استانا اكىمدىگىنىڭ زورلىق-زومبىلىق نەمەسە زورلىق-زومبىلىق قاۋپى سالدارىنان قيىن جاعدايعا تاپ بولعان ادامدارعا ارنالعان داعدارىس ورتالىعىندا ناۋرىز تويى ءوتتى.
ۇلىستىڭ ۇلى كۇنىنە ورتالىق قىزمەتكەرلەرى تىڭعىلىقتى دايىندالعان. حالقىمىزدىڭ عاجايىپ داستۇرلەرىنەن كورىنىس قويدى. قۇدا ءتۇسىپ, قىز ۇزاتتى. توردە وتىرعان قۇدالار ماقالداپ سويلەپ, دومبىرامەن ءان ايتىپ, كۇي شەرتتى. تانىمال ءانشى اراي اسقاپ ۇزاتىلىپ بارا جاتقان قىزدى سىڭسۋ ايتىپ شىعارىپ سالدى. ارتىق-كەمى جوق, كادىمگى شىنايى ومىردەگىدەي بولدى. وتباسى قۇندىلىعىن دارىپتەگەن ءداستۇر كوپ ادامعا وي سالدى.
سونىمەن بىرگە, قازاقستان حالقى اسسامبلەياسىنىڭ وزبەك, ازەربايجان, تاجىك, تۇرىك, بولگار جانە گرۋزين ەتنو-مادەني بىرلەستىكتەرىنەن كەلگەن ونەرپازدار مەرەكەنىڭ كورىگىن قىزدىردى. وزبەكشە بي بيلەپ, تۇرىكشە ءان ايتىلدى. باسقا ۇلتتار دا ءوز ونەرلەرىن كورسەتتى.
– بۇگىندە ءبىزدىڭ ورتالىقتا 13 ايەل, 32 بالا تۇرىپ جاتىر. ولاردىڭ ءبارى دە قامقورلىققا الىنعان. ءبىز ولارعا تاماشا مەرەكەلىك كوڭىل-كۇي سىيلاعىمىز كەلدى. ماقساتىمىز ورىندالدى. اسىرەسە, بالالاردىڭ قۋانىشىندا شەك جوق. ەتنو-مادەني بىرلەستىكتەرىنىڭ وكىلدەرى جەتكىنشەكتەرگە سىيلىق تارتۋ ەتتى. ولارعا ۇلكەن العىس ايتامىز, – دەيدى مەكەمە قىزمەتكەرى تورعىن احمەتوۆا. شارا سوڭىندا قوناقتار ناۋرىز كوجەدەن ءدام تاتىپ, ورتالىق ۇجىمىنا ريزاشىلىقتارىن ءبىلدىردى.
ازامات ەسەنجول
