قايعىلى جاعدايلاردىڭ الدىن الۋ ماقساتىندا ەلورداداعى قۇدىقتاردىڭ اۋزى تورمەن جابىلۋدا. بۇل تاجىريبە قالاداعى جىلۋ جەلىلەرىنە ارنالعان درەناجدى قۇدىقتار ءۇشىن 2012 جىلدان باستاپ قولدانىلادى.
«استانا-تەپلوترانزيت» كومپانياسىنا قاراستى قۇدىقتاردىڭ بەتىنە ورناتىلعان مەتالل تورلار ەكى ەرەسەك ەر ادامدى كوتەرۋگە قاۋقارلى. اتالعان ۇيىمنىڭ №1 پايدالانۋ اۋدانى ۋچاسكەسىنىڭ باستىعى عادىلجان بايمۇراتوۆتىڭ ايتۋىنشا, جىلۋ جۇيەسىنىڭ قۇدىقتارى «قۇرعاق» (باسقارۋ قۇدىقتارى) جانە «دىمقىل» (قۇرعاتۋ قۇدىقتارى) بولىپ ەكىگە بولىنەدى ەكەن. «باسقارۋعا ارنالعان قۇدىقتاردىڭ تەرەڭدىگى – 40 سانتيمەتر. ول ەشقانداي قاۋىپ توندىرمەيدى. قۇرعاتۋ قۇدىقتارى تاسجولدى جابۋعا ارنالعان. ەگەر جوندەۋ جۇمىسىن جۇرگىزۋ كەرەك بولسا, ءبىز سول جول ۋچاسكەسىن جابامىز. بۇدان كەيىن قۇبىرداعى سۋ قۇدىققا قۇيىلادى دا, ول جەردەن سورعى نەمەسە ۆاكۋمدى كولىكپەن سورىلىپ الىنادى. ونداي قۇدىقتاردىڭ تەرەڭدىگى جىلۋ تراسساسىنىڭ تەرەڭدىگىنە بايلانىستى 2-3 مەترگە دەيىن جەتەدى. سولاردىڭ بەتىنە تەمىر تور قويامىز. ياعني ادام بەتى اشىق قۇدىققا ابايسىزدا قۇلاپ كەتكەن كۇننىڭ وزىندە, توردىڭ ارقاسىندا قۇدىقتىڭ ىشىنە تۇسپەيدى» دەيدى ول.
استانا قالاسىنىڭ وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى مالىمەتىنە سۇيەنسەك, قازىرگى تاڭدا قالادا 62142 قۇدىق بار. سونىڭ 13594-ءى «استانا-تەپلوترانزيت» ۇيىمىنا قاراسا, 34538-ءى – «استانا سۋ ارناسى», 10340-ى – «استانا تازالىق», 3661-ءى – «استانا-اەك», 9-ى «استانا قالالىق جارىق» ۇيىمدارىنا تيەسىلى.
تۇرعىندار تاراپىنان «109» قىزمەتىنە بەتى اشىق قۇدىقتار تۋرالى بىلتىر – 2804, ال وسى جىلدىڭ باسىنان بەرى 626 شاعىم تۇسكەن. بۇدان بولەك, بيىل قۇدىق قاقپاعى ۇرلىعىنا بايلانىستى تۇسكەن 35 ارىزدىڭ 23-ءى بويىنشا سوتقا دەيىنگى تەرگەۋ ىستەرى باستالدى. استانا قالاسىنىڭ پوليتسيا دەپارتامەنتى وكىلدەرىنىڭ دەرەگىنشە, مۇنداي ۇرلىق كوبىنەسە جارىعى مەن كۇزەتى جوق قۇرىلىس نىساندارىندا, سونداي-اق قارا مەتالل جوعارى باعامەن قابىلداناتىن جەرلەردە بولادى. الداعى ۋاقىتتا قۇدىق قاقپاقتارىن كومپوزيتتىك ماتەريالداردان جاساۋ كوزدەلىپ وتىر. بۇل يدەيانى كەيبىر استانالىق ەرىكتىلەر ىسكە اسىرىپ تا ۇلگەردى. ولار جەلەزنودوروجنىي تۇرعىن الابىنداعى توعىز قۇدىقتىڭ بەتىن پوليمەرلى قاقپاقتارمەن جاۋىپ شىعىپ, ءتورت قاقپاقتى – جەكە سەكتور تۇرعىندارىنا, ۇشەۋىن – سول ماڭداعى مەكتەپ ديرەكتورىنا, ال توعىزىن اۋدان اكىمدىگىنە ۇسىنعان. زاماناۋي ونەركاسىپ تالاپتارىن ەسكەرە وتىرىپ جاسالعان مۇنداي بۇيىمدار قاۋىپسىزدىك تەحنيكاسى مەن ەكولوگيالىق نورمالاردىڭ بارلىق تالاپتارىنا جاۋاپ بەرەدى ءارى ولاردى تەمىر قابىلداۋشىلار المايتىندىقتان, ۇرىلارعا قاقپاقتاردى جىمقىرۋدىڭ پايداسى بولمايدى.
