جاقىندا اسلان ەسىمدى استانالىق تانىسىم التى جاسار قىزى ايشانۇردى مۋلتفيلمدەردىڭ قازاقشا سەانسىنا اپارۋ كادىمگىدەي پروبلەما ەكەنىن ايتتى. ولار انگليادا بىرنەشە جىل بويى تۇرىپ كەلگەندىكتەن, الگى ءبۇلدىرشىن تەك قانا قازاقشا جانە اعىلشىنشا سويلەيدى. ورىسشا مۇلدە تۇسىنبەيدى. «قاس قىلعاندا, كينوتەاترلاردا مۋلتفيلمدەردىڭ قازاقشا سەانسى كۇنىنە ءبىر-ەكەۋ عانا. ونىڭ ءوزى ىڭعايسىز ۋاقىتتاردا: تاڭەرتەڭ نەمەسە تۇستە» دەيدى اكەسى.
الەۋمەتتىك جەلىنى قولدانۋشىلاردا قازاقشا سەانستاردىڭ سيرەك كورسەتىلەتىنىمەن قاتار, ولارعا بيلەتتى ونلاين ساتىپ الۋدىڭ قولجەتىمدى ەمەستىگىن ايتۋدا. مىسالى, بەللا ەسىمدى Facebook قولدانۋشىسى بىلاي دەپ جازادى:
– «Chaplin Cinemas» كينوتەاترلار جەلىسى, دالىرەك ايتساق, «Chaplin Mega Silk Way» كينوتەاترى «رالف ينتەرنەتكە قارسى» ءمۋلتفيلمىنىڭ ءبىر كۇنگە 17 سەانسىن ۇسىنعان. بىراق سونىڭ بىرەۋى عانا قازاقشا. ونىڭ وزىندە, باسقا ورىسشا سەانستارعا بيلەتتى ونلاين ساتىپ الۋدىڭ مۇمكىندىگى بار دا, الگى قازاقشا سەانس ءۇشىن ونداي مۇمكىندىك جوق. جارايدى دەپ, «Kinopark 7 IMAX Keruen» كينوتەاترىن قارادىق. مۇندا قازاقشا سەانسقا بيلەت الۋ مۇمكىندىگى بولعانمەن, ساتىپ الۋ تۇيمەسىن باسقانىڭدا, ەكراننان باسقا, ياعني, ورىسشا سەانستى تاڭداۋ تۋرالى سىپايى ۇسىنىس شىعادى.
ءبىز دە تەكسەرىپ كورمەك بولىپ, «Kinopark» ءموبيلدى قوسىمشاسىن اشساق, «رالف ينتەرنەت قارسى» ءمۋلتفيلمىنىڭ 26 قاراشا كۇنگى بىردە-ءبىر قازاقشا سەانسى تىزىمدە جوق بولىپ شىقتى. قىزىعى, kino.kz پورتالى بىزگە «Kinopark 8 IMAX Saryarka» كينوتەاترىندا ساعات 10.20 جانە 12.30 كەزدەرىندە قازاقشا سەانس كورسەتىلەتىنى تۋرالى اقپارات بەرگەنىمەن, «Kinopark» ءموبيلدى قوسىمشاسىندا ول ۋاقىتقا بىردە-ءبىر سەانستى تاپپادىق.
بۇل ماسەلەنىڭ سەبەبىن اتالعان سەانستارعا بيلەتتىڭ تۇگەلدەي ساتىلىپ كەتۋىمەن تۇسىندىرەر بولساق, وندا كينوتەاتر اكىمشىلىگى قازاقشا سەانستارعا سۇرانىستىڭ جوعارى ەكەنىن ەسكەرىپ, ولاردىڭ سانىن ءوسىرۋ كەرەك ەمەس پە قايتا؟ بۇل سۇراقتى ءبىز «Kinopark Theatres» كومپانياسىنىڭ وڭىرلىك ديرەكتورى باقىتجان اپيزوۆقا جولدادىق. جاۋاپ كەلگەن كۇنى وزدەرىڭىزبەن بولىسەتىن بولامىز.
