استانا قالاسى ءماسليحاتىنىڭ زاڭدىلىق, قۇقىقتىق ءتارتىپ جانە جۇرتشىلىقپەن جۇمىس ماسەلەلەرى جونىندەگى تۇراقتى كوميسسيانىڭ وتىرىسىندا ەلورداداعى ءدىني احۋال تالقىلاندى. ءتيىستى باياندامانى قالالىق ءدىن ىستەرى جونىندەگى باسقارما باسشىسى قايروللا كوشقاليەۆ جاسادى.
ونىڭ ايتۋىنشا, جالپى العاندا, استاناداعى ءدىني احۋالدى تۇراقتى دەپ سيپاتتاۋعا بولادى. بىراق ەرەكشە باقىلاۋدى قاجەت ەتەتىن جايتتار دا بار. وسى كۇنى ەلوردا اۋماعىندا 14 كونفەسسيادان 56 ءدىني بىرلەستىك تىركەلگەن. سونىڭ ىشىندە يسلام دىنىندەگى 16 بىرلەستىك (1 – قازاقستان مۇسىلماندارى ءدىني باسقارماسى (قمدب), 15 – قمدب فيليالدارى), ورىس پراۆوسلاۆ شىركەۋى – 6, ريم-كاتوليك شىركەۋى – 4, پروتەستانتتىق – 28, يۋدايستىك – 1, باحاي – 1, كريشنا – 1.
قازىرگى ۋاقىتتا باس قالا اۋماعىندا 33 عيبادات عيماراتى قىزمەت كورسەتەدى (يسلام ءدىنى – 15, پراۆوسلاۆتىق – 4, كاتوليكتىك – 3, پروتەستانتتىق – 10, يۋدايزم – 1). ال عيبادات عيماراتىنىڭ سىرتىندا ءدىني راسىمدەردى جاساۋعا رۇقسات ەتىلگەن 19 عيمارات تىركەلگەن. سونىڭ بىرەۋى – جەتىنشى كۇن ادۆەنتيستەرىنىڭ جەرگىلىكتى شىركەۋىنىڭ عيماراتى جانە 18 نامازحانا. نامازحانالار «Rixos Prezident Astana» قوناقۇيىندە, «حان شاتىر» ساۋدا-ويىن-ساۋىق ورتالىعىندا, «رەديسسون» قوناقۇيىندە, «كەرۋەن», «MEGA Silk Way», «ابۋ-دابي پلازا» ساۋدا-ويىن-ساۋىق ورتالىقتارىندا, «تاڭداۋ» جشس-تە, «نۇرسۇلتان نازارباەۆ» حالىقارالىق اۋەجايىندا, «نۇرلى جول» تەمىرجول ۆوكزالىندا, «امارا ينۆەست» جشس-تە (حوسپيس), «بولاشاق» بيزنەس ورتالىعىندا, حالىقارالىق قارجى ورتالىعى عيماراتىندا, «دارا-2006» جشس-تە, «قازمەديا ورتالىعى» عيماراتىندا, «Automart» جشس-تە, «سارىارقا» ساۋدا-ويىن-ساۋىق ورتالىعىندا, «Sauran» ساۋدا ورتالىعىندا, «گلوۆال دەۆولوپمەنت» جشس-تە اشىلعان.
ەلوردا اۋماعىندا رەسمي تىركەلگەن 43 ميسسيونەر جۇمىس ىستەيدى. سونىڭ ىشىندە پولشا ازاماتتارى – 6, ءۇندىستان – 3, ۋكراينا – 2, گەرمانيا – 6, رەسەي فەدەراتسياسى – 12, اقش – 3, سلوۆەنيا – 1, بەلارۋس – 1, قىرعىز رەسپۋبليكاسى – 1, وزبەكستان – 2, قازاقستان – 5, ۇلىبريتانيا – 1.
«قازاقستان حالقىنىڭ قۇندىلىقتارىن دامىتۋ تۇجىرىمداماسىن ازىرلەۋ جانە وسكەلەڭ ۇرپاق اراسىندا ءداستۇرلى قۇندىلىقتاردى قالىپتاستىرۋ ماقساتىندا بيىل 5 ناۋرىزدا دوستىق ۇيىندە ەلوردانىڭ ءدىني بىرلەستىكتەرى وكىلدەرىنىڭ قاتىسۋىمەن «ساعان شەكسىز العىس, تۋعان جەر» دوڭگەلەك ۇستەل ءماجىلىسى ءوتتى» دەدى قايروللا كوشقاليەۆ.
ەلورداداعى ءدىني-اعارتۋ جۇمىسىنا توقتالعان بايانداماشى باس قالا اۋماعىندا «استانا مەدرەسە» كوللەدجى جۇمىس ىستەيتىنىن جەتكىزدى. وندا قازىر 166 ستۋدەنت (97-ءسى – ەر بالا, 69-ى – قىز بالا) وقىپ جاتىر. 2020 جىلدان قالا اكىمدىگى تاراپىنان يمام-حاتىب ماماندىعىنا 200 گرانت ءبولىندى.
استانا اۋماعىندا جاماعاتقا تيەسىلى 6 قايىرىمدىلىق مەكەمە قىزمەتىن جۇزەگە اسىرادى. بۇل – «وتىرار» قايىرىمدىلىق مەكەمەسى, «اقمولا» قايىرىمدىلىق مەكەمەسى, «استانا» قايىرىمدىلىق مەكەمەسى, «ەسكەندىر» قايىرىمدىلىق مەكەمەسى, «بۋراباي» قايىرىمدىلىق مەكەمەسى جانە «اق قورعان» قايىرىمدىلىق مەكەمەسى. مۇندا 143 بالا وقىپ جاتىر.
«قازىرگى ۋاقىتتا قر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ كوميتەتى استانا قالاسى باسقارماسىنىڭ شەشىمىمەن قايىرىمدىلىق مەكەمەلەرى قىزمەتىن تەكسەرۋ ءجۇرىپ جاتىر. وسى جىلدىڭ باسىنان «ءدىني قىزمەت جانە ءدىني بىرلەستىكتەر تۋرالى» قازاقستان رەسپۋبليكاسى زاڭىنىڭ تالاپتارىن بۇزعانى ءۇشىن, سونداي-اق قوعامدا ءدىني الاۋىزدىق تۋدىرعانى ءۇشىن 36 اكىمشىلىك قۇقىق بۇزۋشىلىق انىقتالدى. استانا قالاسىنىڭ ارنايى اۋدانارالىق اكىمشىلىك سوتى 11 قۇقىق بۇزۋشىعا 1916000 سوماسىندا ايىپپۇل سالدى. قۇقىق بۇزۋشىلىعى ۇساق بولىپ سانالعاندىقتان, 25 ادامعا ەسكەرتۋ بەرىلىپ, اتالمىش زاڭ تالاپتارىن ءتۇسىندىرۋ بويىنشا پروفيلاكتيكالىق جۇمىس جۇرگىزىلدى» دەدى قايروللا كوشقاليەۆ.
