مەكتەپتەگى قوسىمشا ءبىلىم بەرۋ باعدارلاماسىنا ورنيتولوگيالىق باقىلاۋدى دا ەنگىزۋ جوسپارلانىپ وتىر. قورعالجىن وبسەرۆاتورياسىنىڭ بازاسىنداعى قۇستاردى زەرتتەۋ ورتالىعىندا ەلىمىزدەگى وقۋشىلارعا ەكولوگيالىق ساۋاتتاندىرۋ جوباسى ىسكە قوسىلدى.
اقمولا وبلىسى اۋماعىنداعى ورنيتولوگيالىق ورتالىق وتكەن جىلى اشىلدى. ونىڭ ماقساتى – جاس ۇرپاقتى تۋعان جەردى سۇيۋگە باۋلۋ, وي-ءورىسىن كەڭەيتۋ, وڭىردەگى جانۋارلار دۇنيەسى تۋرالى ءمالىمەت بەرۋ. ورتالىق ماماندارى جۇمىسقا پايدالاناتىن بىرقاتار پراكتيكالىق جانە ادىستەمەلىك قۇجاتتاردى جاساپ شىعاردى. اتاپ ايتساق, تابيعات كۇندەلىگى, قۇستاردىڭ ومىرىنە باقىلاۋ جاسايتىن كۇندەلىك بالالارمەن جۇمىس ىستەۋ بارىسىندا قولدانىلادى.
بۇل جوبا اقش-تىڭ قازاقستانداعى ەلشىلىگىنىڭ شاعىن گرانتتارى باعدارلاماسى بويىنشا جۇزەگە اسىرىلدى. قورعالجىن ەكولوگيالىق وبسەرۆاتورياسىنىڭ ديرەكتورى قۇرالاي تۇسىپبەكوۆا گرانتتىق قولداۋدىڭ ناتيجەسىندە قورىقتى مەكەندەۋشىلەردى باقىلاۋ ينفراقۇرىلىمى قالىپتاسىپ, قوناقۇيلەردەگى قىزمەت كورسەتۋ ساپاسى ارتقانىن ايتادى. «گرانتتىق قولداۋدىڭ التى ايىندا ورنيتولوگيالىق باقىلاۋ كەشەنى ازىرلەنەدى» دەيدى ول.
اقش ەلشىلىگىنىڭ شاعىن گرانتتار جانە بيۋدجەت باعدارلاماسىنىڭ اسسيستەنتى سەرىك دوساليەۆتىڭ ايتۋىنشا, ەلىمىزدە بيىل 300-دەن اسا ءارتۇرلى تۇجىرىمدامالار ماقۇلدانعان. سولاردىڭ ءبىرى – قورعالجىن ەكولوگيالىق وبسەرۆاتورياسى. – ءبىز وقۋشىلار مەن ولاردىڭ اتا-انالارى بۇل يدەيانى ءوز ورتاسىندا ودان ءارى دامىتادى دەپ ۇمىتتەنەمىز, – دەدى س.دوساليەۆ.
قورعالجىن مەملەكەتتىك قورىعى ديرەكتورىنىڭ مىندەتىن اتقارۋشى الەكسەي كوشكين تىلشىلەرگە بىرەگەي قورىقتى دامىتۋدىڭ ماڭىزدى جاقتارىن اڭگىمەلەپ بەردى. ول ەلىمىزدەگى قۇستاردىڭ 76 پايىزى قورعالجىن قورىعىنىڭ اۋماعىندا شوعىرلانعانىن ءمالىم ەتتى. ەڭ باستىسى, بۇل قورىق الەمدەگى ەڭ ادەمى قۇس – قوقيقازدىڭ وتانى سانالادى.
