ەلوردادا قالا كۇنىنە وراي تۇرعىنداردىڭ بوس ۋاقىتىن جايلى وتكىزۋى ءۇشىن باراەۆ كوشەسىندە جاڭا قوعامدىق كەڭىستىك اشىلدى. اشىلۋ سالتاناتىنا قالا اكىمى التاي كولگىنوۆ قاتىستى.
– نۇر-سۇلتان – جايلى قالا» ماستەر-جوسپارى اياسىندا بيىل 200-دەن استام اۋلا مەن قوعامدىق كەڭىستىك اباتتاندىرىلادى. ونىڭ ىشىندە 100-گە جۋىعى اشىلىپ, قالا تۇرعىندارى مەن قوناقتارىنىڭ يگىلىگى ءۇشىن پايدالانۋعا بەرىلدى. بۇگىن, ماسەلەن, جاڭا امفيتەاتر اشىلادى. وندا «استانا وپەرا» تەاترىنىڭ ارتىستەرى ونەر كورسەتەدى. كاسكادتى امفيتەاتر ساياباقتى ۇيلەسىمدى تۇردە جالعاي تۇسەدى جانە قالا تۇرعىندارىنىڭ دەمالاتىن ءارى شىعارماشىل جانداردىڭ تالانتىن پاش ەتەتىن ورىنعا اينالادى. قالا تۇرعىندارى اراسىندا مۇمكىندىگى شەكتەۋلى جانداردىڭ ءجۇرىپ-تۇرۋىنا كەدەرگى كەلتىرمەيتىن ورتا قۇرىلىپ, تروتۋارلار كەڭەيتىلدى, اۋماقتار كوگالداندىرىلدى, – دەدى ەلوردا اكىمى.
جاياۋ جۇرگىنشىلەر پرومەنادىندا بالالارعا ارنالعان ويىن الاڭدارى مەن اتكەنشەكتەر, ءوز ونەرىن كورسەتۋ ءۇشىن يمپروۆيزاتسيالانعان كورىنىستەرگە ساحنا, ەلەكتر اۆتوكولىكتەرىن زاريادتاۋعا ارنالعان ارنايى ورىندار جانە ت.ب. بار.
سونداي-اق قالانىڭ ءار اۋماعىنداعى تۇرعىن ءۇي الاپتارىندا ءتورت گۇلزار اشىلدى. سولاردىڭ ءبىرى – «ۇركەر» تۇرعىن الابىندا, دوسپامبەت جىراۋ جانە ايعىرجال كوشەلەرىنىڭ قيىلىسىندا ورنالاسقان.
– ەلوردا كۇنى جاڭا الەۋمەتتىك ماڭىزى بار نىسانداردى اشۋ جاقسى داستۇرگە اينالدى. ۋچاسكەنىڭ جالپى اۋدانى – 1,6756 گا. بەلسەندى تۇرعىنداردىڭ ءوتىنىشى بويىنشا يتتەردى سەرۋەندەتۋگە جانە جاتتىقتىرۋعا ارنالعان بولەك ايماق سالىندى. بۇگىن مەن ۇركەردىڭ قوعامدىق كەڭىستىگىن اشۋعا قاتىسقانىما قۋانىشتىمىن, – دەدى ەسىل اۋدانىنىڭ اكىمى اسىلبەك ەسەنباەۆ.
گۇلزار اۋماعىندا مەرەكەلىك ءىس-شارالاردى وتكىزۋگە ساحنا جانە قارت ادامداردىڭ دەمالۋى ءۇشىن جەكە تىنىش ايماق سالىنعان. 500-دەن استام اعاش مەن كوپجىلدىق گۇلدەر وتىرعىزىلعان. جاسوسپىرىمدەر ءۇشىن جۇگىرۋ جولى مەن فۋتبول امبەباپ الاڭى بار.
كوكتال-1 تۇرعىن الابىنداعى, اسپانديار كەنجين, اقىت ءۇلىمجىۇلى, دايراباي جانە مۇرات موڭكەۇلى كوشەلەرىنىڭ تورتتىگىندەگى گۇل باعى 1,0279 گا جەرگە جايىلدى. ونى سالۋ كەزىندە اۋدان تۇرعىندارىنىڭ قاجەتتىلىكتەرى ەسكەرىلگەن. الاڭ ءتورت ايماققا بولىنەدى: قارت ادامدارعا ارنالعان تىنىش, سپورتتىق, ويىن الاڭدارى بار بالالار جانە ۆورك-اۋت ترەناجەرلەرى بار ايماق.
ەلوردانىڭ تۋعان كۇنىندە اشىلعان تاعى ءبىر سكۆەر سارىارقا اۋدانىندا 187-كوشەدە ورنالاسقان. ول تەك وسى ايماقتىڭ تۇرعىندارى مەن بەلسەندىلەرىنىڭ ءوتىنىشى بويىنشا سالىنعان. ۋچاسكەنىڭ جالپى اۋدانى – 0,181 گا. تۇرعىنداردىڭ ءوتىنىشى بويىنشا اۆتوكولىكتەرگە ارنالعان تۇراق, سپورت الاڭى بار بەلسەندى ايماق, ورىندىقتارى بار تروتۋارلار جانە كوشە شامدارى سالىندى.
ەڭ كوپتەن كۇتكەن الاڭ «جەلەزنودوروجنىي» تۇرعىن الابىندا, يماناق كوشەسىنىڭ اۋدانىندا بولدى. بۇل اشىلۋ راسىمىنە قاتىسقان تۇرعىنداردىڭ سانىنان كورىندى. ونىڭ اۋماعىندا ۇلكەن ويىن الاڭى جانە ترەناجەرلەرى بار سپورت الاڭى بار. ساياباق اۋماعىندا 200-دەن استام اعاش, سونىمەن قاتار كوپجىلدىق گۇلزارلار جانە كوگالدار بار. قوعامدىق كەڭىستىكتەر ۋربانيستيكا ورتالىعى مەن اۋدان اكىمدىگى تۇرعىندارمەن بىرلەسىپ تالقىلاندى.
