استانا قالاسى ءماسليحاتىنىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسياسىنىڭ وتىرىسىندا شاھاردا تۋبەركۋلەزگە قارسى قولدانىلىپ جاتقان شارالار مەن وسى اۋرۋعا قاتىستى ەپيدەميولوگيالىق جاعداي قارالدى.
وتىرىستا دەپۋتاتتار ساۋالدارىنا ءتيىستى سالا ماماندارى جاۋاپ بەردى. اتاپ ايتقاندا, قۇرت اۋرۋىنا شالدىققاندار جەڭىلدىكتەرگە يە ازاماتتار ساناتىنا جاتادى. ولارعا الەۋمەتتىك تولەمدەرمەن قاتار ازىق-تۇلىك, قوعامدىق كولىكتە ءجۇرۋ بيلەتتەرى بەرىلەدى. بۇل تاراپتا وسى اۋرۋدى ەمدەيتىن ديسپانسەر دارىگەرلەرى اي سايىن بەرىلەتىن الەۋمەتتىك تولەمدەر سوماسىن كوبەيتۋدى ۇسىندى.
قوعامدىق دەنساۋلىق ساقتاۋ باسقارماسىنىڭ باسشىسى قامالجان نادىروۆ جۇمىسپەن قامتۋ جانە الەۋمەتتىك قورعاۋ باسقارماسى باسشىلىعىمەن بىرگە تۋبەركۋلەزبەن اۋىراتىندارعا قوسىمشا جەڭىلدىكتەردى بەرۋ ماسەلەسىن قاراستىراتىنىن ايتىپ, مىسال رەتىندە قىزىلوردا ءوڭىرىنىڭ ۇلگىسىن كەلتىردى. ونىڭ ايتۋىنشا, سىر بويىندا بۇل دەرتكە ۇشىراعانداردى ومىردە قيىن جاعدايدا قالعان ادامداردىڭ قاتارىنا ەنگىزىپ, تابىستارىنا قاراماي, الەۋمەتتىك تولەمدەردى 15 مىڭ تەڭگەدەن 25 مىڭ تەڭگەگە دەيىن كوتەردى.
ۆەدومستۆو باسشىسىنىڭ ءسوزىن قۋاتتاعان تۋبەركۋلەزگە قارسى ديسپانسەردىڭ باس دارىگەرى اننا تسەپكە تۋبەركۋلەزبەن اۋىرىپ بولعانداردى جۇمىسقا تۇرعىزۋ ءىسى باستالعانىن, قازىر الەۋمەتتىك بەيىمدەۋ ماسەلەسى ىلگەرىلەپ جاتقانىن ايتتى.
«قازىر جۇمىسپەن قامتۋ ورتالىعىمەن بىرگە وسى ازاماتتاردى وقىتۋ جانە ءارى قاراي جۇمىسقا ورنالاستىرۋ ماسەلەسىن قاراپ جاتىرمىز. ساناتورلىق-كۋرورتتىق ەمدەۋ ماسەلەسى قالادا شەشىلگەن. ەمدەۋ اياقتالعان سوڭ ناۋقاستاردى سوعان جىبەرەمىز. تۋبەركۋلەزبەن اۋىرعاندارعا عانا ەمەس, تىنىس الۋ جولدارى اۋرۋلارىمەن اۋىراتىندارعا دا بۋرابايداعى بەيىمدەۋ ورتالىعىنا جولداما بەرۋ مۇمكىندىگىنە يەمىز» دەدى ول.
وتىرىستا سوڭعى 10 جىلدا استانادا تۋبەركۋلەزدەن قايتىس بولۋ كورسەتكىشى 4,4 پايىزعا ازايعانى ايتىلدى. قوعامدىق دەنساۋلىق ساقتاۋ باسقارماسىنىڭ مالىمەتىنشە, قۇرت اۋرۋىنا شالدىققان ءار بەسىنشى ادام استاناعا كەيىنگى ءبىر جىلدىڭ كولەمىندە كوشىپ كەلگەن. بۇل دەرتكە دۋشار بولعان ءار ەكىنشى ادامنىڭ تۇراقتى جۇمىسى جوقتىعى, ولاردىڭ 25 پايىزىنىڭ تابىسى تومەن ەكەنى انىقتالعان. مۇنىڭ ۇستىنە تۋبەركۋلەزبەن اۋىرعانداردىڭ جارتىسىنىڭ باسىندا باسپانا بولماي, جالدامالى پاتەرلەردە تۇرعانى بەلگىلى بولعان.
وسى دەرت وزبەكستان, قىرعىزستان, رەسەي, ازەربايجان, موڭعوليا, ءۇندىستان, كونگو, ليتۆا مەن ۋكراينادان كەلگەن ميگرانتتاردا دا انىقتالعان. ولاردىڭ كوبى جەكە كاسىپكەرلەر مەن قۇرىلىسشىلار. اۋرۋدى ەمدەۋدى جالعاستىرۋ ءۇشىن ولاردى ءوز ەلدەرىنە جىبەرۋ كەرەك. الايدا كوشى-قون رەجىمى بۇزىلماعان جاعدايدا ولاردى قايتارۋدىڭ ءتارتىبى زاڭدىق تۇرعىدان تۇزىلمەگەن. سول سەبەپتەن تۋبەركۋلەزگە ۇشىراعان 54 ميگرانتتىڭ
23-ءى عانا قايتارىلعان. 12-ءسى ەمدەلۋدىڭ تولىق كۋرسىن اياقتاپ, استانادا قالدى. جالپى, وسى دەرتكە شالدىققان ءبىر ادامدى ەمدەۋگە مەملەكەت جىلىنا 1 ملن تەڭگە بولەدى.
