اسا قامقور ەرەكشە مەيىرىمدى اللانىڭ اتىمەن باستايمىن! بارلىق ماقتاۋ اللاعا ءتان. ارداقتى پايعامبارىمىز مۇحاممەدكە اللانىڭ سالاۋاتى مەن سالەمى بولسىن!
قادىرلى وتانداستار!
سىزدەردى مۇسىلمان قاۋىمىنىڭ ۇلىق مەيرامى – قۇربان ايت مەرەكەسىمەن شىن جۇرەكتەن قۇتتىقتايمىن. ايت قابىل بولسىن! بارشاڭىزعا مىقتى دەنساۋلىق, وتباسىلارىڭىزعا اماندىق, جۇمىستارىڭىزعا بەرەكە تىلەيمىن.
قۇربان ايت – شىنايى نيەت پەن اللاعا دەگەن سۇيىسپەنشىلىكتى پاش ەتەتىن مەيرام. ۇلىق مەرەكەنىڭ تاربيەلىك ءمانى مەن ماعىناسى تەرەڭدە جاتىر. قاسيەتتى قۇراندا: «ۇمىتپاڭدار, ولاردىڭ ەتى دە, قانى دا ەشقاشان اللاعا جەتپەيدى. وعان جەتەتىن نارسە – جۇرەكتەرىڭىزگە ۇيالاعان تاقۋالىقتارىڭ (شىنايى نيەتتەرىڭ)» («حاج» سۇرەسى, 37-ايات), – دەلىنگەن. اياتتا ايتىلعانداي, قۇداي جولىندا جاقسىلىق جاساۋعا نيەتتەنگەن پەندە بۇل امالدى رياسىز ويمەن ورىندايدى.
ادام بالاسى قۇرباندىق شالۋ ارقىلى اللانىڭ بەرگەن ريزىق-نەسىبەسىنە شۇكىر ەتەدى. قۇدايدىڭ ءناسىپ ەتكەن نىعمەتتىڭ ءبىر بولىگىن كومەككە مۇقتاج جاندارعا ۇلەستىرىپ, ولاردىڭ دا اقىسىن بەرىپ, قۋانىشقا بولەيدى. ويتكەنى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «پارىز امالدان كەيىنگى اللاعا ۇنامدى ءىس – مۇسىلماننىڭ جۇرەگىنە قۋانىش سىيلاۋ» دەگەن.
ۇلكەننىڭ, كومەككە مۇقتاج جانداردىڭ العىسىن الىپ, باتاسىنا بولەنۋ – ايت كەزىندە ورىندالاتىن ساۋاپتى ءىستىڭ ءبىرى. مۇسىلمان بالاسىنىڭ ۇلىق كۇندە شىنايى نيەتپەن قۇربان شالىپ, ونى مۇگەدەكتەر مەن جەتىمدەرگە, كوپبالالى وتباسىلار مەن قارتتارعا تاراتىپ, العىسىن الۋعا تىرىساتىنى سوندىقتان.
وسى رەتتە ەلىمىزدەگى بارشا كاسىپكەر ازاماتتاردى قۇربان ايتتىڭ قۇرمەتىنە مال قۇنىن قولدان كوتەرمەي, حالىقتىڭ الەۋمەتتىك جاعدايىن ەسكەرىپ, وڭتايلى باعا ۇسىنۋعا, جۇرتىمىز كۇندە تۇتىناتىن ازىق-تۇلىككە مۇمكىندىگىنشە جەڭىلدىك جاساۋعا شاقىرامىن. قۇربان ايتتى اتاپ ءوتۋدىڭ نەگىزگى ماقساتى – مۇسىلماندار اراسىندا ءوزارا مەيىرىمدىلىك, جومارتتىق, قايىرىمدىلىق, قاناعات سىندى ادامگەرشىلىك قۇندىلىقتاردى قالىپتاستىرۋ. اللانىڭ راقىم نۇرى توگىلەتىن بەرەكەلى ساتتەردە حالقىمىزعا جاقسىلىق جاساپ, كوپشىلىكتىڭ ريزاشىلىعىنا بولەنەيىك.
قۇرمەتتى حالايىق!
اللا قالاسا وسى جىلى دا ەلىمىزدە قۇربان شالۋ ءراسىمى وفلاين جانە ونلاين فورماتتا وتەدى. ءدىني باسقارما ەل ازاماتتارىنا, اسىرەسە قالا تۇرعىندارىنا قولايلى جاعداي جاساۋ ماقساتىندا قۇربان شالۋ ءراسىمىن قاشىقتان وتكىزۋگە ارنالعان qurban2024.kz سايتىن ىسكە قوستى. قۇرباندىق شالۋ ءراسىمىن باسقا بىرەۋگە تاپسىرىپ, ونى وسى ىستە وكىل ەتۋگە دىنىمىزدە رۇقسات بەرىلگەن.
وزدەرىڭىزگە بەلگىلى, وتكەن جىلى ءمۇفتيات قىزمەتكەرلەرى «راببىڭ ءۇشىن قۇربان شال» قايىرىمدىلىق جوباسى اياسىندا 1 104 توننا قۇرباندىق ەتىن 123 594 وتباسىعا, سونىمەن قاتار مۇگەدەكتەر, زاعيپتار قورى, اۋرۋحانالار مەن ارداگەرلەر ۇيىنە جەتكىزىپ بەردى. بۇيىرسا, بيىل دا وسى باعىتتاعى قايىرىمدىلىق ءىس-شارالاردى جۇزەگە اسىرامىز.
قۇرباندىق ەتى اسىرەسە سۋ تاسقىنىنان زارداپ شەككەن وتانداستارىمىزعا, قاراۋسىز قالعان قارتتارعا, جالپى الەۋمەتتىك از قامتىلعان وتباسىلارعا تاراتىلادى. ەلىمىزدەگى بارشا مۇسىلمان قاۋىمىن ساۋاپتى ىسكە ۇلەس قوسىپ, بەلسەندى بولۋعا ۇندەيمىن.
قادىرلى جاماعات!
بۇگىندە الەم مۇسىلماندارى قاسيەتتى مەككە قالاسىندا قاجىلىق جاساۋدا. سولاردىڭ قاتارىندا پارىزىن وتەپ جۇرگەن 5 مىڭنان استام وتانداسىمىزدىڭ نيەتى, حالقىمىزعا جاساپ جاتقان دۇعاسى قابىل بولىپ, ەلىمىزگە امان-ەسەن ورالۋىن تىلەيمىز. اللا تاعالا بايتاق دالامىزعا بەرەكەسىن جاۋدىرىپ, شالعان قۇرباندىقتارىمىزدى, بەرگەن ساداقالارىمىزدى, ايت كۇندەرى امالعا اسىرعان اللاعا ۇنامدى ءاربىر يگى ىستەرىمىزدى قابىل ەتكەي. ءامين!
ناۋرىزباي قاجى تاعانۇلى,
قازاقستان مۇسىلماندارى ءدىني باسقارماسىنىڭ
توراعاسى, باس ءمۇفتي
