قوعام پىكىرى ەسكەرىلەدى

Nur Otan پارتياسىنىڭ رەسپۋبليكالىق سايلاۋالدى شتابى وكىلدەرى الماتى جانە شىعىس قازاقستان وبلىستارىندا بولدى.

الماتى وبلىسىنىڭ «ينفراەنەرگو» ەلەكتروتەحنيكا ونىمدەرىن شىعاراتىن كاسىپورىن ۇجىمىمەن كەزدەسۋدە پارتيانىڭ وڭىرلىك سايلاۋالدى باعدارلاماسىنىڭ نەگىزگى باسىمدىقتارى تالقىلاندى. Nur Otan الداعى 5 جىلدا وڭىردە 134 مىڭنان استام جۇمىس ورنىن اشۋدى, 31 مىڭ ورىندى قۇرايتىن 80 جاڭا مەكتەپ سالۋ ارقىلى ءۇشاۋىسىمدى وقۋ ماسەلەسىن شەشۋدى, 120 اۋىلدىڭ 190 مىڭ تۇرعىنىن ساپالى اۋىزسۋمەن قامتاماسىز ەتۋدى, 72 دەنساۋلىق ساقتاۋ نىسانىن, سونداي-اق 120 مىڭنان استام پاتەر سالۋدى جوسپارلاپ وتىرعانىن ايتتى.
«ەلباسى, پارتيا كوشباسشىسى نۇرسۇلتان ­نازارباەۆ «ازاماتتارمەن ءاردايىم تىعىز بايلانىستا بولۋ – ءبىزدىڭ پارتيامىزعا كورسەتىلەتىن تاۋسىلماس حالىقتىق قولداۋدىڭ قاينار كوزى» دەپ اتاپ ءوتتى. جالپى, ۇگىت كەزەڭى باستالعاننان بەرى ءبىزدىڭ قوعامدىق قابىلداۋلارعا 56 مىڭنان استام ءوتىنىش ءتۇستى, ونىڭ ىشىندە 20 مىڭدايى – سايلاۋشىلاردىڭ ۇسىنىسى مەن اماناتى. ۇمىتكەرلەر مەن سەنىم بىلدىرىلگەن تۇلعالار 7,3 مىڭ قابىلداۋ وتكىزدى. حالىق تاراپىنان تۇسكەن بارلىق ءوتىنىش پەن امانات ەرەكشە پارتيالىق باقىلاۋعا الىنادى» دەدى پارتيانىڭ رەسپۋبليكالىق سايلاۋالدى شتاب جەتەكشىسى.
پارتيانىڭ ءباسپاسوز قىزمەتىنىڭ حابارلاۋىنشا, ازاماتتاردى الەۋمەتتىك قامتاماسىز ەتۋ – 22%, تكش – 17%, تۇرعىن ءۇي مەن جەر ۋچاسكەلەرىن ءبولۋ – 12%, جۇمىسقا ورنالاستىرۋ جانە ەڭبەك داۋلارى – 8%, دەنساۋلىق ساقتاۋ – 6%, ءبىلىم بەرۋ 5% جانە ت.ب. ماسەلەلەر تولعاندىرادى.
شتابتىڭ شىعىس قازاقستان وبلىسىندا بولعان ساپارىندا كوپبالالى, تولىق ەمەس, ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلاردى قولداۋ ماقساتىندا الەۋمەتتىك كاسىپكەرلىكتى, وتباسىن جۇمىسپەن قامتۋدى دامىتۋ بويىنشا شارالار تۇرعىسىندا ءتۇسىندىرۋ-ناسيحات جۇمىستارىن جۇرگىزدى.
«باقىتتى وتباسى» پارتيالىق جوباسى اياسىندا ءبىز تۇرمىستىق زورلىق-زومبىلىقتى ازايتۋ بويىنشا جۇيەلى شارالاردى قولعا الامىز. ەلدەگى ءاربىر قالا مەن اۋداندا وتباسىن قولداۋ, وتباسىلىق شيەلەنىستەردى شەشۋ جانە بالالى ايەلدەرگە ۋاقىتشا تۇرعىنجاي ۇسىنۋ ورتالىقتارى قۇرىلادى. بۇل رەتتە «وتباسىلىق-تۇرمىس­تىق زورلىق-زومبىلىققا قارسى ءىس-قيمىل تۋرالى» زاڭ قابىلدانىپ, وتباسىلىق سوتتار قۇرىلاتىن بولادى. ومىرلىك قيىن جاعدايعا تاپ بولعان وتباسىلار مەن بالالارعا اتاۋلى كومەك كورسەتۋ ءۇشىن «111 شۇعىل قىزمەت» جۇمىسى قامتاماسىز ەتىلەدى» دەدى پارتيا توراعاسىنىڭ ءبىرىنشى ورىنباسارى باۋىر­جان بايبەك.