نۇر-سۇلتان قالاسىنىڭ اكىمى التاي كولگىنوۆ تەحنيكانىڭ قىسقا دايىندىعىن تەكسەرىپ, «استانا تازالىق» جشس جۇمىسشىلارىن مەكەمەنىڭ 11 جىلدىعىمەن قۇتتىقتادى.
«استاناەنەرگوسەرۆيس» اق-ىن تاراتۋدان ۇنەمدەلگەن قارجى ەسەبىنەن 120 ارنايى تەحنيكا ساتىپ الىنادى. وسىنى اتاپ وتكەن قالا باسشىسى الداعى قىس مەزگىلى مەن جىلۋ ماۋسىمى كەزىندە جۇمىس اۋقىمى ۇلعاياتىنىن, وسى مەزگىلدە كوممۋنالدىق مەكەمەلەر اكىمدىك تاراپىنان قولداۋسىز قالمايتىنىن ايتتى. «كاسىپورىن قۇرىلعان ۋاقىتتان باستاپ وتە ماڭىزدى مىندەتتى اتقارىپ, ەلوردامىزدىڭ تازالىعىن قامتاماسىز ەتۋدە ۇلكەن ۇلەس قوسىپ كەلەدى. سىزدەر قىستىڭ ايازى مەن جازدىڭ ىستىعىنا, قار مەن جاڭبىرعا قاراماستان تاڭنىڭ اتىسىنان كەش باتقانعا دەيىن قالا جايلىلىعى ءۇشىن ەڭبەك ەتىپ جۇرسىزدەر. وسى ەڭبەكتەرىڭىز بەن وسىنداي جۇمىس قابىلەتتەرىڭىزگە قاراپ, كوپتەگەن قالا تۇرعىندارى, اسىرەسە, بالالار ۇلگى الادى دەپ ويلايمىن» دەدى قالا اكىمى ءوز سوزىندە.
بۇعان قوسا, قالا جىلدان جىلعا ءوسىپ, تۇرعىنداردىڭ دا تالابى ارتىپ وتىرعانىن ايتىپ, اۆتوپاركتەر مۇمكىندىگىنشە جاڭارىپ وتىراتىنىن اتاپ ءوتتى. قالا باسشىسى جۇمىسشىلارعا اتقارىپ جۇرگەن قيىن دا كۇردەلى جۇمىستارى ءۇشىن العىس ايتىپ, دەنساۋلىق, وتباسىلىق اماندىق-ساۋلىق تىلەدى.
