ارعىماق شاۋىپ ءوتتى ارىنداتىپ…
كۇنى كەشە عانا ەدى كوڭىلىمىزدى قۋانىش كەرنەپ كۇتىپ العانىمىز. قاس-قاعىم ساتتەي عانا وتە شىققان جىلقى جىلى جەتىستىكسىز بولدى دەۋگە اۋىز بارمايدى, ارينە. ينە-جىپكە نەسىن تىزەيىك, قاي سالاداعى بولماسىن ماڭىزدى ۋاقيعالار كوپشىلىكتىڭ كوكەيىندە.
ەسىك قاعىپ تۇرعان قوي جىلى… قازاققا تاۋەلسىزدىگىن سىيلاعان, ەگەمەندىگىن الىپ بەرگەن, دەربەستىگىن ۇسىنعان قوڭىرىم عوي. قوي جىلىنان باستاۋ العان ازاتتىعىمىزدىڭ ارقاسىندا «قوي ۇستىنە بوزتورعاي جۇمىرتقالاعان» زاماندا عۇمىر كەشۋدەمىز. بۇل جىلى قازاققا ابايداي ۇل سىيلاعان قۇنانباي قاجى دۇنيەگە كەلدى, احمەت بايتۇرسىنۇلى تۋدى…
تامىرلى تاريحىمىز توڭىرەگىندەگى ىستەر – ءبىر توبە. سپورتتاعى ساڭلاقتارىمىزدىڭ ءسۇيىنشىسى تاعى بار, ايتپاقشى, التىن ايدارلى ۇلىمىز (يليا يلين) ءتورتىنشى التىنىن قانجىعالاسا, جاسۇلان قىدىرباەۆ پەن جازيرا جاپپارقۇلدىڭ ەرلىكتەرىن تىلگە تيەك ەتپەسكە بولمايدى. قازاق توپىراعىنا تۇڭعىش تابان تىرەگەن فرانتسيا پرەزيدەنتىنە ەلباسىمىزدىڭ شاپان جابۋى, مەملەكەت باسشىسىنىڭ «يسلامدىق قارجى بويىنشا جاھاندىق كوشباسشى» سىيلىعىمەن ماراپاتتالۋى, وسى سياقتى باسقا دا ۋاقيعالار الەم ەلدەرىمەن قارىم-قاتىناسىمىزدىڭ تابىستى ەكەنىن ۇعىندىرادى.
ەندى, مىنە, قوي جىلى تويعا ۇلاسپاق. وسى تۇستا ەلباسى ءسوزىن ويعا ورالتپاسقا لاج جوق: «2015 جىل – ۇلتتىق تاريحىمىزدى ۇلىقتاۋ جانە بۇگىنگى بيىكتەرىمىزدى باعالاۋ تۇرعىسىنان مەرەيلى بەلەستەر جىلى» دەدى ول. كوپ ۇزاماي قازاق حاندىعىنىڭ بەس ءجۇز ەلۋ جىلدىعىن, قازاقستان حالقى اسسامبلەياسى مەن كونستيتۋتسيامىزدىڭ جيىرما جىلدىعىن, ۇلى جەڭىستىڭ جەتپىس جىلدىعىن مەرەكەلەيمىز. تاعى ايتا كەتەرلىگى, 2015 جىل – قازاقستان حالقى اسسامبلەياسى جىلى. ويتكەنى, «ەلدىڭ تۇتاستىعى مەن بىرلىگى, تاتۋلىعى مەن تىنىشتىعى ەڭ باستى نازاردا».
قوي – بەرەكەسى مول تۇلىك. «قويدىڭ ءسۇتى – قورعاسىن» دەگەن بابالارىمىز شوپان اتا ۇرپاعىنىڭ يەلىگىندەگى جىلدان كوپ ءۇمىت كۇتكەن, جايلىلىعىنا سەنگەن. موماقان قالپىمەن مولشىلىققا كەنەلتكەن قوي جىلى جەتىستىكتەرىن قازىردەن ازىرلەۋدە.
«قوي ەگىز تاپسا, ءشوپتىڭ باسى ايىر تۋادى», «ءبىر ءتول تۋسا, ءبىر ءتۇپ جۋسان ارتىق وسەدى». ەندەشە, ءار قازاقتىڭ شاڭىراعىندا ىڭگالاعان سابيلەرمەن نەسىبەمىز ەسەلەنسىن!
…راس, مەملەكەتىمىزدىڭ ەكىنشى مۇشەلى. جاقسىلىعىنان بۇيىرسىن!
