استانا قالالىق ىشكى ىستەر دەپارتامەنتى 13-15 ناۋرىزدا وتكەن «قارۋ – 2017» جەدەل الدىن الۋ شاراسى اياسىندا زاڭسىز ساقتالعان 30 قارۋدى ءتاركىلەدى.
ايتۋلى شارانىڭ ماقساتى – ەلوردا تۇرعىندارى اراسىندا زاڭسىز ساقتالعان قارۋلار مەن جارىلعىش زاتتاردى انىقتاپ, وسى قارۋ-جاراقپەن جاسالاتىن قىلمىستىڭ الدىن الۋدى كوزدەگەن.
ءۇش كۇنگە سوزىلعان رەيد بارىسىندا پوليتسيا قىزمەتكەرلەرى ەلوردادا تىركەۋدە تۇرعان التى جۇزدەن استام قارۋ يەلەرىن جەرگىلىكتى تۇرعىن ءۇي بويىنشا تەكسەرىپ شىققان. ناتيجەسىندە قارۋدى ساقتاۋدىڭ ەرەجەسىن بۇزعان 14 ازاماتقا اكىمشىلىك ايىپپۇل تارتىلىپ, 10 ادام ءوز ەركىمەن تراۆماتيكالىق جانە تەگىس ۇڭعىلى قارۋلارىن تاپسىرعان.
– ءبىز مۇنداي شارانى جىلدا وتكىزەمىز. قارۋدى ۇيدە ساقتاۋدىڭ ءوز ەرەجەسى بار. سونىڭ ءبارى تالاپقا ساي بولعانى ءجون. ماسەلەن, قارۋ قالىڭدىعى 3 مم اسپايتىن سەيفتە ساقتالىپ, وندا دابىل قوندىرعىسى ورناتىلادى. سونىمەن ءبىرگە قارۋدىڭ رۇقسات ەتۋ قاعازىندا نومىرمەن بىرگە مەكەنجاي سايكەس بولۋ كەرەك. وسى ايتىلعان ەرەجەلەردىڭ ءبارى تالاپقا ساي بولماسا قارۋ تاركىلەنەدى. اكىمشىلىك جاۋاپكەرشىلىككە تارتىلادى. كوبىنەسە ادامدار اڭشىلىق قارۋلاردى ساقتايدى. رەيد اياسىندا تۇرعىندارعا قارۋدى ساقتاۋدىڭ ەرەجەلەرى جايىندا تۇسىندىرمە جۇمىستارىن جۇرگىزدىك, – دەيدى قالالىق ىشكى ىستەر دەپارتامەنتىنىڭ ازاماتتىق جانە قىزمەتتىك قارۋ باقىلاۋ جاساۋ ءبولىمىنىڭ باسشىسى باعلان قازبەكوۆ.
ازامات ەسەنجول
