سۇيىكتى پايعامبارىمىز (س.ع.س.) ون ەكى ايدىڭ سۇلتانى, قاسيەتتى رامازان ايىنىڭ قادىر-قاسيەتىن جانە وسى ايدا ورازا ۇستاۋدىڭ ابزالدىعىن كوپتەگەن حاديسىندە جان-جاقتى تۇسىندىرەدى. ءبىز ولاردىڭ كەيبىرىن عانا كەلتىرگەندى ءجون سانادىق.
پايعامبارىمىز (س.ع.س.) رامازان ايى تۋرالى:
«بۇل ايدا اسپاننىڭ ەسىكتەرى اشىلادى, توزاقتىڭ ەسىكتەرى جابىلادى, ءاربىر قارسى شىعۋشى شايتان كىسەندەلەدى. شاقىرۋشى ءار ءتۇنى: «ۋا, جاقسىلىقتى قالاۋشى! كانەكەي! ەي, جاماندىقتى قالاۋشى! تىيىل!» دەپ جار سالادى» دەگەن.
ساحابا ءابۋ ساعيد (ر.ا.) اللا ەلشىسىنىڭ (س.ع.س.): «كىمدە-كىم رامازاندا ورازا تۇتسا, شەكتەۋلەرىن بىلسە, ساقتانۋ كەرەك نارسەلەردەن ساقتانسا, وتكەن كۇنالارىن كەشىرەدى» دەپ ايتقانىن ەستىگەنىن ريۋايات ەتىپ جەتكىزگەن.
اللا ەلشىسى (س.ع.س.): «(تۇتقان) ورازا جانە قاسيەتتى قۇران وقىعان يەسىنە قيامەت كۇنى شاپاعات جاسايدى. ورازا: «ۋا, راببىم! ونى تاماقتان جانە شاقۋاتتان كۇندىز مەن تىيدىم. مەنى وعان شاپاعاتشى ەتە گور» دەسە, قاسيەتتى قۇران: «ونى تۇندە ۇيقىدان مەن تىيدىم. مەنى وعان شاپاعاتشى ەتە گور» دەي كەلە, اللا ەلشىسى: «ول ەكەۋى شاپاعاتشى بولادى» دەپ ايتقانىن ابدۋللا يبن امر ريۋايات ەتىپ جەتكىزگەن.
ساحابا ءساھي (ر.ا.) پايعامبارىمىز (س.ع.س.): «راسىندا, ءجانناتتا «رايان» دەپ اتالاتىن ءبىر قاقپا (ەسىك) بار. ول ەسىكتەن جۇماققا تەك ورازا تۇتقاندار عانا كىرەدى. قيامەت كۇنى: «ورازا ۇستاعاندار قايدا؟» دەپ جار سالىنادى. سوندا ورازا ۇستاعاندار دەرەۋ تۇرىپ, سول قاقپادان كىرەدى. ولار كىرىپ بولعان سوڭ ول جابىلادى, ودان ولاردان باسقا ەشكىم كىرمەيدى» دەگەنىن ريۋايات ەتكەن.
ءبىر سوزبەن ايتقاندا, ءبىز وسى رامازان ايىن رۋحاني تۇرعىدان ەرەكشە وزگەرتەتىن, ۇستامدىلىق, مەيىرىم مەن قايىرىمدىلىق سياقتى جاقسى قاسيەتتەردىڭ ءوز بويىمىزدا بۇرىنعىدان دا ارتا تۇسۋىنە زور مۇمكىندىك بەرەتىن, سونداي-اق وسى ايدا ورازا ۇستاۋ ارقىلى ءوز ءناپسى قالاۋلارىمىزدى تىيىپ, جاماندىق اتاۋلىدان مەيلىنشە اۋلاق تۇرىپ, و دۇنيەلىك توزاق وتىنان قورعانۋعا, كۇنالارىمىزدىڭ كەشىرىلۋىنە مۇمكىندىك بەرەتىن ەڭ ماڭىزدى ءسات ەكەنىن بىلگەنىمىز ابزال. سوندىقتان رامازان ايىنىڭ قادىر-قاسيەتىنە ءارى وسى ايدا ورازا ۇستاۋعا نيەتتەنىپ, اۋىز بەكىتۋگە سەلقوس قارامايىق!
امانتاي تويشىبايۇلى
