كەشە استانا قالاسى ءماسليحاتىنىڭ كەزەكتى سەسسياسى ءوتتى. جيىنعا قاتىسقان قالا اكىمىنىڭ ورىنباسارى ەرلان بەكمىرزاەۆ كۇن تارتىبىندەگى نەگىزگى ماسەلە ەلوردا تۇرعىندارىنا قوعامدىق كولىك قىزمەتىن كورسەتۋ بويىنشا شارالار كەشەنىن ىسكە اسىرۋ تۋرالى باياندادى.
ونىڭ ايتۋىنشا, باس قالادا قوعامدىق كولىك قىزمەتىن جەتىلدىرۋ ۇزدىكسىز جانە كەشەندى تۇردە جۇرگىزىلىپ جاتىر. قازىر قالا تۇرعىندارىنىڭ 48 پايىزدان استامى اۆتوبۋسپەن قاتىنايدى. ولارعا 99 باعدار بويىنشا 6 اۆتوبۋس پاركى قىزمەت كورسەتەدى. 1110 اۆتوبۋستىڭ 1500-دەن اسا جۇرگىزۋشىسى بار.
وتكەن جىلى قوعامدىق كولىك جەلىسىن دامىتۋ بويىنشا ىستەلگەن جۇمىستار تۋرالى بايانداعان قالا باسشىسىنىڭ ورىنباسارى تۇرعىنداردىڭ سۇرانىسىنا ساي جاڭا باعدارلار ىسكە قوسىلىپ جاتقانىن ايتتى. سونىڭ ىشىندە تۇرعىن الاپتار تۇرعىندارىنا ەرەكشە كوڭىل بولىنگەن.
iKomek قىزمەتىنە قوعامدىق كولىك قىزمەتى بويىنشا اي سايىن 3 مىڭنان استام ءوتىنىش كەلىپ تۇسەتىنىن ايتقان ول سونىڭ ىشىندە ەڭ كوپ شاعىم اۆتوبۋستاردىڭ كەلۋ ينتەرۆالىنىڭ ساقتالماۋىنا بايلانىستى (34 پايىز) بولىپ وتىرعانىن جەتكىزدى. ءتيىستى جۇمىس جۇرگىزىلىپ جاتىر.
قالالىق ءماسليحات توراعاسى ەرلان كاناليموۆ جىل سايىن جولاقى تولەمەيتىن جولاۋشىلاردىڭ شىعىنى 2,8 ملرد تەڭگەنى, ال كادر تاپشىلىعى – 1000 ماماندى قۇرايتىنىن ايتىپ ءوتتى.
– سوڭعى رەت اۆتوبۋستاردى ساتىپ الۋ 2019 جىلى جۇرگىزىلدى. بيىل استانا قالالىق ءماسليحاتىنىڭ قولداۋىمەن 400 اۆتوبۋس ساتىپ الۋ تۋرالى شەشىم قابىلدانىپ, ونىڭ 55-ءى كەلدى. 6 جاڭا اۆتوبۋس باعىتىن اشۋ ماسەلەسى قاراستىرىلۋدا. وسىعان بايلانىستى حالىقارالىق تاجىريبەنى ەسكەرە وتىرىپ, اينالما مارشرۋتتاردى ەنگىزۋدى قاراستىرۋدى, ايالدامالاردىڭ سوڭعى پۋنكتتەرىن رەتكە كەلتىرۋدى, ءبىر مانداتتى وكرۋگتەر بويىنشا دەپۋتاتتاردىڭ پىكىرىن ەسكەرە وتىرىپ, ەلوردا اۋداندارىنداعى مارشرۋتتارعا جاڭا اۆتوبۋستاردىڭ بولىنۋىنە تالداۋ دايىنداۋدى تاپسىرامىن, – دەدى ءماسليحات توراعاسى.
ەرلان كاناليموۆ سونداي-اق مۇمكىندىگى شەكتەۋلى جاندارعا قوعامدىق كولىكتە قاتىناۋعا جايلى بولۋىنا ەرەكشە نازار اۋدارۋدى تاپسىردى. ال سەسسيا قورىتىندىسى بويىنشا قوعامدىق كولىك جۇمىسىنداعى ەسكەرتۋلەردى, شاعىمدار مەن كەمشىلىكتەردى جويۋ بويىنشا ءىس-شارالار جوسپارىن ازىرلەۋ تاپسىرىلىپ, جىل سوڭىندا جاۋاپتى ازاماتتار اتقارىلعان جۇمىستار تۋرالى ەسەپ بەرۋى كەرەكتىگى ايتىلدى.
