استانا قالاسى اكىمدىگىنە قاراستى «ومىرلىك قيىن جاعدايدا قالعان ادامداردى الەۋمەتكە قوسۋ ورتالىعى» مەكەمەسى – قۇجاتتارىن جوعالتىپ, ءۇيسىز-كۇيسىز جۇرگەن جاندارعا الەۋمەتتىك كومەك كورسەتەتىن بىردەن-ءبىر مەكەمە.
ءبىر ۋاقىتتا 180 ادامدى قابىلداۋعا قاۋقارلى مەكەمەدە جابىرقاۋ جانداردىڭ قۇجاتىن تۇگەندەپ, تىرشىلىككە قايتا بەيىمدەۋ ءۇشىن بارىنشا جاعداي قاراستىرىلعان. ماسەلەن, تازا توسەك-ورىن, جۋىناتىن بولمەلەردىڭ بارلىعى تالاپقا ساي. ءۇش ۋاقىت تاماق بەرىلەدى. سوعان وراي قىسى-جازى بۇل جەردەن كەلۋشىلەر قاتارى ۇزىلمەيتىن كورىنەدى. ونىمەن قوسا مەكەمەنىڭ 50 ورىندىق تۇنگى بولىمشەسى دە جۇيەلى تۇردە جۇمىس ىستەيدى ەكەن. مۇندا ادامداردى تاسىمالداۋعا ارنايى جابدىقتالعان كولىكتەر, ءورت قاۋىپسىزدىگىنىڭ دىبىستىق سيگناليزاتسياسى, 24 بەينەباقىلاۋ كامەراسى بار.
مەكەمە باسشىسى مۇرات قاريەۆتىڭ ايتۋىنشا, وتكەن جىلى مەكەمەگە 1685 ادام ءتۇسىپتى. ونىڭ 893-ءى استانالىق بولسا, 27-ءسى – شەتەلدىك, باسقالارى وزگە ءوڭىر ازاماتتارى بولعان. ال تۇنگى بولىمشەگە 7628 ادام قابىلدانىپتى (3897-ءسى – ەلوردالىق, 175-ءى – شەتەلدىك, قالعانى – باسقا ايماق تۇرعىندارى). وسى ادامداردىڭ 85-ءىنىڭ قۇجاتى قالپىنا كەلتىرىلىپتى. ال 114 ادام تۇرعىلىقتى جەرلەرىنە جىبەرىلسە, 110 ادام وتباسىلارىنا قايتارىلىپتى. سونىمەن قاتار 19 ادام «شاراپات» الەۋمەتتىك قىزمەت كورسەتۋ ورتالىعىنا جانە پسيحونەۆرولوگيالىق مەديتسينالىق-الەۋمەتتىك مەكەمەگە اۋىستىرىلسا, 10 ادامعا مۇگەدەكتىك توبى راسىمدەلىپتى. سونداي-اق 919 ادام فليۋوروگرافيالىق تەكسەرۋدەن ءوتىپ, ولاردىڭ 137-ءسىنىڭ وكپەسىندە وزگەرىس بار ەكەنى انىقتالىپ, 24-ءى تۋبەركۋلەز ديسپانسەرىنە, 92-ءسى ءتۇرلى سىرقاتپەن ستاتسيونارلىق ەمدەۋ مەكەمەلەرىنە جاتقىزىلىپتى.
– ءبىزدىڭ مەكەمە ماماندارىن دا اق حالاتتى ابزال جاندار سياقتى ادام جانىنىڭ اراشاشىسى بولۋعا لايىق مەيىرىمدى جۇرەكتەردىڭ توعىسقان ورتاسى دەپ ايتۋعا بولادى. ماماندارىمىز جىل سايىن بىلىكتىلىكتى ارتتىرۋ كۋرستارىنان ءوتىپ تۇرادى. قالانىڭ قوعامدىق ومىرىنە, سپورتتىق جانە مادەني شارالارىنا دا بەلسەندى تۇردە قاتىسادى. ومىرلىك قيىن جاعدايدا قالعان جاندارعا قول ۇشىن بەرۋىمىزگە قولداۋ كورسەتكەندەرگە شەكسىز ريزاشىلىعىمىزدى بىلدىرەمىز, – دەيدى مۇرات قاريەۆ.
ونىڭ سوزىنشە, وسىنداي جاندارعا الەۋمەتتىك قىزمەت كورسەتۋدە بىرقاتار ۇيىممەن ىنتىماقتاستىق تۋرالى 10 مەموراندۋمعا قول قويىلىپتى. 2012 جىلدان باستاپ «الەۋمەتتىك پاترۋل» ۇتقىر قىزمەتى مەن ديسپەتچەرلىك قىزمەت جۇمىستارى دا قولعا الىنعان. سونىمەن قاتار اتالمىش مەكەمە ەلورداداعى ءتورت اۋداننىڭ پوليتسيا پۋنكتتەرىمەن, مەديتسينالىق الەۋمەتتىك وڭالتۋ ورتالىعىمەن, استانا قالاسى ءىىد كوشى-قون پوليتسياسى باسقارماسىمەن تىعىز بايلانىستا جۇمىس جۇرگىزەدى ەكەن.
