جاپونيانىڭ سايتاما قالاسىندا ورتا سالماقتا IBF جانە IBO نۇسقالارى بويىنشا الەم چەمپيونى گەننادي گولوۆكين مەن WBA Super بەلبەۋىنىڭ يەگەرى ريوتو مۋراتا قولعاپ ءتۇيىستىرىپ, قازاقستاندىق بوكسشى جەڭىسكە جەتتى.
گولوۆكين-مۋراتانىڭ جەكپە-جەگى 12 راۋندقا ەسەپتەلگەن ەدى. الايدا قازاقستاندىق بوكسشى توعىزىنشى راۋندتا قارسىلاسىن تەحنيكالىق نوكاۋتقا جىبەرىپ, ءوزىنىڭ IBO جانە IBF تۇجىرىمىنداعى اتاقتارىن, سونىمەن قاتار مۋراتاعا تيەسىلى WBA سۋپەرچەمپيون بەلدىگىن قوسا جەڭىپ الدى.
گولوۆكين جەكپە-جەكتى ۇيىمداستىرۋشىلار مەن شوۋدى تاماشالاۋعا كەلگەن كورەرمەندەرگە العىسىن ءبىلدىردى. ول ريوتو مۋراتا تاماشا ءارى تاباندى سپورتشى ەكەنىن اتاپ ءوتىپ, جاپونيالىق قارسىلاسىنىڭ يىعىنا ءوزى كيىپ جۇرگەن قازاقتىڭ شاپانىن جاپتى.
«مەن بارلىق جانكۇيەرلەرىمە, اسىرەسە قازاقستاننان ارنايى ات ارىتىپ جەتكەن جانكۇيەرلەرىمە العىس ايتامىن. راقمەت سىزدەرگە, جىگىتتەر. العا قازاقستان!» دەپ اعىنان جارىلدى قازاقستاندىق بوكسشى ءوز جانكۇيەرلەرىنە ريزاشىلىعىن ءبىلدىرىپ.
جەكپە-جەك الدىندا گەننادي 40 جاسقا تولعان ەدى. اتاقتى سپورتشىنى مەرەيتويىمەن قازاقستان پرەزيدەنتى قاسىم-جومارت توقاەۆ قۇتتىقتاپ, جەڭىس تىلەگەن ەدى. گولوۆكين بولسا ءوزىنىڭ كاسىپقوي بوكستاعى 42-جەكپە-جەگىندە نوكاۋتپەن جەڭىسكە جەتىپ, ەلدىڭ دە, پرەزيدەنتتىڭ دە ءۇمىتىن اقتاپ شىقتى.
