ءيا, قۇربان ايت جاقىنداعان كەزدە قۇربان شالۋعا نيەت ەتكەن جانداردىڭ ءبارىن وسىنداي ساۋال الاڭداتاتىنى انىق. جىل سايىن قۇرباندىققا شالىناتىن مالدىڭ قۇنى ءوسىپ وتىراتىنىن دا جاقسى بىلەمىز. وسى ورايدا كوپشىلىكتىڭ كوكەيىندەگى ساۋالدى استانا قالاسىنداعى ازىرەت سۇلتان مەشىتىنىڭ نايب-يمامى جۇمانازار سادىرحانوۆقا قويدىق.
«استانا قالاسى بويىنشا بارلىق بازارلارداعى, قۇرباندىق شالاتىن جەرلەردەگى 1 قويدىڭ قۇنى – 75 000 تەڭگە. بۇل – مۇفتياتپەن, بازار باسشىلارىمەن جانە كاسىپكەرلەرمەن كەلىسىپ جاسالعان ورتاق باعا. ال ءىرى قارانىڭ ەلوردا بويىنشا ورتاشا باعاسى – 490 000 تەڭگە. قۇربان ايت كۇنى قالادا 70 مىڭ تەڭگەگە دە, 80 مىڭ تەڭگەگە دە قويلار ساتىلۋى مۇمكىن. ەڭ باستى شارتى – قۇرباندىققا شالىناتىن مالدىڭ جاسى 1 جاستان اسۋى كەرەك. ال ءىرى قاراعا كەلەتىن بولساق, ونى 7 ادام بىرىگىپ ساتىپ الىپ, قۇرباندىققا شالۋىنا بولادى. مالدىڭ جاسى 2-گە تولۋى نەمەسە 2 جاستان اسۋى شارت. بۇل جەردە «جەتەۋدىڭ ءبىرى بول!» دەپ اتالاتىن قۇربان شالۋ اكتسياسى وتەتىنىن ۇمىتپاڭىزدار. ادەتتە ءىرى قاراعا تۇيە يا بولماسا سيىر تاڭدالادى. تۇيە كوبىنەسە ىستىق وڭىرلەردە وسىرىلەتىندىكتەن, استانادا جوق بولعاندىقتان, قۇرباندىققا سيىر شالىنادى. سول سەبەپتەن 7 ادام 70 مىڭ تەڭگەدەن شىعارعاندا 490 مىڭ تەڭگە بولادى. باسقا وڭىرلەردە ءىرى قارانىڭ قۇنى ءارتۇرلى: 430 مىڭ, 450 مىڭ, 550 مىڭ جانە 350 مىڭ تەڭگەگە ساتىلادى» دەپ ءتۇسىندىرىپ بەردى ماسەلەنىڭ جاۋابىن ازىرەت سۇلتان مەشىتىنىڭ نايب-يمامى.
ول سونداي-اق قۇرباندىققا شالىناتىن مالدى تاڭداعان كەزدە ەڭ جاقسىسىنا توقتالۋ قاجەتتىگىن ايتادى. «ەڭ باستىسى, قۇربان مالىنىڭ دەنى ساۋ, سەمىز, قۇربان شالاتىن جەرگە ءوز اياعىمەن ءجۇرىپ كەلگەن مال بولۋى شارت. ءبىر قۇلاعى تولىق ءتۇسىپ قالعان, ءبىر كوزى اعىپ كەتكەن, اقساق-توقساق قويلار قۇرباندىققا جارامايدى. پايعامبارلارىمىز دا قۇربان شالعانىن بىلەمىز. مىسالى, يبراھيم پايعامباردىڭ, ادام اتانىڭ ەكى بالاسى ابىل مەن قابىلدىڭ دا قۇرباندىقتارى بولعان. ءوز پايعامبارىمىز مۇحاممەد مۇستافا س.ع.ۋ. دا كەزىندە ارنايى قۇربان شالعان. دەمەك ەڭ جاقسى مالدى تاڭداپ, شىنايى نيەتپەن قۇربان شالىڭىزدار. اللا تاعالا قۇرباندىقتارىڭىزدى قابىل ەتسىن!» دەيدى جۇمانازار سادىرحانوۆ.
