باس قالا اكىمدىگىندە نۇر-سۇلتان قالاسى جانە قوسشى ەلدى مەكەنى قوعامدىق كەڭەسى مەن ءماسليحاتىنىڭ بىرلەسكەن وتىرىسى ءوتىپ, وعان ەلوردا مەن اقمولا وبلىسىنىڭ اتقارۋشى جانە ۋاكىلەتتى ورگاندارىنىڭ وكىلدەرى قاتىستى. وتىرىس بارىسىندا قوسشى ەلدى مەكەنىندەگى سۋ تاپشىلىعى ماسەلەسى ءسوز بولدى.
– بيىل سۋمەن جابدىقتاۋدىڭ 4-كەزەگىنىڭ تاراتۋ جەلىلەرىنە 1,5 ملرد تەڭگە ءبولىندى, بىراق مۇنىمەن ماسەلە شەشىلگەن جوق, ويتكەنى ءبىزدىڭ ەلدى مەكەندە سۋ جەتىسپەيدى. بۇل ماسەلەنى كەيىنگە قالدىرۋعا بولمايدى, سۋمەن جابدىقتاۋدىڭ ۇنەمى توقتاپ قالۋى تۇرعىنداردى قاتتى الاڭداتۋدا. ءححى عاسىردا ءومىر ءسۇرىپ وتىرعانىمىزدى ۇمىتپاساق ەكەن. قوعام قازىرگىدەي قارىشتاپ دامىعان زاماندا مۇنداي پروبلەمالار بولماۋى كەرەك دەپ ەسەپتەيمىن. قازىر جاڭا جوبانى قاراستىرىپ, سۋ كوزىن تابۋىمىز قاجەت, – دەدى اقمولا وبلىستىق ءماسليحاتىنىڭ دەپۋتاتى سايراش ماتايباەۆا.
قوسشى ەلدى مەكەنىنەن كەلگەن وكىلدەر بۇل ماسەلەنى شەشۋدىڭ بىردەن-ءبىر جولى ەلوردانىڭ سۋمەن جابدىقتاۋ جەلىلەرىنە قوسىلۋ دەپ سانايدى. ال قالالىق ءماسليحات حاتشىسى ەرلان كاناليموۆ اتالعان ماسەلە بويىنشا جۇمىس توبىن قۇرۋدى ۇسىندى. جاعدايدى شەشۋ ءۇشىن قوسشى قالاسىنىڭ باس جوسپارىن ازىرلەۋ قاجەت. سونىمەن قاتار قوسشى ەلدى مەكەنىنىڭ تۇرعىندارىن قاتتى تۇرمىستىق قالدىقتار ماسەلەسى دە ەرەكشە الاڭداتىپ وتىر. ماسەلەن, تايتوبە اۋىلىندا رۇقسات ەتىلمەگەن قوقىس ۇيىندىلەرىنىڭ جابىلۋىنا بايلانىستى تاسىمالداۋ, سۇرىپتاۋ, كومۋ, قوقىستى كادەگە جاراتۋ جانە ت. ب. سىندى قوسىمشا شىعىندار پايدا بولدى.
ەرلان كاناليموۆتىڭ ايتۋىنشا, بۇگىنگى تاڭدا ەلوردالىق پوليگون 80 پايىزعا تولعان جانە بۇل ماسەلە باس قالانى دا قاتتى تولعاندىرىپ وتىر, شاھار پوليگونى تولىق تولعان جاعدايدا نە ىستەۋ كەرەكتىگى تۋرالى ويلانۋ قاجەت. الايدا اقمولا وبلىسىنىڭ دەپۋتاتتارى قوسشىداعى كوپتەگەن ماسەلەلەر نۇر-سۇلتان قالاسىنىڭ اكىمدىگى ارالاسپايىنشا شەشىلمەيتىنىن العا تارتتى.
