Aلعاش رەت ەلوردادا تاۋەلسىزدىكتىڭ 25 جىلدىعىنا وراي تىلەپ اسپانتايۇلى اتىنداعى جاس قوبىزشىلاردىڭ حالىقارالىق بايقاۋى ءوتتى. وعان الەمنىڭ وتىزدان اسا ەلىنەن دارىندى ونەرپازدار قاتىستى.
يگىلىكتى شارا باسىندا «قوبىز» سارايىنىڭ الدىندا تىلەپ بابامىزدىڭ ەسكەرتكىشى سالتاناتتى تۇردە اشىلدى. وعان ەلورداداعى يگى جاقسىلار جينالىپ, تىلەپ اسپانتايۇلى تۋرالى, جالپى قوبىز ونەرى جايىندا ساليقالى ءسوز ءوربىتتى. قورقىتتان باستاۋ العان ونەردىڭ بۇگىنگى كۇنى كەڭ قانات جايعانى تۋرالى اڭگىمەلەدى. سودان كەيىن الەمنەن ەلورداعا جينالعان جاس قوبىزشىلارعا ارنالعان فەستيۆالدىڭ شىمىلدىعى ءتۇرىلدى.
– بۇگىنگى ءوتىپ وتىرعان بايقاۋدىڭ تاعىلىمدىق ءمانى زور. مۇنداعى ماقساتىمىز – قازاقتىڭ قارا قوبىزىن الەمدىك دەڭگەيدە تانىتساق دەيمىز. سول ارقىلى قازاقتىڭ مادەنيەتىن اسقاقتاتقىمىز كەلدى. كۇللى تۇرىكتەردىڭ اتاسى – قورقىت بابامىز بارىمىزگە ورتاق, – دەيدى ىزگى شارانى ۇيىمداستىرۋشى ساپار ىسقاقوۆ.
بايقاۋ ەكى كەزەڭگە بولىنگەن. قاتىسۋشىلار العاشقىسىندا تىلەپ اتامىزدىڭ بۇگىنگە دەيىن ساقتالىپ كەلگەن ءۇش شىعارمانىڭ ءبىرىن ورىنداسا, ەكىنشى كەزەڭدە – ءوزىنىڭ ەلىنىڭ شىعارماسىن ورىنداۋ قاجەت. جاس قوبىزشىلاردىڭ ونەرىن ساراپتاۋعا قازىلار القاسىنا الەمدىك دەڭگەيدەگى مادەنيەت سالاسىنىڭ مايتالماندارى تارتىلعان. وڭتۇستىك كورەيادان كەلگەن ءداستۇرلى ونەر مەكتەبىنىڭ دەكانى, پروفەسسور Jeong Soo Nyun ەلىمىز جايىندا جىپ-جىلى پىكىر ءبىلدىردى. «قازاقستانعا وسىدان جيىرما جىل بۇرىن كەلگەن ەدىم. قازىر ەلدەرىڭىز ادام تانىماستاي وزگەرگەن. مۇلدەم جاڭارىپ, دامىپ كەتىپتى. وسى ساپاردا قازاقتىڭ ۇلتتىق مۋزىكالىق اسپاپتارىمەن تانىستىم. اسىرەسە, ماعان دومبىرا مەن قوبىزدىڭ ءۇنى ەرەكشە ۇنادى. ولاردان شىعاتىن سازدىڭ دا اۋەزى بولەك. ءبىزدىڭ ەلدەرىمىزدىڭ تاعدىرى ۇقساس. قازاقستاندى تاۋەلسىزدىك مەرەكەسىمەن قۇتتىقتايمىن!» دەدى ول.
وسىنداي اۋقىمدى شارانى وتكىزۋگە قر مادەنيەت جانە سپورت مينيسترلىگى مەن استانا قالاسىنىڭ اكىمدىگى جانە كەڭەس وداعىنىڭ باتىرى, حالىق قاھارمانى ساعادات نۇرماعامبەتوۆ اتىنداعى قور مۇرىندىق بولعان.
ءۇش كۇنگە سوزىلعان ونەر بايقاۋى وتە جوعارى دەڭگەيدە ۇيىمداستىرىلدى. جاس ونەرپازدار ىشەكتى اسپاپتىڭ سازدى ۇنىمەن جۇرتشىلىقتى ادەمى اسەرگە بولەدى. كورەرمەندەرگە كوركەم كەش سىيلادى. سونىمەن بايقاۋ دا ءوز مارەسىنە جەتتى. كىشى توپتار اراسىنان قىرعىزستاننان كەلگەن جىبەك ماادانبەكوۆا ۇزدىك شىعىپ, ءبىرىنشى ورىندى يەلەندى. ۇلكەن توپتان وڭتۇستىك كورەيادان ات ارىتىپ جەتكەن ەنحۋ چو-ءنىڭ ونەرى جوعارى باعالانىپ, جۇلدەگەر اتاندى. ال بايقاۋدىڭ گران-پري جۇلدەسىن قانجىعاسىنا بايلاعان قىتايدان كەلگەن جاس ونەرپاز حينگ چەنگ تىلەپ بابامىز ۇستاعان قوبىزبەن «اللام جار» كۇيىن ناشىنە كەلتىرە ورىنداپ, كورەرمەننىڭ ىستىق ىقىلاسىنا بولەندى. جەڭىمپازداردىڭ بارلىعى دا باعالى سىيلىقتارمەن ماراپاتتالدى.
حالىقارالىق بايقاۋ سوڭى بەيبىتشىلىك جانە كەلىسىم سارايىندا وتكەن گالا-كونتسەرتكە ۇلاستى.
ازامات ەسەنجول
