«بارىس ارەنا» سپورت كەشەنىندە ەلوردا كۇنىنە وراي قازاق كۇرەسىنەن وتكىزىلگەن 11-ءىنشى «قازاقستان بارىسى» تۋرنيرىندە ەلىمىزدىڭ بارلىق ايماعىنان ەڭ ۇزدىك بولىپ تانىلعان 36 بالۋان بەلدەستى.
بايراقتى باسەكەنىڭ اشىلۋ سالتاناتىندا نۇر-سۇلتان قالاسىنىڭ اكىمى التاي كولگىنوۆ پەن مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ توراعاسى سامات ەرعاليەۆ قۇتتىقتاۋ ءسوز سويلەپ, بالۋاندارعا ساتتىلىك تىلەدى.
ۇلتتىق سپورتىمىزدىڭ برەندىنە اينالعان «قازاقستان بارىسى» ءتۋرنيرىن ۇيىمداستىرۋشىلار جىل سايىن جارىس ەرەجەسىن جەتىلدىرىپ كەلەدى. ماسەلەن, وسىدان ءۇش جىل بۇرىن بالۋانداردىڭ كيىمىنە وزگەرىس ەنگىزىلسە, سونداي-اق ۋاقىت جاعىن ءتيىمدى پايدالانۋ ءۇشىن بەلدەسۋ ۋاقىتى 5 مينۋتتان 4 مينۋتقا قىسقارتىلعان بولاتىن. ال بيىل بەلدەسۋ ۋاقىتى قايتادان 5 مينۋتقا ۇزارتىلدى. بالۋاندار بىلتىردان بەرى جالاڭاياق كۇرەسەتىن بولدى. ال بيىلدان باستاپ «بۇك» ۇپايى جارىس ەرەجەسىنەن الىنىپ تاستالدى. وسىنىڭ ءبارى ءتۋرنيردىڭ مارتەبەسىن جەتىلدىرۋگە جول اشىپ وتىر.
ال ەندى «بارىس ارەنا» سپورت كەشەنىنە جينالعان جانە تەلەديدار ارقىلى تاماشالاعان قالىڭ جانكۇيەردىڭ قانىن قىزدىرعانى ءسوزسىز. ەڭ قىزىعى, سول توپ جارادى-اۋ دەگەن اتاقتى بالۋانداردىڭ بىرقاتارى شيرەك فينالعا جەتە الماي ءسۇرىنىپ جاتتى. اتاپ ايتقاندا, وسىعان دەيىنگى جارىستاردا جەڭىس تۇعىرىنان كورىنگەن مۇحيت تۇرسىنوۆ, ەلامان ەرعاليەۆ, ەراسىل قاجىباەۆ سەكىلدى بالۋاندار جارىستان ەرتە شىعىپ قالدى. مۇنىڭ ءوزى قازاق كۇرەسىنىڭ قارقىندى دامىپ كەلە جاتقانىن ايعاقتاسا كەرەك.
سونىمەن, بيىلعى جارىستىڭ ءبىرىنشى جارتىلاي فينالىنا عالىمجان قىرىقباي مەن ماقسات يساعابىلوۆ شىقتى. بۇل بەلدەسۋدە جامبىل وبلىسىنىڭ نامىسىن قورعاعان بالۋان جەڭىسكە جەتەدى دەگەن كوپشىلىكتىڭ جورامالى جوققا شىقتى. ويتكەنى قىزىلوردالىق ماقسات يساعابىلوۆ بۇل جارىسقا تاس-ءتۇيىن دايىندالىپ كەلگەنىن ايقىن اڭعارتىپ, قارسىلاسىن تىزە بۇكتىرىپ كەتتى. ەكىنشى جارتىلاي فينالدا 2017 جىلعى جەڭىمپاز ەلامان ەرعاليەۆتى جولدا قالدىرعان شىمكەنتتىك ءنۇرسات تەمىرحان ماڭعىستاۋلىق نۇرداۋلەت جارىلعاپوۆتان ۇتىلدى.
وسىلايشا اقتىق سىندا ماقسات يساعابىلوۆ پەن نۇرداۋلەت جارىلعاپوۆ كەۋدە ءتۇيىستىردى. بۇل بالۋاندار بۇعان دەيىن فينالعا شىقپاعان ەدى. باس جۇلدە ءۇشىن وتكەن اقتىق بەلدەسۋدىڭ باسىندا قوس بالۋان اڭدىسىپ ءجۇرىپ الدى. الايدا قاس-قاعىم ساتتە قىزىلوردالىق ماقسات يساعابىلوۆ شالت قيمىلداپ, قارسىلاسىنا قارسى ادەمى ءادىس قولدانا ءبىلدى. وسىلايشا بارلىق قارسىلاسىن قوعاداي جاپىرعان ماقسات يساعابىلوۆ «قازاقستان بارىسى» ءتۋرنيرىنىڭ سەگىزىنشى جەڭىمپازى اتاندى.
ال ءۇشىنشى ورىن ءۇشىن بەلدەسۋ وتپەي قالدى. نۇرسات تەمىرحان جاراقاتىنا بايلانىستى بوزكىلەمگە شىعۋدان باس تارتتى. سوندىقتان قولا جۇلدەنى عالىمجان قىرىقباي «قان شىعارماي-اق» قانجىعاسىنا بايلادى.
2022 جىلعى «قازاقستان بارىسى» اتانعان ماقسات يساعابىلوۆقا «التىن بەلبەۋدى» پرەمەر-ءمينيستردىڭ ورىنباسارى ەرالى توعجانوۆ تاپسىردى. سونىمەن, جەڭىمپاز بالۋانعا اۋىسپالى «التىن تايتۇياق» پەن 25 ميلليون تەڭگەنىڭ سەرتيفيكاتى تابىس ەتىلدى. ال كۇمىس جۇلدەگەر اتانعان نۇرداۋلەت جارىلعاپوۆقا «كۇمىس بەلبەۋ» مەن 5,5 ميلليون تەڭگە سىيلىق تاپسىرىلسا, ءۇشىنشى ورىن يەلەنگەن عالىمجان قىرىقبايعا 1,8 ميلليون تەڭگە جانە «قولا بەلبەۋ» بەرىلدى.
عالىم قوجابەكوۆ
