ءباا-ءنىڭ دۋباي قالاسىندا وتكەن جەڭىل اتلەتيكادان 20 جاسقا دەيىنگىلەر اراسىنداعى ازيا چەمپيوناتى ءوز مارەسىنە جەتتى, دەپ حابارلايدى astana-akshamy.kz
ايتۋلى باسەكەدە 4×400 ەستافەتا سايىسىندا سىنعا تۇسكەن استانا قالاسىنىڭ سپورتشىسى ەكاتەرينا كولودا 2-ورىنعا يە بولدى.
جارىستىڭ قورىتىندىسى بويىنشا قازاقستان كومانداسى 20 جاسقا دەيىنگى سپورتشىلار اراسىندا ازيا چەمپيوناتىنان سەگىز مەدال جەڭىپ الدى. باس باپكەر دميتري كارپوۆ جاس اتلەتتەردىڭ اياق الىسىنا باعا بەردى.
«جاسوسپىرىمدەر كومانداسى جالپى ەسەپتە جەتىنشى ورىن الدى. كوماندا قورجىنىندا ءبىر التىن, ءتورت كۇمىس, ءۇش قولا مەدال بار. سپورتشىلارىمىز جاقسى ونەر كورسەتتى. جالعىز التىن مەدالدى جەتىسايىستان الينا چيستياكوۆا جەڭىپ الدى. ول بىلتىر ەرەسەكتەر قۇراماسىنا قابىلدانىپ, تەگەراندا وتكەن ازيا بىرىنشىلىگىندە بەسسايىستان قولا مەدال يەلەنگەن بولاتىن. وسى ورايدا, كوماندانىڭ نەگىزگى قۇرامى جاڭا سپورتشىلارمەن تولىعاتىنىن ايتقىم كەلەدى. وسكەلەڭ ۇرپاق جاقسى ناتيجە كورسەتۋدە, ولار وزدەرىنەن ۇلكەن بۋىنمەن دە باسەكەگە تۇسە الادى. قازىرگى تاڭدا ازياداعى جەڭىل اتلەتيكا دەڭگەيى وتە جوعارى. جاس سپورتشىلاردىڭ ءوزى حالىقارالىق تۋرنيرلەردە نورماتيۆتەن اسىپ جاتادى. سپورت تۇرلەرى دە قارقىندى دامىپ كەلەدى», – دەدى كارپوۆ.
ايتا كەتەيىك, قۇرلىقتىق دوداعا 30 ەلدەن كەلگەن سپورتشى سىنعا ءتۇستى. ەلىمىزدىڭ نامىسىن 42 سپورتشى قورعادى.
