«استانا» كونتسەرت زالىندا قازاقتىڭ باي مۋزىكالىق مۇراسىنا بويلاتقان, كۇيشىلەر مەن كومپوزيتورلاردىڭ شىعارماشىلىق قارىمىن بايقاتقان «عاسىردان – عاسىرعا» اتتى كونتسەرت ءوتتى. «ەكسپو-2017» حالىقارالىق مامانداندىرىلعان كورمە اياسىنداعى كەشتى استانا قالاسى مەملەكەتتىك اكادەميالىق فيلارمونياسى ۇيىمداستىردى.
اتالمىش ونەر ۇجىمىنا قاراستى «قورقىت» ءداستۇرلى ساز توبى رەپەرتۋارىنىڭ نەگىزىن قازاق فولكلورى – كۇيلەر, تەرمەلەر مەن جىرلار قۇرايدى. كەشتە توپتىڭ كوركەمدىك جەتەكشىسى, كومپوزيتور قر مادەنيەت قايراتكەرى شولپان قورعانبەك جاڭا زامانعا لايىقتاپ وڭدەگەن شىعارمالار, كومپوزيتوردىڭ ءتول تۋىندىلارى, فيلارمونيانىڭ «حالىق ءانى» ءبولىمى سوليستەرىنىڭ ورىنداۋىنداعى اندەر كورەرمەندەرگە ۇسىنىلدى. «شالقىما» حالىق ءبيى ءانسامبلى ادەمى بيلەرىمەن كوركەمدەدى. بۇل بيلەردىڭ ءوزىن ءانسامبلدىڭ كوركەمدىك جەتەكشىسى, قر مادەنيەت قايراتكەرى ءابدىراسۋل ەسەكەەۆ بەلگىلى كۇيلەردى نەگىزگە الىپ قويدى.
حالىق قوبىز اتاسى – قورقىتتىڭ كۇيلەرىنە, قازانعاپتىڭ «تورى جورعا اتتىڭ بوگەلەك قاعۋى», باكىر تاجىباەۆتىڭ «اقبۇلاق», ايتقالي جايىموۆتىڭ «تويباستار», «شالقىما», قابىكەيدىڭ «جەلدىرمە», شولپان قورعانبەكتىڭ «تاعزىم», «كوك تۇرىكتەر» تۋىندىلارىنا قۇلاق قۇرىشىن قاندىردى. سونداي-اق, ەتنومۋزىكانى ناسيحاتتاپ جۇرگەن بەلگىلى كومپوزيتور ەدىل قۇسايىنوۆ ساحناعا كوتەرىلىپ, «بالالار سازى» اتتى شىعارماسىمەن كورەرمەننىڭ دەلەبەسىن قوزدىردى. پەريزات تۇراروۆا, جالعاس سۇلتان, زۋلفيا بايمىرزا اسەم اندەرگە سالىپ, جينالعان جۇرتشىلىقتىڭ جان سارايىن اشتى.
«اقتامبەردىنىڭ تولعاۋى» ەلدىڭ قۇلاعىنا بەكبولات تىلەۋحاننىڭ ورىنداۋىندا جەتتى. بۇل تولعاۋدى قازاقستاننىڭ ەڭبەك سىڭىرگەن ءارتىسى سەرىك وسپانوۆ تا جەرىنە جەتكىزە ايتادى. وسى كەشتە «اقتامبەردىنى» جاس ءانشى, «شابىت» شىعارماشىل جاستاردىڭ حالىقارالىق فەستيۆالىنىڭ لاۋرەاتى جاقسىگەلدى ماياساروۆ اڭىراتتى.
اقىن داۋلەتكەرەي كاپۇلىنىڭ ولەڭدەرىنە جازىلعان ازىرگە ءبىر عانا ءاندى بىلەمىز. «توبىلعى تورى تىرشىلىگىم-اۋ» اتالاتىن بۇل تۋىندىنى زاعيپا يمانعازيەۆا جازدى. بىزدىڭشە, وتە ءساتتى شىققان وسى ءاندى اۆتور ناقىشىنا كەلتىرىپ ورىندايدى. ال كونتسەرتتە مۇنى ءانشى بايان مۇساەۆا شىرقادى.
استانا قالاسى مەملەكەتتىك اكادەميالىق فيلارمونياسىنىڭ الدا دا قىزىقتى كونتسەرتتەرى بار. 7 تامىز كۇنى «استانا» كونتسەرت زالىندا ابايدىڭ قارا سوزدەرىنەن ادەبي-مۋزىكالىق كەش وتەدى. حاكىمنىڭ تۋعان كۇنىنىڭ قارساڭىندا ۇيىمداستىرىلاتىن كەشتە اباي بەينەسىندە اسحات قوشانوۆ كورىنەدى. سونداي-اق, فيلارمونيانىڭ انشىلەرى بەلگىلى اندەردى ورىندايدى.
امانعالي قالجانوۆ
