تاۋەلسىزدىكتىڭ 30 جىلدىعى اياسىندا ە.راحماديەۆ اتىنداعى نۇر-سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسىنا قاراستى «بويتۇمار» قوبىزشىلار كۆينتەتىنىڭ (كوركەمدىك جەتەكشىسى – مادەنيەت سالاسىنىڭ ۇزدىگى جانار قاسىموۆا) «تاۋەلسىزدىك سارىنى» اتتى كونتسەرتى ءوتتى.
كۆينتەت قۇرامىنداعى جانار ءجۇسىپوۆا, مادەنيەت سالاسىنىڭ ۇزدىگى بوتاگوز ءتاشىموۆا, حالىقارالىق بايقاۋلاردىڭ لاۋرەاتى جانار قاسىموۆا, رەسپۋبليكالىق بايقاۋلاردىڭ لاۋرەاتتارى اينۇر ءشارىپوۆا مەن اقنۇر باعيدۋللاەۆا قوبىز اتاسى قورقىتتىڭ كۇيلەرىنەن باستاپ ونەر ۇجىمىنا ارنايى جازىلعان شىعارمالاردى ورىندادى.
«شالقىما» حالىق بي ءانسامبلىنىڭ ءارتىسى اقبايان سەرىكقازينا مىڭ بۇرالعان بيلەردى بيلەدى. كەش قوناقتارى – قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى, پروفەسسور شاحيماردان ءابىلوۆ ۇلى ابايدىڭ اندەرىن شىرقاسا, وپەرا ءانشىسى ايزادا كاپونوۆا حالىق اندەرىن سالدى.
