قالالىق ءماسليحاتتىڭ زاڭدىلىق, قۇقىق ءتارتىبى جانە قوعاممەن جۇمىس ماسەلەلەرى جونىندەگى تۇراقتى كوميسسياسىنىڭ مۇشەلەرى ىشكى ىستەر دەپارتامەنتىندە بولىپ, ەلورداداعى قوعامدىق ءتارتىپ ساقشىلارىنىڭ جۇمىسىمەن تانىستى.
ن.مەششەرياكوۆتىڭ توراعالىق ەتۋىمەن وتكەن كوشپەلى ماجىلىستە حالىق قالاۋلىلارى الدىمەن استانا قالاسى ىشكى ىستەر دەپارتامەنتىنىڭ باستىعى, پوليتسيا گەنەرال-مايورى امانتاي اۋباكىروۆتى ەل تاۋەلسىزدىگىنىڭ 22 جىلدىعى قارساڭىندا ەگەمەن ەلىمىز بەن ەڭسەلى ەلوردامىزدى دامىتۋعا قوسقان ۇلەسى ءۇشىن قر پرەزيدەنتى اتىنان العان مەملەكەتتىك ناگراداسىمەن قۇتتىقتادى. دەپۋتات ساپار احمەتوۆ بولسا, «نۇر وتان» پارتياسى ءتوراعاسىنىڭ ءبىرىنشى ورىنباسارى ب.بايبەكتىڭ اتىنان العىس حات تاپسىردى.
ودان ءارى دەپارتامەنت باستىعىنىڭ ورىنباسارى, پوليتسيا پولكوۆنيگى ب.ەسەنباي ەلوردادا قوعامدىق ءتارتىپتى نىعايتۋ جانە قىلمىستىلىقتىڭ الدىن الۋدى كۇشەيتۋ بويىنشا جۇرگىزىلىپ جاتقان جۇمىستارعا توقتالدى.
ەلباسى ءوزىنىڭ جىل سايىنعى قازاقستان حالقىنا جولداۋىندا وسى ماسەلەگە ەرەكشە كوڭىل ءبولىپ كەلەدى. بۇل رەتتە اتالمىش دەپارتامەنت مەملەكەت باسشىسى جۇكتەگەن مىندەتتەردى بارىنشا ساپالى ءارى جەدەل جۇزەگە اسىرۋ باعىتىندا باس قالادا ءتارتىپ پەن تازالىق ورناتۋعا بارىنشا ماڭىز بەرۋدە. سالا قىزمەتكەرلەرى قوعامدىق ءتارتىپتى ساقتاۋدا, ازاماتتاردىڭ كونستيتۋتسيالىق قۇقىعى مەن بوستاندىعىن قورعاۋدا بارلىق كۇش-جىگەرلەرىن سالىپ ءجۇر. اڭگىمەنى وسىدان باستاعان ورىنباسار بۇگىنگى تاڭدا اتقارىلىپ جاتقان شارالاردىڭ بارلىعى «ەكسپو-2017» حالىقارالىق مامانداندىرىلعان كورمەسىنە دايىندىق جانە ونى وتكىزۋگە وراي قالادا قاۋىپسىزدىكتى قامتاماسىز ەتۋگە باعىتتالعانىن جەتكىزدى. راسىندا, قازىرگى تاڭدا قالادا ءتارتىپ بۇزۋشىلىقتاردىڭ الدىن الۋ ماقساتىندا اتقارىلىپ جاتقان جۇمىس از ەمەس. سونىڭ ىشىندە, ۇساق بۇزاقىلىقتار, قوعامدىق ورىندا ىشىمدىك ءىشۋ, تەمەكى شەگۋ, شەمىشكە شاعۋ, قوقىس تاستاۋ, كوپشىلىك ورىنداردى ءبۇلدىرۋ, وزگەلەردىڭ تىنىشتىعىن بۇزۋ سىندى فاكتورلارمەن كۇرەس كۇشەيتىلگەن. كوشەلەردە ورناتىلعان بەينەكامەرالاردىڭ وسىنداي زاڭ بۇزۋشىلاردى انىقتاۋعا پايداسى زور. وتكەن جىلدىڭ قورىتىندىسى بويىنشا 43 مىڭ ءتارتىپ بۇزۋشىلىق انىقتالسا, بۇگىنگى تاڭدا ولاردىڭ سانى 53 مىڭنان اسىپ وتىر, ونىڭ 355-ىنە قاماۋعا الۋ تۇرىندە اكىمشىلىك شارا قولدانىلعان. سونداي-اق, جەرگىلىكتى اتقارۋشى ورگاندارمەن بىرلەسە وتىرىپ, ءوز اۋماقتارىن اباتتاندىرماعان ۇيىمدار, اتاپ ايتساق, 89 پيك جەتەكشىسى, 67 مەردىگەر ۇيىم مەن 202 قۇرىلىس نىسانى جاۋاپكەرشىلىككە تارتىلدى.
دامىعان قوعام بارلىق جەردە ءتارتىپ ورناتۋدان باستالاتىنىن ەسكەرە كەلە, بايانداماشى وسى سالادا كادرلاردىڭ تۇراقتامايتىندىعىن, اسىرەسە, ۋچاسكەلىك ينسپەكتورلاردىڭ جەتكىلىكسىزدىگىن ايتا كەلە, قۇقىق قورعاۋ ورگاندارى قىزمەتكەرلەرىن الەۋمەتتىك قولداۋ ماسەلەسىن كوتەردى. سونىمەن بىرگە امبەباپ پوليتسەيلەردىڭ جۇمىسىنا دا توقتالدى.
سىرتتان اعىلۋشىلار قاتارىنىڭ كوبەيۋىنە بايلانىستى قىلمىستىڭ ءوسۋى, تۇرعىلىقتى جەرى جوق, كوشە كەزىپ, تىلەمشىلىككە سالىنعان ادامدار اراسىنداعى قۇقىق بۇزۋشىلىقتاردىڭ الدىن الۋ جۇمىستارىنىڭ جەتكىلىكسىزدىگى حالىق قالاۋلىلارىن بەي-جاي قالدىرا المادى. سونىمەن قاتار, دەپۋتاتتار جاڭادان سالىنعان تۇرعىن ءۇي كەشەندەرى اۋماعىنا بەينەباقىلاۋ كامەرالارىن ورناتۋ جانە تۇرعىن ءۇي كەشەندەرىن سالۋ كەزىندە جەراستى پاركينگتەرىن قاراستىرۋدى ۇسىندى.
