تاۋەلسىزدىكتىڭ 25 جىلدىعىن مەرەكەلەۋ اياسىندا سارىارقا اۋدانىنىڭ اكىمدىگىندە اۋداننىڭ دامۋىنا سۇبەلى ۇلەس قوسقان تۇرعىنداردى ماراپاتتاۋ سالتاناتى ءوتتى. سونداي-اق, اۋدان اكىمى قاراماعىنداعى اپپارات قىزمەتكەرلەرىن دە قۇتتىقتاپ, ىزگى تىلەگىن ءبىلدىردى.
سارىارقا اۋدانى اكىمدىگى تاراپىنان ارداگەرلەردىڭ بارىنە باعالى سىيلىق پەن ازىق-تۇلىككە تولى قورجىندار ۇلەستىرىلدى.
– تاۋەلسىزدىك كۇنى – ەلىمىزدەگى ەڭ ماڭىزدى مەرەكە. شيرەك عاسىرلىق مەرەيتويدى ءبىز ۇلكەن جەتىستىكتەرمەن قارسى العالى وتىرمىز. سونىڭ ىشىندە تاۋەلسىزدىك جىلدارى قالىپتاسقان استانانىڭ كەلبەتىن ەرەكشە اتاۋعا بولادى. ال وعان وسى جەرگە جينالعان باتالى قاريالاردىڭ ەڭبەگى ءسىڭدى. جۇكتەلگەن ءمىندەتتەردى اتقارۋدا سىزدەردىڭ كەڭەستەرىڭىز كوپ كومەگىن تيگىزەدى, – دەدى ارمان تۇرلىبەك.
اۋدان اكىمىنىڭ ايتۋىنشا, بۇگىندە سارىارقا اۋدانىندا 27 مىڭ زەينەتكەر, 140 باستاپقى ارداگەرلەر ۇيىمى بار. سونىڭ ىشىندە 54 ۇلى وتان سوعىسىنىڭ ارداگەرى, 2100 تىل ارداگەرى, 1200 ەڭبەك ارداگەرى وسى اۋداندا تۇرادى. بارلىعى – ارداگەرلەر ۇيىمىنا مۇشە.
– وسىناۋ تاۋەلسىزدىك تويى قارساڭىندا ءبىزدى ارنايى شاقىرىپ, ەلەپ-ەسكەرىپ, سىي-قۇرمەت كورسەتكەندەرىڭىزگە راحمەت. مەرەكە كۇنى اۋدانىمىزدىڭ جاڭا اكىمىمەن وسىنداي قۋانىشتا قاۋىشقانىمىزعا قۋانىشتىمىز. ۇلكەندەر يگى باستامالارىڭا ارقاشان قولداۋ بىلدىرۋگە دايىن, – دەپ قاريالار اتىنان بالتاش سۇڭقاربەكوۆ ريزاشىلىعىن ءبىلدىردى.
استانا قالاسى قوعامدىق كەڭەسىنىڭ توراعاسى سانسىزباي ەسىلوۆ جاڭا اكىمنىڭ باستاعان ىسىنە ساتتىلىك تىلەپ, وسى جەردىڭ قاريالارىن جيناپ, باتاسىن العانىن كورگەندىگى, بىلگەندىگى دەپ باعالادى.
ال اپپارات قىزمەتكەرلەرىن قۇتتىقتاعان سالتاناتتى جيىندا اۋدان اكىمى ەلىمىز ەگەمەندىك العاننان بەرگى قول جەتكىزگەن جەتىستىكتەر جايىندا سالماقتى ءسوز قوزعاپ, ەلوردانىڭ دامۋىمەن بىرگە اۋداننىڭ دا ەكونوميكالىق-الەۋمەتتىك جاعدايى جاقسارىپ, ينفراقۇرىلىم مەن تۇرعىنداردىڭ تۇرمىسى تۇراقتى جولعا قويىلعاندىعىن باياندادى.
– ەلباسىنىڭ ساليقالى ساياساتىنىڭ ارقاسىندا ەلىمىز 25 جىل ىشىندە الەم تانىعان مەملەكەت اتاندى. ءبىزدىڭ سارىارقا اۋدانىنىڭ تاريحى استانانىڭ العاشقى كۇنىنەن باستالادى. بۇگىندە ەلوردامىز وزگە جۇرت قىزىعاتىنداي اسەم شاھارعا اينالدى. قانشاما بيىك عيمارات بوي كوتەردى. سونىڭ بارلىعى تاۋەلسىزدىكتىڭ جەمىسى دەپ ايتۋعا بولادى, – دەدى ارمان تۇرلىبەك.
شارا سوڭىندا اۋدان باسشىسى ەرەن ەڭبەكتىڭ ۇلگىسىن كورسەتكەن مامانداردى العىس حاتپەن ماراپاتتاپ, باعالى سىيلىقتار تابىس ەتتى.
ورىنبەك وتەمۇرات
