كۇن رايىنىڭ قۇبىلمالدىلىعىنا بايلانىستى قازىر ەلوردادا ۆيرۋستىق اۋرۋلار ءورشىپ تۇر. اسىرەسە, تۇماۋدىڭ تارالۋى الاڭداتىپ وتىر. تۇماۋ ءجوتەلگەندە, تۇشكىرگەندە, ناۋقاس اداممەن سويلەسكەن كەزدە سىلەكەي مەن شىرىشتىڭ ۇساق بولشەكتەرى ارقىلى تارالادى.
كوپ ادامدار تۇماۋ مەن سۋىق ءتيۋدى ايى-را المايدى. تۇماۋ ۆيرۋسىندا ادامنىڭ دەنە قىزۋى جوعارىلاپ, بۇلشىق ەت پەن بۋىندار اۋىرادى, جوتەل كۇشەيەدى. بۇل سىرقات بويداعى ءارتۇرلى سوزىلمالى اۋرۋدى اسقىندىرىپ جىبەرۋىمەن قاۋىپتى. ۆيرۋس كۇشەيگەندە وكپەنىڭ توكسيكالىق ءىسىنۋى, پنەۆمونيا, ورتاڭعى قۇلاقتىڭ اسقىنۋى, قان قۇيىلۋ قاۋپى ارتۋى مۇمكىن.
بۇگىندە استانادا تۇماۋدىڭ ەپيدەميالىق ماۋسىمنىڭ باستالعالى 12268 جاعداي تىركەلگەن. زەرتحانالىق ساراپتامالاردىڭ ناتيجەسى بويىنشا, قاراشا ايىنىڭ ورتاسىنان پاراگريپپ, رەسپيراتورلىق-سينتسيتيالدى ۆيرۋس, رينوۆيرۋس جانە ادەنوۆيرۋس, بوكاۆيرۋس سياقتى تۇماۋ ەمەس ۆيرۋستاردىڭ, جەلتوقسان ايىنىڭ ورتاسىنان باستاپ قالامىزدىڭ ايماعىندا تۇماۋ ۆيرۋسىنىڭ A (H3N2) جانە ۆ ءتيپىنىڭ تسيركۋلياتسياسى انىقتالعان.
تىركەلگەن جرۆج جاعدايلارىنىڭ اراسىندا 14 جاسقا دەيىنگى بالالار 58 پايىزدى قۇرادى. جۇكتى ايەلدەردىڭ اراسىندا 596 جاعداي تىركەلگەن.
ۇزاق جىلدار بويى جۇكتى ايەلدەردىڭ اراسىندا تۇماۋ ءتارىزدى جۇقپامەن اۋىرعان جاعدايدىڭ ەسەبى جۇرگىزىلۋدە. 2009 جىلى بولعان اۆستراليا مەن جاڭا زەلانديانىڭ پاندەمياسى ءاناليزىنىڭ ناتيجەسىندە H1N1 تۇماۋ ۆيرۋسىن جۇقتىرعان 60 ايەلدىڭ 7 پايىزى بالاسىن ءولى تۋعان, 5 پايىزىندا بالا تۋعاننان كەيىن شەتىنەپ كەتكەن, ال 37 پايىز ايەل تۇماۋدىڭ كەسىرىنەن ۋاقىتىنان بۇرىن بوسانسا, ۆيرۋس جۇقتارعان ايەلدەن تۋعان نارەستەلەردىڭ 57 پايىزى ينتەنسيۆتى پالاتاعا تۇسكەن.
سوندىقتان اۋرۋدىڭ العاشقى بەلگىلەرى پايدا بولعاندا ۇيدە قالىپ, ءدارىگەردى شاقىرعان ءجون. مەديتسينالىق كومەككە دەر كەزىندە جۇگىنۋ, ناۋقاستى ساۋ ادامداردان وقشاۋلاۋ تۇماۋدىڭ الدىن الادى ءارى اسقىنۋدى بولدىرمايدى.
ەپيدەميالىق اۋرۋدىڭ ءورشۋ جاعدايىندا ۆيرۋس كونتسەنتراتسياسىن ازايتۋ ماقساتىندا ۇيدە جانە جۇمىستا بولمەنى ءجيى جەلدەتىپ تۇرۋ قاجەت. سۋىق ءتيۋدىڭ الدىن الۋ كەرەك. ويتكەنى ونداي كەزدە ادامنىڭ يممۋنيتەتى السىرەپ, اۋرۋعا تەز بوي الدىرعىش كەلەدى.
جيھاز, قابىرعا, ەدەنگە شاڭمەن تۇسكەن ۆيرۋستاردان قۇتىلۋ ءۇشىن بولمەنى ءجيى ىلعالدى شۇبەرەكپەن ءسۇرتىپ وتىرىڭىز. تاعام راتسيونىنا جەمىس-جيدەكتەردى كوبىرەك قولدانعان ءجون. سارىمساق پەن پيازدان باس تارتپاڭىزدار, ولاردىڭ قۇرامىندا ۆيرۋستار مەن باسقا ميكروورگانيزمدەردى ولتىرەتىن زاتتار بار.
اۋرۋدان تەزىرەك جازىلۋ ءۇشىن يممۋنيتەتتى كوتەرەتىن سپەتسيفيكالىق ەمەس ەمدىك زاتتاردى قولدانۋعا بولادى. ولاردىڭ قاتارىنا ينتەرفەرون يندۋكتورى (تسيكلوفەرون, اربيدول, تسيگوۆير, اميكسين); گومەوپاتيكالىق پرەپاراتتار (گريپپ-Flu, افلۋبين, ينفليۋتسيد, ساندرا); يممۋنومودۋلياتورلار (يممۋدون, يرس-19, برونحو-مۋنال); ەليميناتسيالىق ەم پرەپاراتتارى (جوعارعى تىنىس جولدارىنىڭ شىرىشتى قاباتىنان پاتوگەندى ميكروفلورانى مەحانيكالىق جولمەن تازالاۋ) – اكۆا-ماريس, پوليۆيتاميندەر, ۆيتام, وكسولين مايى جانە باسقالارى جاتادى.
ايگۇل ءجۇنىسوۆا,
استانا قالاسى تۇتىنۋشىلار قۇقىقتارىن قورعاۋ
دەپارتامەنتىنىڭ باس مامانى
