«1 مامىردان باستاپ قازاقستاندىقتاردى قانداي وزگەرىستەر كۇتىپ تۇر؟» دەپ حابارلايدى astana-akshamy.kz
BAQ.KZ ءتىلشىسى وسى تاقىرىپ توڭىرەگىندە شولۋ جاساپ كوردى.
كوپتەن كۇتكەن دەمالىس
ەڭ اۋەلى دەمالىسسىز وتكەن ءساۋىر ايىنان كەيىن جۇرت اسىعا كۇتەتىن مامىر ايىنداعى مەرەكەلىك كۇندەرگە توقتالىپ وتەيىك. سونىمەن ەڭبەك جانە حالىقتى الەۋمەتتىك قورعاۋ مينيسترلىگى 2024 جىلعى 17 ساۋىردە «2024 جىلى دەمالىس كۇنىن اۋىستىرۋ تۋرالى» بۇيرىققا قول قويدى. قۇجاتقا سايكەس دەمالىس كۇنى 2024 جىلعى 4 مامىرداعى سەنبىدەن 2024 جىلعى 8 مامىرداعى سارسەنبىگە اۋىستىرىلدى.
وسىلايشا, قازاقستاندىقتار ءۇش كۇن قاتارىنان, ياعني 2024 جىلدىڭ 7, 8 جانە 9 مامىرى دەمالادى. 7 مامىردا وتان قورعاۋشىلار كۇنىن جانە 9 مامىردا جەڭىس كۇنىن تويلايدى. ال 4 مامىر جۇمىس كۇنى بولادى. بۇدان بولەك 1 مامىردا قازاقستاندىقتار قازاقستان حالقىنىڭ بىرلىگى مەرەكەسىن اتاپ وتەدى.
جەڭىس كۇنى. ارداگەرلەرگە قانشا قاراجات بەرىلەدى؟
جەڭىستىڭ 79 جىلدىعىنا وراي ەلىمىزدە ەكىنشى دۇنيەجۇزىلىك سوعىس ارداگەرلەرىنە بىرجولعى تولەم بەرىلەدى.
بيىل ونىڭ كولەمى تومەندەگىدەي بولادى:
استانا – 2 ملن تەڭگە. بۇگىنگى تاڭدا ەلوردادا ۇوس-تىڭ 7 ارداگەرى تۇرادى.
الماتى – 2 ملن تەڭگە. قازىر الماتى قالاسىنىڭ اۋماعىندا 44 ارداگەر تۇرادى.
قاراعاندى وبلىسى – 2 ملن تەڭگە. وبلىستا 12 ارداگەر تۇرادى.
اقمولا وبلىسى – 3 ملن تەڭگە. بۇگىنگى تاڭدا وبلىستا 6 ارداگەر تۇرادى.
بقو – 1,5 ملن تەڭگە. باتىس قازاقستان وبلىسىندا 14 ارداگەر بار.
جەتىسۋ وبلىسى – 1,5 ملن تەڭگە. وبلىستا 4 ارداگەر تۇرادى.
«ارداگەرلەر تۋرالى» زاڭعا سايكەس تىل ەڭبەككەرلەرى, قازا تاپقان اسكەري قىزمەتشىلەردىڭ وتباسىلارى, قايتىس بولعان ۇوس مۇگەدەگىنىڭ جۇبايى (زايىبى) – 15 اەك (55 380 تەڭگە) مولشەرىندە بىرجولعى تولەم الادى.
شىمكەنت وقۋشىلارى قوعامدىق كولىكپەن تەگىن جۇرەدى
Tolem ەلەكتروندى تولەم جۇيەسى 1 مامىردان باستاپ شىمكەنت وقۋشىلارى قوعامدىق كولىكپەن تەگىن جۇرە الاتىنىن حابارلادى.
جاقىندا وقۋشى كارتاسى جولاقىسى تەگىن بولادى. بۇل مەكتەپ وقۋشىلارى كارتانى تىركەۋ ءۇشىن ۆاليداتورعا مىندەتتى تۇردە قويۋ قاجەت, بىراق كارتادان اقشانى شەشىلمەيدى. بۇل وزگەرىستەر 1 مامىردان باستاپ كۇشىنە ەنەدى, – دەلىنگەن كومپانيانىڭ حابارلاماسىندا.
تەمىرتاۋ اۆتوبۋستارىندا ەلەكتروندى تولەم جۇيەسى ىسكە قوسىلادى
تەمىرتاۋ قالاسىنىڭ قوعامدىق كولىكتەرىندە ءبىرىنشى مامىردا ONAY ەلەكتروندى تولەم جۇيەسى ىسكە قوسىلادى. قالا اكىمدىگى مامىر ايىندا قالالىق اۆتوبۋستاردا ءجۇرۋ ءتاريفى وزگەرىسسىز قالاتىنىن حابارلادى.
مامىر ايىندا قالالىق اۆتوبۋستاردا جول ءجۇرۋ ءتاريفى وزگەرىسسىز قالادى. جول ءجۇرۋدى ONAY! جەكە كولىك كارتاسىمەن تىركەۋ كەزىندە «رەسپۋبليكالىق جەڭىلدىك» (ماراپاتتالعان كوپ بالالى انالار مەن 1-توپتاعى مۇگەدەكتەرگە رەسىمدەلەدى) – جول ءجۇرۋ تەگىن. جول ءجۇرۋ اقىسىن «7 جاستان 18 جاسقا دەيىنگى بالالار» كارتاسىمەن تىركەۋ كەزىندە تولىق ءتاريفتىڭ 50% تولەنەدى. قولما – قول اقشامەن تولەگەن كەزدە بارلىعى ءۇشىن 70 تەڭگە, – دەپ ءتۇسىندىردى قالا اكىمدىگىندە.
قاراعاندىدا جولاقى 100 تەڭگەگە دەيىن كوتەرىلەدى
قالالىق ءماسليحات دەپۋتاتتارى قاراعاندى اۆتوبۋستارىندا جولاقى قۇنىنىڭ جاڭا ءتاريفىن ماقۇلدادى. مامىر ايىنىڭ 1-نەن باستاپ قالاداعى قوعامدىق كولىكتەردەگى جول ءجۇرۋ اقىسى 20 تەڭگەگە قىمباتتايدى.
ەندى وبلىس ورتالىعىنداعى قوعامدىق كولىكتەردە جولاۋشىلار ەلەكتروندى تولەم جۇيەسى ارقىلى قولماقول اقشاسىز 100 تەڭگە, ال قولماقول اقشامەن 200 تەڭگە تولەيتىن بولادى.
بيلىك وكىلدەرى قاراعاندىدا جول ءجۇرۋ اقىسى سوڭعى 10 جىلدا وزگەرمەگەندىگىن, ءتاريفتى كوتەرۋ ءماجبۇرلى شارا ەكەندىگىن اتاپ ءوتتى.
قاراعاندىدا ىستىق سۋ وشىرىلەدى
وبلىس ورتالىعىندا مامىردان قىركۇيەككە دەيىن 5 اي بويى ىستىق سۋ بولمايدى. بۇل جايىندا ايماق باسشىسى ەرماعانبەت بولەكپاەۆ تىكەلەي ەفيردە تۇرعىنداردىڭ سۇراقتارىنا جاۋاپ بەرۋ بارىسىندا ايتتى.
قاراعاندىنىڭ XX عاسىردا سالىنعان جىلۋ جۇيەسى توزۋى سالدارىنان سوڭعى ونجىلدىقتا قالانى جاز مەزگىلىندە ىستىق سۋمەن قامتۋ مۇمكىن بولماي كەلەدى. قاراعاندىدا ءبىر قۇبىردىڭ بويىمەن ىستىق سۋ دا, جىلۋ جۇيەسىنىڭ سۋى دا اعادى. جاز ايلارىندا وسى قۇبىرلاردا جوندەۋ جۇمىستارى جۇرگىزىلگەندىكتەن, ىستىق سۋ تولىعىمەن توقتاتىلادى.
«بولاشاق» باعدارلاماسىنا ىرىكتەۋ باستالادى
2024 جىلى العاش رەت «بولاشاق» حالىقارالىق ستيپەندياسىنا جانە «500 عالىم» عىلىمي تاعىلىمداماسىنا قۇجاتتاردى قابىلداۋ ۇزدىكسىز جۇرگىزىلەتىن بولادى. قۇجاتتاردى قابىلداۋ 29 ساۋىردە باستالىپ, 25 قازاندا اياقتالادى.
كونكۋرستىق ىرىكتەۋ 2024 جىلعى 10 مامىردان 30 قاراشاعا دەيىن وتەدى. «بولاشاق» ستيپەندياسىنا قۇجاتتار egov.kz پورتالى ارقىلى قابىلدانادى. «500 عالىم» بويىنشا وتىنىمدەردى قابىلداۋ جانە كونكۋرستىق ىرىكتەۋ العاش رەت bolashak.gov.kz. پورتالىندا «ۇمىتكەردىڭ جەكە كابينەتى» بولىمىندە ونلاين جۇرگىزىلەدى.
ارنايى مەديتسينالىق پويىز جولعا شىعادى
1 مامىردان باستاپ تۇرعىنداردى تەگىن كاسىبي مەديتسينالىق كومەكپەن قامتاماسىز ەتۋ ءۇشىن «جاردەم» مامانداندىرىلعان مەديتسينالىق پويىزى ىسكە قوسىلادى. سۋ تاسقىنى جاعدايىن ەسكەرە وتىرىپ, زارداپ شەككەن اۋىلدىق ەلدى مەكەندەردىڭ تۇرعىندارى مەديتسينالىق پويىز قىزمەتتەرىمەن قامتىلاتىن بولادى.
بۇدان بولەك 16 كۋرورتتى-ساناتوريالىق ۇيىم انىقتالىپ, وندا سۋ تاسقىنىنان زارداپ شەككەندەر تەگىن قابىلدانادى. تۇتاستاي العاندا, بۇل نىساندار ءبىر ۋاقىتتا 190 ادامدى قابىلداي الادى, وڭالتۋ كۋرسى 10-نان 14 كۇنگە دەيىن سوزىلادى, بۇل مۇمكىندىگىنشە زارداپ شەككەندەردى ەمدەۋ-وڭالتۋ شارالارىمەن قامتۋعا مۇمكىندىك بەرەدى.
الماتىدا كوممۋنالدىق قىزمەت اقىسى قىمباتتايدى
الماتىدا قوقىس شىعارۋ ءتاريفى 30%-عا وسەدى. بۇل تۋرالى الماتىدا وتكەن قالالىق ءماسليحاتتىڭ كەزەكتەن تىس XVI سەسسياسىندا بەلگىلى بولدى. الماتى قالاسىنىڭ ەكولوگيا جانە قورشاعان ورتا باسقارما باسشىسىنىڭ ۋاقىتشا مىندەتىن اتقارۋشى ميراس گايسين بايانداما جاسادى.
الماتى قالاسى اكىمدىگىنىڭ تاراپىنان تۇرمىستىق قاتتى قالدىقتاردى جيناۋ جانە شىعارۋ ءۇشىن قاجەتتى ينفراقۇرىلىمدا دامىتۋ جۇمىستارى جالعاسىپ جاتىر. 2024-2025 جىلدارى سوماسى 10,4 ملرد تەڭگە بولاتىن 2905 كونتەينەردى اۋىستىرۋ جوسپارلانعان. ءبىزدىڭ ەسەپتەۋىمىز بويىنشا تۇرمىستىق قاتتى قالدىقتاردى جيناۋعا, تاسىمالداۋعا, سۇرىپتاۋعا قاجەتتى جىلدىق تاريف – 3303,9 تەڭگەنى, ال ءبىر ادامعا ايىنا – 718,5 تەڭگەنى قۇرادى. جاڭا وزگەرىس قابىلدانعان جاعدايدا ادام باسىنا تولەنەتىن بۇرىنعى تاريفتەن ايىرماشىلىعى 165 تەڭگەنى قۇرايدى. ياعني, 30%-عا كوبەيەدى , – دەدى ول.
ەندى الماتىلىقتار 1 مامىردان باستاپ جاڭا تاريف بويىنشا تولەم جاسايدى.
استانا اۋەجايىنىڭ جۇمىس ۋاقىتى وزگەرەدى
1 مامىردان باستاپ استانا اۋەجايى تۇندە جۇمىس ىستەمەيدى.
2024 جىلعى 1 مامىردان باستاپ جوندەۋ اياقتالعانعا دەيىن, جەرگىلىكتى ۋاقىت بويىنشا ساعات 22:00-دەن 06:00-گە دەيىن ەلوردا اۋەجايىنىڭ اۋەايلاعىندا ۇشاقتاردى قابىلداۋ جانە ۇشۋ توقتاتىلادى, – دەپ حابارلادى استانا حالىقارالىق اۋەجايى ءباسپاسوز قىزمەتى.
وسىعان بايلانىستى استانادان/استاناعا ورىندالاتىن اۋەكومپانيالاردىڭ رەيس كەستەسىنە وزگەرىستەر ەنگىزىلەدى.
شايبالى حوككەيدەن ەل قۇراماسى ەكى ماتچ وتكىزەدى
حوككەيدەن قازاقستاننىڭ ەرلەر قۇراماسى 2024 جىلعى الەم چەمپيوناتى قارساڭىندا حالىقارالىق تۋرنيرگە قاتىسادى.
2-4 مامىر ارالىعىندا استانادا Qazaqstan Hockey Open – 2024 حالىقارالىق ءتۋرنيرى وتەدى. اتالعان سىنعا قازاقستان, رەسەي جانە بەلورۋسسيا قۇرامالارى قاتىسپاق.
بۇل جارىس قۇرامانىڭ الەم چەمپيوناتىنا دايىندىعى اياسىندا وتپەك.
ماتچتار كەستەسى
2-مامىر 2024, 19:30 – قازاقستان – رەسەي
3-مامىر 2024, 19:30 – قازاقستان – بەلارۋس
4-مامىر 2024, 16:00 – رەسەي – بەلارۋس
بيىلعى وقۋ جىلى اياقتالادى
قازاقستاندىق مەكتەپتەردەگى ءتورتىنشى توقسان 1 ساۋىردەن 25 مامىرعا دەيىن جالعاسادى. وقۋ-اعارتۋ مينيسترلىگىنىڭ مالىمدەۋىنشە, ءتورتىنشى توقساننىڭ ۇزاقتىعى 8 وقۋ اپتاسىن قۇرايدى. سونداي-اق, 25 مامىردا قورىتىندىلار شىعارىلىپ, وقۋ جىلى اياقتالادى.
قازاقستاندىقتار چەحياعا تىكەلەي ۇشا الادى
بيىل 22 مامىردان باستاپ SCAT اۋە كومپانياسى «استانا – پراگا» باعىتى بويىنشا قازاقستان مەن چەحيا استانالارى اراسىندا اۋە قاتىناسىن قالپىنا كەلتىرەدى. رەيستەر اپتاسىنا ەكى رەت (سارسەنبى جانە سەنبى كۇندەرى) سىيىمدىلىعى 186-189 ورىندىق Boeing 737 ۇشاقتارىندا ورىندالادى. اۋە قاتىناسىن قايتا اشۋ ەكى ەل اراسىنداعى ساۋدا-ەكونوميكالىق, ىسكەرلىك جانە تۋريستىك ىنتىماقتاستىقتى ودان ءارى دامىتۋعا ىقپال ەتەدى دەپ كوزدەلىپ وتىر.
