ەلوردا كۇنى قارساڭىندا نۇر-سۇلتان قالاسىنىڭ مەملەكەتتىك ارحيۆىندە «تاۋەلسىز قازاقستان استاناسىنىڭ تاريحى ارحيۆ قۇجاتتارىندا» اتتى قۇجاتتار جيناعىنىڭ تانىستىرىلىم-كورمەسى ءوتتى.
1997 جىلى باس قالامىز الماتىدان ارقا توسىنە قونىس اۋدارعان كەزدەگى ءاربىر تاريحي قۇجات وزىندىك ءمان-ماڭىزعا يە ەكەنى تۇسىنىكتى. مىنە, وسى اسا قۇندى دەرەكتەر قازاقستان رەسپۋبليكاسى ءارحيۆى مەن ۇلتتىق ءارحيۆتىڭ قورىنان الىنىپ, زەردەلەنىپ, زەرتتەلىپ, كوپشىلىككە ۇسىنىلىپ وتىر.
بۇل – ۇلكەن ەڭبەكتىڭ جەمىسى. باتىستىڭ كوز سۇيسىنتەر ساۋلەتى مەن شىعىستىڭ عاسىرلاردان جەتكەن عاجايىپ جاۋھارلارىن كەلبەتتەپ, شاھار تۇرعىزۋ كەيىنگى وسكەلەڭ ۇرپاققا قالدىرار ۇلكەن مۇرا بولسا كەرەك. وسىنداي يگى ءۇردىس ناتيجەسىندە ەلدىڭ گەوساياسي جانە ەكونوميكالىق ورتالىعى بولىپ قالىپتاسىپ, قارقىندى دامىپ كەلە جاتقان جاڭا قالانىڭ العاشقى كەزەڭى مەن كەيىنگى ءوسىپ-وركەندەۋ جىلدارىن باياندايتىن ارحيۆتىك قۇجاتتاردىڭ باسىلىمى زەردەلى دە زەيىندى بۇقارانىڭ كەڭ اۋديتورياسىن قىزىقتىرارى ءسوزسىز.
قۇجاتتار جيناعىنا رەسمي ماتەريالدار – قر پرەزيدەنتىنىڭ جارلىقتارى, وكىمدەرى, قاۋلىلارى, ۇكىمەت قاۋلىلارى, جوعارى جانە ورتالىق ورگانداردى كوشىرۋ جونىندەگى مەملەكەتتىك كوميسسيانىڭ قۇجاتتارى, قر پرەزيدەنتىنىڭ قاتىسۋىمەن قالانى سالۋ جانە دامىتۋ ماسەلەلەرى جونىندەگى كەڭەستەردىڭ حاتتامالارى, مەملەكەتتىك ورگانداردىڭ ولاردى ورىنداۋ جونىندەگى ماتەريالدارى, مينيسترلىكتەردىڭ, ۆەدومستۆولاردىڭ, ەلوردا اكىمدىگىنىڭ قارجى-ەكونوميكالىق, ينجەنەرلىك-تەحنيكالىق قامتاماسىز ەتۋ ماسەلەلەرى تۋرالى اقپاراتتارى ەنگىزىلدى.
قۇجاتتاردىڭ جەكە بولىگى قالانى كوگالداندىرۋ مەن مەگاپوليستىڭ جاسىل بەلدەۋىن قۇرۋ, سونداي-اق ەلوردانىڭ مادەني كەلبەتىن قالىپتاستىرۋ ماسەلەلەرىن قامتيدى. سونىمەن بىرگە جيناق قازاقستان رەسپۋبليكاسىنىڭ ورتالىق مەملەكەتتىك ءارحيۆىنىڭ, قر ۇلتتىق ءارحيۆىنىڭ, نۇر-سۇلتان قالاسى مەملەكەتتىك ءارحيۆى قورلارىنان الىنعان كينو-فوتو قۇجاتتارىمەن, دىبىس جازبالارىمەن تولىقتى.
تاعى ءبىر اتاپ وتەرلىگى, نۇر-سۇلتان قالاسىنىڭ مەملەكەتتىك ارحيۆىندە قۇجاتتار جيناعىنىڭ تانىستىرىلىمىنا وراي «ەلوردا ءارحيۆى: فوتوقۇجاتتارداعى قالا تاريحى» اتتى كورمە اشىلدى.
مۇراعات قۇجاتتارى نەگىزىندە ۇيىمداستىرىلعان كورمەدە قالانىڭ دامۋ تاريحىنىڭ نەگىزگى كەزەڭدەرى مەن ەل استاناسى رەتىندە جەتىلۋىن سيپاتتايتىن فوتوقۇجاتتار مەن تاريحي مالىمەت-دەرەكتەر مول جيناقتالعان. بۇل ءىس-شارانى وتكىزۋدەگى نەگىزگى ماقسات – 1832 جىلى اقمولا وكرۋگتىك بۇيرىعى شىققاننان باستاپ بۇگىنگە دەيىنگى ءجۇرىپ وتكەن تاريحي جولدى كوپشىلىككە كەڭىنەن تانىستىرۋ.
تاڭاتار تولەۋعاليەۆ
