قاليبەك قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ع.مۇسىرەپوۆتىڭ «بايان سۇلۋ – قوزى كورپەش» مۋزىكالىق دراماسىمەن بىشكەك قالاسىندا وتكەن «ارت-وردو – 2023» حالىقارالىق تەاتر فەستيۆالىنە قاتىسىپ, باس جۇلدەنى يەلەندى.
6 شەتەلدىك جانە 8 قىرعىز تەاترى ونەر جارىستىرعان بيىلعى فەستيۆال كسرو حالىق ءارتىسى, قىرعىز حالقىنىڭ كورنەكتى تەاتر جانە كينو اكتريساسى باكەن قىدىكەەۆانىڭ 100 جىلدىعىنا ارنالدى. استانا قالاسى «جاستار» تەاترىنىڭ كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى, اباي اتىنداعى مەملەكەتتىك سىيلىقتىڭ لاۋرەاتى نۇرقانات جاقىپباي باستاعان قازىلار القاسىنىڭ قۇرامىندا قىرعىزستان, وزبەكستان, ازەربايجان, رەسەي, تۇركيانىڭ ونەر قايراتكەرلەرى بولدى.
كورەرمەن قاللەكي تەاترىنىڭ سپەكتاكلىن زور ىقىلاسپەن قابىلدادى. اكتەرلەر تەاتردىڭ حالىق اسپاپتار وركەسترىنىڭ سۇيەمەلدەۋىمەن ونەر كورسەتتى. سپەكتاكلدىڭ قويۋشى رەجيسسەرى گۇلناز بالپەيىسوۆا كلاسسيكالىق قۇر بايانداۋدان باس تارتىپ, قوزى كورپەش پەن بايان سۇلۋدىڭ ماحاببات حيكاياسىن زاماناۋي تاسىلدە جەتكىزگەنى قازىلار القاسىنىڭ كوڭىلىنەن شىعىپ, استانالىق تەاترعا گران-پري بەرىلدى. سونىمەن قاتار ونەر ۇجىمى «تۇركسوي» حالىقارالىق ۇيىمىنىڭ ارنايى سىيلىعىمەن ماراپاتتالدى.
