شۆەتسيا استاناسى ستوكگولم قالاسىندا وتكەن VI «OEBF-2017» ادەبيەت فەستيۆالى مەن كىتاپ فورۋمى بايقاۋىندا جازۋشى-دراماتۋرگ ەرمەك امانشاەۆ «تاۋبە» كىتابى ءۇشىن «جىل اۆتورى» اتاعىنا يە بولدى.
فەستيۆال باعدارلاماسى اياسىندا سان الۋان شارا وتكىزۋ جوسپارلانعان. اتاپ ايتقاندا, كونكۋرسقا قاتىسۋشىلاردىڭ كىتاپتارىن وقۋ, ۆيدەوفيلمدەر كونكۋرسىنا قاتىساتىن جۇمىستارمەن تانىسۋ, فەستيۆالدىڭ قۇرمەتتى قوناقتارىنىڭ كىتاپتارىنىڭ تۇساۋكەسەرى, فيلم كورسەتىلىمدەرى جانە كونكۋرسقا قاتىسۋشىلارمەن كەزدەسۋلەر ۇيىمداستىرىلدى.
فەستيۆالدە 20 ەلدىڭ 300 قاتىسۋشىسى باقتارىن سىنادى. كونكۋرسقا ورىس, اعىلشىن, قازاق, قىرعىز, وزبەك, تاجىك, تۇرىكمەن جانە ازەربايجان سياقتى سەگىز ءتىلدىڭ بىرىندە جازىلعان شىعارمالار قاتىسقان.
اۆتوردىڭ بۇل كىتابى قازاق اۆتورلارىن ىزدەپ وقيتىن شۆەتسيانىڭ حالىقارالىق كىتاپحاناسىنا جانە ستوكگولم قالاسىنىڭ ورتالىق كىتاپحاناسىنا تارتۋ ەتىلگەن ەكەن.
2016 جىلى ەرمەك امانشاەۆتىڭ اتالمىش ەڭبەگى لوندوندا لاۋرا حاميلتوننىڭ وڭدەۋىمەن اعىلشىن تىلىندە جارىق كورگەن بولاتىن. كىتاپ ءبىر جىلدىڭ ىشىندە بەستسەللەرگە اينالىپ, الەمدەگى ادەبيەت سۇيەر قاۋىمنىڭ ىستىق ىقىلاسىنا يە بولدى. اۆF مادەني ورتالىعىنىڭ ۋلوف پالمە اتىنداعى زالىندا ۇسىنىلعان ماراپاتتاۋ راسىمىندە شۆەتسيانىڭ ايتۋلى سىيلىعى مەن ەرمەك امانشاەۆتىڭ شىعارماشىلىعى تۋرالى اڭگىمە ءوربىدى. پاتشالىق ونەر قوعامىنىڭ مۇشەسى دەۆيد ۋيليام پارري ءوزىنىڭ جىلى لەبىزىن ءبىلدىردى. بۇگىندە كىتاپ فرانتسۋز تىلىنە اۋدارىلىپ ۇلگەرىپ, 2018 جىلى تۇساۋكەسەر ءراسىمى وتپەك. سونداي-اق, جاڭا جىل قارساڭىندا اڭگىمەلەر جيناعى e-book فورماتىندا اعىلشىن تىلىندە جاريالاناتىن بولادى.
گۇلجان راحمان
