى ءوتتى.
فورۋمدا مەملەكەتتىك ءتىلدىڭ حالىقارالىق قاتىناس سالاسىنداعى ورنى مەن ءرولى, ءتىل مادەنيەتىنىڭ قالىپتاسۋى, قازاق ءتىلىنىڭ عىلىم ءتىلى رەتىندە دامۋى, مەملەكەتتىك ءتىلدىڭ قولدانىس اياسىن كەڭەيتۋگە قاتىستى وزگە دە ۇسىنىس-پىكىر ايتىلىپ, «قازاق ءتىلى» قوعامىنىڭ جوبالارى تانىستىرىلدى. ءىس-شارا نۇر-سۇلتان قالاسى اكىمدىگىنىڭ, قر بعم ءتىل ساياساتى كوميتەتىنىڭ, «التىن قىران» كومپانيالار توبىنىڭ, قر پرەزيدەنتىنىڭ حالىقارالىق «بولاشاق» ستيپەندياسى ستيپەندياتتارى قاۋىمداستىعىنىڭ قولداۋىمەن ءوتتى. جيىنعا قر پارلامەنتى دەپۋتاتتارى, مەملەكەت جانە قوعام قايراتكەرلەرى, عالىمدار, ءتىل جاناشىرلارى قاتىستى.
فورۋمدا ءسوز العان حالىقارالىق «قازاق ءتىلى» قوعامىنىڭ پرەزيدەنتى, قر پارلامەنتى ءماجىلىسىنىڭ دەپۋتاتى بەرىك ابدىعاليۇلى حالىقارالىق قاتىناستاعى قازاق ءتىلىنىڭ ءورىسىن كەڭەيتۋ ماسەلەسىن ايرىقشا كوتەردى. مەملەكەت باسشىسى قاسىم-جومارت توقاەۆتىڭ «ديپلوماتتارىمىز شەت تىلدەرىن عانا ەمەس, الدىمەن مەملەكەتتىك ءتىلدى ءبىلۋى كەرەك» دەگەن ءسوزىن العا تارتقان قوعام باسشىسى مەملەكەتىك ءتىلدىڭ قولدانىسى بويىنشا ەنگىزىلگەن وزگەرىستەرگە توقتالدى.
جيىندا «قازاق ءتىلى» قوعامىنىڭ 5 جوباسى تانىستىرىلدى. اتاپ ايتقاندا, «Sözwar» سويلەسۋ كلۋبى» جوباسى, استانالىق فيليالدىڭ «Körneki» جوباسى, «QAZAQ GRAMMAR» قازاق مەكتەبى جوباسى, «سويلە, ءتىلىم!» جوباسى, «التىن ۇرپاق/Golden Generation» قازاق جانە اعىلشىن تىلىندەگى حالىقارالىق توپتىق كىرىكتىرىلگەن ءپان وليمپياداسى جوباسى تۋرالى جان-جاقتى مالىمەت بەرىلدى. سونىمەن قاتار «سالاۋاتتى ۇرپاق» مەكتەپكە دەيىنگى تاربيە مەن ءبىلىم بەرۋگە ارنالعان دامىتۋشى ويىندار جوباسى دا ەگجەي-تەگجەيلى تانىستىرىلدى.
قوعام مۇشەلەرى فورۋمدا سونداي-اق قازاق ءتىلىنىڭ قولدانىس اياسىن كەڭەيتۋدى ءسوز ەتتى.
ءتىل جاناشىرلارى اينۇر باعداتقىزى ونلاين كىتاپ ساۋداسىندا قازاق تىلىندەگى كىتاپتاردىڭ ازدىعى ماسەلەسى, اقەركە ابىلايحان «بولاشاق» ستيپەندياتتارىنىڭ قازاق ءتىلىنىڭ وركەندەتۋگە قوسىپ جاتقان ۇلەسى, اياتجان احمەتجان ورتا ءبىلىم سالاسىنداعى قازاق ءتىلىن وقىتۋ تۇيتكىلدەرى تۋرالى, نازيرا بايىربەك شەت مەملەكەتتە قازاق ءتىلى كۋرستارىن ۇيىمداستىرۋ توڭىرەگىندە, ماقسۇتبەك ايتماعامبەت قازاق ءتىلىنىڭ حالىقارالىق ارەناداعى مارتەبەسى جايىندا, ليمانا قويشيەۆا ءتىل مادەنيەتىنىڭ ۇرپاق تاربيەسىندەگى الاتىن ورنى تۋرالى اڭگىمەلەپ بەردى.
ءىس-شارادا حالىقارالىق «قازاق ءتىلى» قوعامىنىڭ پرەزيدەنتى بەرىك ابدىعاليۇلى استانالىق فيليالدىڭ جۋىردا سايلانعان جاڭا توراعاسىن تانىستىردى. قوعامنىڭ ەلورداداعى فيليالىن بۇدان بىلاي «بولاشاق» باعدارلاماسىنىڭ تۇلەگى, فيلولوگيا عىلىمدارىنىڭ كانديداتى, جۋرناليست-پەداگوگ قانات اۋەسباي باسقارادى.
فورۋم سوڭىندا استانالىق ءتىل جاناشىرلارى مەن قوعامنىڭ بەلسەندى مۇشەلەرى ماراپاتتالدى.
ءاسيا نۇربەكقىزى
