بۇگىندە استانادا 1140-تان اسا قوعامدىق كولىك قالا ىشىندەگى جولاۋشىلارعا قىزمەت كورسەتۋدە. بۇل تۋرالى باق وكىلدەرىنە ارنالعان ءباسپاسوز-تۋرىندا ءمالىم بولدى.
جاڭا مارشرۋتتار قوسىلدى
تىلشىلەر توبى ءباسپاسوز-تۋر بارىسىندا №1 جانە №3 اۆتوبۋس پاركتەرىنىڭ كولىك قۇرالدارىمەن جانە تەحنيكالىق ينفراقۇرىلىمدارىنىڭ جاعدايىمەن تانىسىپ, كاسىپورىنداردىڭ قىسقى ماۋسىمعا دايىندىقتارىن باقىلادى.
باق وكىلدەرىن تاسىمالداعان اۆتوبۋس الدىمەن №1 اۆتوبۋس پاركىنىڭ الاڭىنا ايالدادى. مەيمانداردى كەڭسە سىرتىنان قارسى العان «№1 اۆتوبۋستىق پاركى» اق باسقارما توراعاسى ءسابيت بولاتوۆ باق وكىلدەرىنە وزدەرىنىڭ جۇمىستارىن تانىستىرىپ ءوتتى. ال كاسىپورىننىڭ ءماجىلىس زالىنداعى جۋرناليستەرمەن كەزدەسۋگە «استانا LRT» جشس توراعاسىنىڭ ورىنباسارى بەيبىت ەسجانوۆ پەن IVECO Allur Auto استانا جوباسىنىڭ باسشىسى انتون مايەر قاتىستى. جيىندا العاشقى بولىپ ءسوز العان «استانا LRT» جشس توراعاسىنىڭ ورىنباسارى بەيبىت ەسجانوۆ مەملەكەت باسشىسىنىڭ «استانانىڭ جولاۋشىلار كولىگىن مودەرنيزاتسيالاۋ جانە جىلجىمالى قۇرامدى جاڭارتۋ تۋرالى» تاپسىرماسىنا سايكەس سوڭعى جىلدارى زاماناۋي اۆتوبۋستاردى ساتىپ الۋ بويىنشا تەندەرلەردىڭ ۇيىمداستىرىلعانىن اتاپ ءوتتى. ونىڭ ايتۋىنشا, استانالىق 9 جولاۋشى تاسىمالداۋشى كاسىپورىنعا تيەسىلى 1140-تان اسا اۆتوبۋستىڭ 738-ءى جەتەكشى IVECO BUS ەۋروپالىق كومپانياسىنىڭ زاماناۋي اۆتوبۋستارى ەكەن. جالپى, ەلورداداعى قوعامدىق كولىكتەردىڭ قىسقى ماۋسىمعا 100 پايىز دايىن ەكەنىن ايتقان بەيبىت ەسجانوۆ ءوز سوزىندە اتقارىپ جاتقان جۇمىستارى جايلى دا بايانداپ ءوتتى.
– قالاىشىلىك رەيستەرگە جاڭا مارشرۋتتار قوسىلدى. ماسەلەن, №47, 54 جانە 104 ەكسپرەسس اۆتوبۋستارى جولاۋشىلارعا قىزمەت كورسەتە باستادى. ال №100 ەكسپرەسس اۆتوبۋسى تەك ەكسپو كەزىندە عانا قولدانىسقا ەنگىزىلگەن ەدى. بىراق جولاۋشىلاردىڭ ءوتىنىشى بويىنشا ول ءارى قاراي دا قىزمەتىن جالعاستىراتىن بولادى. سول سياقتى قالا ماڭىنداعى ەلدى مەكەندەرگە قاتىنايتىن اۆتوبۋستاردىڭ دا قاتارى تولىقتى. مىسالى, استانا – قوسشى باعىتىنداعى №303 اۆتوبۋسىنىڭ ينتەرۆال ۋاقىتى 4 مينۋت بولسا دا, جولاۋشىسى وتە كوپ. سوندىقتان «لەسنايا پولياناعا» دەيىن تاڭەرتەڭ جانە كەشكىلىك ۋاقىتتاردا جۇرەتىن قوسىمشا №301 اۆتوبۋسىن قوسۋعا تۋرا كەلدى. ويتكەنى, اسىرەسە, تاڭەرتەڭگىلىك ۋاقىتتا قوسشىدان شىققان جولاۋشى تولى اۆتوبۋستار «لەسنايا پولياناعا» توقتاماي ءوتىپ كەتەدى ەكەن. تۇرعىنداردان كەلىپ تۇسكەن وتىنىشتەردى ەسكەرە وتىرىپ, وسىنداي شەشىم قابىلدادىق. قازىر جاعداي رەتتەلدى, – دەيدى ب.ەسجانوۆ.
جولاۋشىلارعا جايلى اۆتوبۋستار
ال «№1 اۆتوبۋستىق پاركى» اق باسقارما توراعاسى ءسابيت بولاتوۆ ءوزى باسقارىپ وتىرعان كاسىپورىن جايلى كەڭىنەن اڭگىمەلەدى.
– ەلورداداعى جولاۋشى تاسىمالداۋدىڭ 40 پايىزى – ءبىزدىڭ ەنشىمىزدە. جالپى,
№1 اۆتوبۋستىق پارك 1974 جىلى قۇرىلعان. ول كەزدەگى تسەلينوگراد قالاسىندا جولاۋشى تاسىمالداۋمەن اينالىساتىن ەكى كاسىپورىن عانا بولاتىن. قازىرگى ۋاقىتتا ءبىزدىڭ كاسىپورىندا 1500 ادام جۇمىسپەن قامتىلعان. ونىڭ 1200-ءى – جۇرگىزۋشى مەن كوندۋكتور. شىندىعىندا, جۇرگىزۋشىلەر جەتىسپەيدى. ويتكەنى جۇرگىزۋشىلەرگە جوعارى تالاپ قويامىز. جۇمىسقا جاسى 25-تەن جوعارى, تاجىريبەلى مامانداردى عانا قابىلدايمىز. ءبىز ەڭ الدىمەن جولاۋشىلاردىڭ قاۋىپسىزدىگىنە ءمان بەرەتىندىكتەن, جۇرگىزۋشىلەردى قاتاڭ سىناقتان وتكىزىپ بارىپ الامىز. مىسالى, بىزگە جۇمىسقا ورنالاسقىسى كەلەتىندەردىڭ بارلىعى ەڭ ءبىرىنشى كەزەكتە پسيحولوگيالىق تەست, ودان كەيىن جول ەرەجەسى تۋرالى ەمتيحان تاپسىرادى. وسىلاردان وتكەن سوڭ ەكى اپتالىق تاجىريبەسى تاعى بار. سودان سوڭ بارىپ قانا ءوز بەتىنشە اۆتوبۋستى جۇرگىزۋ قۇقىعىنا يە بولادى, – دەگەن ءسابيت بولاتوۆ, – 5 جۇرگىزۋشىمىز فرانتسيادان وقۋ كۋرسىن ءتامامداپ كەلدى. ولار قازىر ينسترۋكتور بولىپ قىزمەت اتقارۋدا. جالپى, كۇنىنە جولاۋشىلارعا قىزمەت كورسەتۋگە 350-360 اۆتوبۋس جونەلتىلەدى. ارينە, جۇرگىزۋشىلەر مەن كوندۋكتورلارعا ارىز-شاعىم جوق ەمەس. شاعىمدانۋشىلار بۇرىن ديسپەتچەرگە حابارلاساتىن. قازىر ارنايى call-ورتالىق جۇمىس ىستەيدى. سول ارقىلى قانداي ارىز-شاعىمدار ءتۇسىپ جاتقانىن انىقتاپ, شارا قولدانىپ وتىرامىز, – دەيدى.
مامانداردىڭ سوزىنە ءسۇيەنسەك, ەلىمىزدە قۇراستىرىلاتىن فرانتسۋز اۆتوبۋستارى – جولاۋشىلار ءۇشىن وتە جايلى. ەدەنى تومەن ورنالاسقان, كىرىپ-شىعۋ دا ىڭعايلى. اينەكتەرى ەكى قاباتتان بولسا, ورىندىقتىڭ جىلىتقىشى تاعى بار. قۇددى ءبىر سپورتتىق اۆتوكولىك دەرسىڭ. اۋانى جىلىتقىش-سالقىنداتقىش كونديتسيونەر مەن 8 بەينەكامەرا ورناتىلعان. سونىمەن قاتار, اۆتوبۋس مۇمكىندىگى شەكتەۋلى جاندارعا دا ىڭعايلى ەتىپ جاسالعان. جولاۋشىلار كىرەتىن ەسىگىنە قولمەن باسقارىلاتىن پاندۋس قويىلعان. ءارى قاجەت بولسا, اۆتوبۋس ايالداماعا قاراي قيسايا الادى ەكەن. جالپى, جوعارى ستاندارتتارعا يە جاڭا اۆتوبۋستارعا ەڭ ۇزاعى 8 جىل كەڭەيتىلگەن كەپىلدىك بەرىلىپتى.
– IVECO اۆتوبۋستارى قىتاي جانە رەسەي وندىرىسىندەگى كولىكتەرگە قاراعاندا ءبىرشاما قىمبات تۇرادى. الايدا ەۋروپالىق اۆتوبۋستار, ونىڭ ىشىندە IVECO اۆتوبۋستارى, ۇزاعىراق پايدالانۋعا جارامدى. مىسالى, رەسەي مەن قىتاي اۆتوبۋستارىنىڭ رەسۋرسى شامامەن 150 مىڭ شاقىرىمدىق جول جۇرۋگە, ياعني ەكى-ءۇش جىلعا عانا جاراپ, قازىرگى ۋاقىتتا پايدالانۋدان شىعارىلىپ تاستالدى. ال IVECO اۆتوبۋستارى – بۇل باعالار مەن ەۋروپالىق ساپانىڭ وڭتايلى قاتىناسى, – دەيدى IVECO Allur Auto استانا جوباسىنىڭ باسشىسى انتون مايەر.
جولاقى قىمباتتاۋى مۇمكىن
№1 اۆتوبۋس پاركىنەن سوڭ جۋرناليستەر توبى №3 اۆتوبۋس پاركىنە ات باسىن تىرەدى. كاسىپورىن باسشىسى باۋىرجان تىلەۋبەرگەنوۆ باق وكىلدەرىنە ءوز جۇمىستارىن كەڭىنەن تانىستىردى. اتالمىش كاسىپورىندا 450-دەن استام ادام جۇمىسپەن قامتىلعان. كۇندەلىكتى 120 اۆتوبۋس جولاۋشىلاردى تاسىمالدايدى. 85 اۆتوبۋس IVECO اۆتوبۋسىمەن جاڭارتىلىپتى. ونىڭ 50-ءى قالاىشىلىك اۆتوبۋستار بولسا, 35-ءى – ەكسپرەسس اۆتوبۋستار. جەكەمەنشىك كاسىپورىن باسشىسى ماماندارىنىڭ بىلىكتىلىگىن ارتتىرۋ ءۇشىن ۇنەمى شەتەلدەرمەن تاجىريبە الماسىپ وتىراتىنىن ايتادى. كۇندەلىكتى ماي اۋىستىرۋ, جوندەۋ جۇمىستارى №3 اۆتوپارك بازاسىندا جۇزەگە اسىرىلادى. مۇنداعى اۆتوبۋس جۇرگىزۋشىسىنىڭ جالاقىسى 350 مىڭ تەڭگە بولسا, كوندۋكتوردىڭ ورتاشا جالاقىسى 150 مىڭ تەڭگەدەن كەم بولمايدى ەكەن.
– قىزمەتكەرلەرىمنىڭ جالاقىسىن ءالى دە كوبەيتكىم كەلەدى. بىراق جانار-جاعارماي مەن سايمانداردىڭ باعاسى قىمباتتاپ بارادى. وسى ماسەلە بىرجاقتى بولىپ, كەرىسىنشە, جولاقىسىن قىمباتتاتسا, مىندەتتى تۇردە ماماندارىمىزدىڭ جالاقىسى ارتاتىن بولادى. ياعني, جولاقىنىڭ ەلەكتروندىق تولەۋ جۇيەسى – 90 تەڭگە, ال قولما-قول تولەۋ 150 تەڭگە بولسا دەگەن ۇسىنىسىمىزدى بىلدىردىك. بۇل جۇيە الماتى قالاسىنىڭ تاجىريبەسىندە بار. ال ەۋروپا ەلدەرىندە بۇرىننان سولاي, – دەيدى باۋىرجان تىلەۋبەرگەنوۆ.
