استانا قالاسىندا قوعامدىق قاۋىپسىزدىك پەن قۇقىقتىق ءتارتىپتى قورعاۋدى قامتاماسىز ەتۋ شارالارى ماسەلەسى بويىنشا «قىلمىسپەن كۇرەس جانە زاڭ بۇزۋشىلىقتىڭ الدىن الۋ شارالارىن جۇزەگە اسىرۋ بارىسىندا قۇقىق قورعاۋ ورگاندارى قىزمەتىنىڭ ناتيجەسىن كوتەرۋ» تاقىرىبىندا دوڭگەلەك ۇستەل وتىرىسى ءوتتى.
ءماسليحاتتىڭ كەزەكتى سەسسياسىنا دايىندىق اياسىندا وتكىزىلگەن شاراعا استانا قالاسى ءماسليحاتىنىڭ حاتشىسى جانات نۇرپەيىسوۆ, قالا اكىمىنىڭ ورىنباسارى اندرەي لۋكين, ەلوردالىق قۇقىق قورعاۋ ورگاندارى دەپارتامەنتتەرى مەن باسقارمالارىنىڭ باسشىلارى, قوعامدىق بىرلەستىكتەردىڭ وكىلدەرى قاتىستى.
كەزدەسۋ بارىسىندا ەلوردالىق ىشكى ىستەر دەپارتامەنتىنىڭ باستىعى, پوليتسيا گەنەرال-مايورى امانتاي اۋباكىروۆ ءماسليحاتتىڭ قۇقىق قورعاۋ سالاسىنداعى بولىپ جاتقان بارلىق وقيعالاردان حاباردار بولعانىنىڭ ماڭىزدىلىعىنا توقتالىپ, الداعى ۋاقىتتا دا بىرلەسە جۇمىس جاساۋعا دايىندىعىن ءبىلدىردى.
استانا قالاسى ءىىد باسشىسىنىڭ ورىنباسارى باتىرلان ەسەنباي قوعامدىق ءتارتىپتى ساقتاۋ, ازاماتتاردىڭ قاۋىپسىزدىگىن قامتاماسىز ەتۋدەگى اتقارىلعان جۇمىستاردىڭ ءبىرقاتارىمەن تانىستىردى. ول ەلوردادا وتكىزىلەتىن الدىن الۋ ءىس-شارالارىنا شولۋ جاسادى. اتاپ ايتقاندا, قالاداعى جەدەل جانە قوعامدىق-ساياسي احۋالعا ۇنەمى مونيتورينگ جۇرگىزىلەدى, قۇقىق بۇزۋشىلىق پروفيلاكتيكاسى جانە قىلمىسقا قارسى كۇرەس بويىنشا ءىىد بارلىق بولىنىستەرى, جەرگىلىكتى پوليتسيا قىزمەتى, ۇلتتىق ۇلان اسكەرلەرى جۇمىلدىرىلادى. باس قالامىزدىڭ تىنىشتىعىن تاۋلىك سايىن ۇلتتىق ۇلان اسكەرلەرىن قوسقاندا ءبىر جارىم مىڭ پوليتسيا قىزمەتكەرى قاداعالايدى.
ودان كەيىن ءماسليحات دەپۋتاتى زاۋرە ءجۇسىپوۆا ءسوز الىپ, ەلوردالىق قۇقىق قورعاۋ وكىلدەرىنىڭ الەۋمەتتىك جاعدايىنا قاتىستى ماسەلەلەرگە توقتالدى. ال دەپۋتات مۇحتار تولەۋتاەۆ ەسىرتكىگە قارسى كۇرەس شارالارىنىڭ ماڭىزدىلىعىنا قاتىسۋشىلاردىڭ نازارىن اۋداردى.
قالا اكىمىنىڭ ورىنباسارى اندرەي لۋكين كوتەرىلگەن ماسەلەلەردىڭ وزەكتىلىگىنە ءمان بەرىپ, ونى شەشۋ ءۇشىن قاراستىرىلىپ جاتقان جوبالارعا توقتالدى. ءماسليحات دەپۋتاتتارى قۇقىقتىق ءتارتىپتى كۇشەيتۋ بويىنشا وڭ ناتيجەگە جەتۋگە ىقپال ەتەتىن بارلىق تەتىكتەردى قولدانىپ, الداعى ۋاقىتتا وسى سالانىڭ قىزمەتى باستى نازاردا بولىپ, جان-جاقتى قولداۋ كورسەتىلەدى دەگەن توقتامعا كەلدى.
ايگۇل ۋايسوۆا
