ەلوردا كۇنى قارساڭىندا نۇر-سۇلتان قالاسىندا كەزەكتە تۇرعان الەۋمەتتىك وسال توپتار ساناتىنا جاتاتىن تۇرعىندارىنا پاتەر كىلتتەرى بەرىلدى. بۇل پاتەرلەر «نۇرلى جەر» مەملەكەتتىك تۇرعىن ءۇي قۇرىلىسى باعدارلاماسى اياسىندا «حالىقتىڭ الەۋمەتتىك وسال توپتارى» ساناتى ءۇشىن ساتىپ الۋ قۇقىعىنسىز جالعا بەرىلدى.
«نۇرلى جەر» باعدارلاماسى اياسىندا بەرىلگەن بۇل پاتەرلەردىڭ كىلتتەرىن نۇر-سۇلتان قالاسى اكىمىنىڭ ورىنباسارى نۇرلان نۇركەنوۆ تابىستادى. «نۇر-سۇلتان قالاسى اكىمى التاي كولگىنوۆتىڭ اتىنان سىزدەردى ەلوردا كۇنىمەن شىن جۇرەكتەن قۇتتىقتايمىن. مەملەكەت باسشىسى قاسىم-جومارت توقاەۆتىڭ تاپسىرماسىمەن «نۇرلى جەر» باعدارلاماسى اياسىندا وسى تۇرعىن ءۇي كەشەنى سالىندى. بۇل اۋداندا جاڭادان مەكتەپتەر, تۇرعىن ۇيلەر سالىنادى. قونىستارىڭىز قۇتتى بولسىن. ۇيلەرىڭىز قۋانىشقا, شاتتىققا تولسىن» دەدى اكىم ورىنباسارى.
باسپانالى بولعان تۇرعىنداردىڭ ءبىرى – ءاليا سامەنوۆا. «التىن القا» يەگەرى بۇل پاتەردى الۋ ءۇشىن 15 جىل كەزەكتە تۇرعان. «ءۇي كەزەگىندە تۇرىپ, كوپتەن كۇتكەن پاتەرىمە قول جەتكىزدىم. وسىنداي مۇمكىندىك جاساپ, ەلەپ-ەسكەرىپ جاتقان قالا اكىمشىلىگىنە العىسىمدى بىلدىرەمىن. ءبىز ءۇشىن باسپانا باستى ماسەلە عوي. وتە ريزامىن» دەپ قۋانىشىمەن ءبولىستى كوپبالالى انا.
