ەلباسىنىڭ ۇكىمەت الدىنا ۇنەمى العا قوياتىن مىندەتتەرىنىڭ ءبىرى – باس شاھار استانانى ينتەللەكتۋالدى جانە زاماناۋي قالالاردىڭ الدىڭعى قاتارىنا شىعارۋ. بۇگىندە «ەحرو 2017» كورمەسىمەن تىعىز بايلانىستى «اقىلدى قالا» پرينتسيپى ورىستەپ, يننوۆاتسيا ارقىلى قالا تۇرعىندارىنىڭ ءومىرىن جەڭىلدەتىپ كەلەدى. سونىڭ ايقىن دالەلى رەتىندە بيىل قالا اكىمدىگىنە قاراستى «استانا Innovations» اق جانە «استانا LRT» كومپانياسى يگىلىگى مول ءموبيلدى قوسىمشالار جۇمىسىن قولعا العان.
سان سالالى «Smart Astana»
جىل باسىندا «استانا Innovations» اكتسيونەرلىك قوعامى «Smart Astana» ءموبيلدى قوسىمشاسىن ىسكە قوستى. ازىرگە بۇل – جوبانىڭ بەتا-نۇسقاسى, ياعني تيىمدىلىگىن سىناۋ كەزەڭى.
جوبا جەتەكشىلەرى ەڭ الدىمەن ءبىلىم باسقارماسىمەن بىرىگە وتىرىپ قالا مەكتەپتەرىندە ءتۇسىندىرۋ جۇمىستارىن جۇرگىزەدى. ناتيجەسىندە جاڭا قوسىمشانى العاشقىلاردىڭ ءبىرى بولىپ استانالىق وقۋشىلاردىڭ اتا-انالارى پايدالانعان ەدى. اتالمىش قوسىمشا اۋا رايىنا بايلانىستى ساباقتىڭ توقتاتىلۋى جونىندە push-حابارلامانى لەزدە تاراتۋىمەن ءتيىمدى ەكەنىن دالەلدەيدى. ءبىرىنشى اۋىسىمدا وقيتىن وقۋشىلار ساباقتىڭ بولمايتىندىعىنان تاڭعى 5-تە, ال ەكىنشى اۋىسىمداعىلار ساعات 11-دە قۇلاقتاندىرىلدى. سونىڭ ارقاسىندا اتا-انالاردىڭ تولاسسىز قوڭىراۋلارى دا ەداۋىر ازايعان دەيدى مەكتەپ باسشىلارى. وسىلايشا, «Smart Astana» ءموبيلدى قوسىمشاسى ءوز وزەكتىلىگىن بىردەن بايقاتادى. ءتۇسىندىرۋ جۇمىستارىنىڭ ەكىنشى كۇنىنەن-اق قوسىمشانى 18 مىڭ ادام جۇكتەسە, بۇگىندە قولدانۋشىلار سانى 50 مىڭنان اسىپ جىعىلدى. الايدا, بەتا-نۇسقا قىزمەتتەرى مۇنىمەن شەكتەلمەيدى. استانا قالاسى اكىمدىگىنە قاراستى باسقارمالاردىڭ شۇعىل حابارلاندىرۋىنان بولەك, «Smart Astana» ءموبيلدى قوسىمشاسى بۇگىندە قالا تۇرعىندارىن ماڭىزدى 9 قىزمەت بويىنشا اقپاراتتاندىرىپ وتىر.
ماسەلەن, قولدانۋشىلاردىڭ «Smart tickets» ارقىلى ەلوردادا وتەتىن مادەني جانە سپورتتىق شارالاردىڭ بيلەتىنە ونلاين تۇرىندە تاپسىرىس بەرۋ مۇمكىندىگى قاراستىرىلعان. سونداي-اق, ءار جۇرگىزۋشى كولىك ءنومىرى مەن تىركەلۋ كۋالىگىنىڭ مالىمەتتەرىن جازىپ, وزىنە تاعىلعان ايىپپۇل ءمولشەرىن تەكسەرە الادى. ۇشاقتار مەن جولاۋشى تاسىمالدايتىن قالاارالىق اۆتوبۋستاردىڭ كەستەسى دە ونلاين رەجيمدە كورسەتىلەدى.
«استانا Innovations» اق ءباسپاسوز قىزمەتىنىڭ ايتۋىنشا, قالا تۇرعىندارى ءموبيلدى قوسىمشانىڭ «بايلانىس-ورتالىعى» ءبولىمىن بەلسەنە قولدانادى. قالا ومىرىنە بەي-جاي قارامايتىن ازاماتتاردىڭ بارشىلىعى قۋانتادى. استانالىقتار كوشەدەگى قاقپاعى جابىلماعان قۇدىق, تۇرعىن ءۇيدىڭ كىرەبەرىسىندە كۇيىپ كەتكەن شام, جارىلعان قۇبىر سەكىلدى كوممۋنالدىق-تۇرمىستىق سيپاتتاعى ماسەلەلەردى حابارلاپ, دەرەۋ جونگە كەلتىرۋدى سۇرايدى. مۇنداي وتىنىشتەر 109, ياعني, استانا قالاسىنىڭ ينتەللەكتۋالدىق بايلانىس ورتالىعىندا تىركەلىپ, ءوتىنىش بىلدىرۋشىگە ورىندالۋ ۋاقىتىنا سايكەس جاۋابى بەرىلەدى.
«Smart Astana» ءموبيلدى قوسىمشاسىنىڭ تولىق, ياعني, الفا-نۇسقاسى الداعى ۋاقىتتا, ناقتىراق, كوكتەمدە ىسكە قوسىلادى دەپ كۇتىلۋدە. بۇل جولى ءموبيلدى قوسىمشا «Play Market» قانا ەمەس, كوپشىلىكتىڭ سۇراۋى بويىنشا «App Store» ارقىلى دا جۇكتەلەتىن بولادى. الفا-نۇسقا قازاق تىلىندە دە ازىرلەنىپ, «مەنىڭ وتىنىشتەرىم», «ۋچاسكەلىك ينسپەكتورىم», «ۋچاسكەلىك دارىگەرىم» جانە قازاقشا-ورىسشا, ورىسشا-قازاقشا «ەلەكتروندى سوزدىك» قىزمەتتەرىمەن تولىعادى. سونداي-اق, «ەحرو 2017» حالىقارالىق كورمەسىنە وراي, «Smart Astana» ءموبيلدى قوسىمشاسىنىڭ اعىلشىنشا نۇسقاسىن جاساۋ جوسپارلانۋدا. بۇل شەت ەلدەن كەلەتىن قوناقتارعا استانا جايلى كەڭ ءارى كەرەكتى ماعلۇمات بەرەتىن اسا قۇندى انىقتاما بولارى انىق.
كولىك كۇتكەنگە كومەگى كوپ
2016 جىلى قالالىقتاردىڭ قولىن ۇزارتقان قوسىمشانىڭ تاعى ءبىرى – «Astra bus». قالا اۆتوبۋستارىنىڭ جۇرگەن جەرىن ناقتى ۋاقىت رەجيمىندە انىقتايتىن بۇل قوسىمشا 15 قاڭتاردا جاڭارتىلعان ەدى. ستاتيستيكالىق دەرەكتەرگە سۇيەنسەك, سول كەزدەن بەرى Play Market جانە ارر Store ارقىلى اتالمىش قوسىمشانى 103 مىڭنان اسا قولدانۋشى جۇكتەگەن. ونىڭ ىشىندە قىرىق مىڭعا جۋىعى «Astra bus» قىزمەتىن بەلسەندى پايدالانادى.
اتاپ وتكەن ءجون, ءموبيلدى قوسىمشادا كارتا بويىنشا ونلاين-رەجيمدە قوزعالاتىن اۆتوبۋستار قىزىل سىزىقپەن بەلگىلەنگەن. ءار جولاۋشى كەرەكتى باعداردى ءبىلىپ قانا قويماي, قاجەت اۆتوبۋستىڭ قاي جەردە كەلە جاتقانىن وڭايلىقپەن باقىلاۋ مۇمكىندىگىنە يە. بۇل ايالداماعا شىعار ۋاقىتتى جوسپارلاۋعا كومەكتەسەدى. ال, قاجەتتى مەكەنجايعا نەشىنشى اۆتوبۋس جۇرەتىنىن بىلمەگەن ادامدار كارتادان تيىسىنشە ا جانە ب پۋنكتىن بەلگىلەسە نەمەسە ءوزى تۇرعان ايالداما مەن تۇسەتىن ايالدامانى ەنگىزسە, باعدارلاما اۆتوماتتى تۇردە سول باعىتتا قوزعالاتىن اۆتوبۋستار ءتىزىمىن شىعارادى.
«Astra bus» ءموبيلدى قوسىمشاسىنىڭ قىزمەتتەرىن كەڭەيتىپ, ودان ءارى جەتىلدىرۋ ماقساتىنداعى جۇمىستار جۇيەلى تۇردە جۇرگىزىلۋدە. استانا قالاسى جولاۋشىلار كولىگى جانە اۆتوموبيل جولدارى باسقارماسىنىڭ جانىنداعى «استانا LRT» كومپانياسى ءموبيلدى قوسىمشا جۇمىسىن قازاق, ورىس جانە اعىلشىن تىلىندە دايىنداۋ ۇستىندە.
ءمادينا جاقىپ
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
