قوبىز قۇدىرەتى
استاناداعى قازاق ۇلتتىق ونەر ۋنيۆەرسيتەتىنىڭ جامبىل اتىنداعى زالىندا حالىقارالىق جانە رەسپۋبليكالىق بايقاۋلاردىڭ لاۋرەاتى, قر مادەنيەت سالاسىنىڭ ۇزدىگى, قوبىزشى كەنجەگۇل مۇساەۆانىڭ «شابىت» اتتى شىعارماشىلىق كەشى ءوتتى.
كەنجەگۇل التى جاسىنان قاسيەتتى قوبىزدا وينايدى. كەيىن كاسىبي مۋزىكالىق ءبىلىم الىپ, ونەرى ورگە ءجۇزدى. بۇگىندە كوپشىلىككە تانىلعان تالانتتى ونەرپاز. ارينە, ونىڭ ەلوردادا ءوتىپ وتىرعان كەشى العاشقى ەمەس. ول بۇعان دەيىن ەكى رەت جەكە كونتسەرتىن وتكىزگەن. 2010 جىلى بەيبىتشىلىك جانە كەلىسىم سارايىندا وتكەن شىعارماشىلىق كەشىندە جۇرتشىلىق دارىندى قوبىزشىنىڭ سان قىرلى ونەرىن قىزىعىپ تاماشالاعان. مىنە, سودان بەرى دوپتاي دومالاپ جەتى جىل وتە شىقتى. ونەرپازدىڭ مۋزىكالىق رەپەرتۋارى دا مولايىپ, شاكىرتتەرى كوبەيىپ, سارا جولى دارالانا ءتۇستى.
ءبىر سوزبەن ايتقاندا, كونتسەرت جايماشۋاق كەيىپتە ءوتتى. كورەرمەندەر وتاندىق جانە شەتەلدىك كومپوزيتورلاردىڭ كلاسسيكالىق شىعارمالارىن تىڭداپ, ادەمى اسەرگە ءبولەندى. ەلوردا اكىمدىگىنىڭ مەملەكەتتىك اكادەميالىق فيلارمونياسىنىڭ قازاق وركەسترىمەن بىرلەسىپ كەش يەسى بىرنەشە مۋزىكالىق تۋىندىلاردى ورىندادى. اسىرەسە, قوبىزعا ارناپ تۇسىرگەن دينا نۇرپەيىسوۆانىڭ «ناۋاي» كۇيىن ءوزى كەلىستىرىپ وينادى. ءۇش شەكتى قوبىزبەن نۇرعيسا تىلەنديەۆتىڭ «اققۋ» كۇيىن توگىلدىردى. احمەت جۇبانوۆتىڭ «رومانسى» دا ءساتتى شىقتى. ۇستاز شاكىرتىمەن باعالى دەمەكشى, كەنجەگۇل مۇساەۆا جەتەكشىلىك ەتەتىن «نازەركە» قوبىزشىلار ءانسامبلىنىڭ مۇشەلەرى دە تاماشا ونەر كورسەتتى.
سونىمەن بىرگە, قر ەڭبەك سىڭىرگەن قايراتكەرى گۇلميرا سارينا كەنجەگۇلدىڭ اناسىنىڭ سوزىنە جازعان «تۋعان جەر» دەگەن ءانىن شىرقادى. شەرتپە كۇيدىڭ شەبەرى اتانعان جانعالي جۇزباەۆ سەكىلدى ونەر ورىندە بىرگە ءجۇرگەن ارىپتەستەرى دە مۇساەۆانىڭ مەرەيىن اسىردى.
قىسقاسى, كەشتە ونەر الەمىندە ءوز قولتاڭباسى بار دارىندى مۋزىكانتتىڭ شابىتى تاسىعان كۇن بولدى.
ازامات ەسەنجول