كۇن رايى قالاي قۇبىلسا دا, ساعى سىنبايتىن قالانىڭ بەلسەندى تۇرعىندارى جاز بويى جۇگىرىپ شىنىقسا, قىستا شاڭعى تەۋىپ بوي قىزدىرادى. بۇقارانى بىرلىككە شاقىرعان سپورت شارالارىنىڭ ءبىر ماۋسىمى سەنبى كۇنى ءداستۇرلى «قىس ورنەگى» فەستيۆالىمەن اجارلانا ءتۇستى.
بۇل جولعى سپورت مەرەكەسى ترياتلون پاركىندە سالتانات قۇردى. قيمىلى شيراق استانالىقتار تاڭەرتەڭنەن ەرتە تۇرىپ, وسى اراعا جينالدى. جىلداعى ورنى وزگەرگەندىكتەن بە, بيىل «قىس ورنەگىنە» كەلگەندەردىڭ قاتارى بىلتىرعىدان ەداۋىر از بولدى. بيىل ونداعان سپورت ءتۇرى بويىنشا جارىسقا قاتىسۋعا بارلىعى 2 مىڭ ادام نيەت بىلدىرسە, وتكەن جىلى بۇل كورسەتكىش 3 مىڭنان اسىپ جىعىلعان.
ون سەگىزىنشى رەت ۇيىمداستىرىلعان شاڭعى فەستيۆالىن تاماشالاۋعا ارنايى كەلگەن استانا اكىمىنىڭ ورىنباسارى ەرمەك امانشاەۆ جينالعان كوپشىلىكتى سپورت مەرەكەسىمەن قۇتتىقتاپ, ساتتىلىك تىلەدى. ول مۇنداي شارالاردىڭ سالاۋاتتى ءومىر سالتىن قالىپتاستىرۋدا ماڭىزى زور ەكەنىن اتاپ ءوتتى.
وسى جەردى اتاقونىسى كورەتىن تۇرعىندار جارىستىڭ ون سەگىزىنشى دەپ ناقتىلانعانىمەن, بۇنىڭ داستۇرگە اينالعانىنا ەلۋ جىلداي بولدى دەيدى. دەگەنمەن استانا استانا بولعالى, اتالمىش شارانىڭ مارتەبەسى كوتەرىلىپ قالعانىن جاسىرمادى.
«قىس ورنەگىندە» ءتۇرلى جارىستارعا لايىقتالعان الاڭدار قۇرىلدى. شاقىرىمدى شاقتايتىن شاڭعى جولدارىنا قوسا, حوككەي مەن شاعىن فۋتبولعا, موتوكروسسقا جانە ارقان تارتىپ, كىر تاسىن تاسىن كوتەرىپ, بەلدەسىپ, قول كۇرەستىرىپ كۇش سىناۋشىلارعا ارنايى جاعداي جاسالدى.
مەرەكەنى كورىكتى ەتكەن كوپشىلىكتىڭ ىشىندە كاسىبي جانە اۋەسقوي سپورتشىلار, وقۋشىلار, ستۋدەنتتەر, مۇعالىمدەر, اسكەريلەر جانە ءتۇرلى مەكەمەلەردىڭ قىزمەتكەرلەرى بار. ولاردىڭ ەڭ كوبى شاڭعى جارىسىندا باق سىنادى. دالىرەك ايتساق, شاڭعى جارىسىنا – 1500, كىر تاسىن كوتەرۋ مەن قول كۇرەسىنە – 45, شايبالى حوككەيگە – 60, شاعىن فۋتبولعا – 50, موتوكروسسقا – 30, ارقان تارتۋعا – 200, بەلبەۋ كۇرەسىنە 30 ادام قاتىستى.
سونىمەن, شاڭعى جارىسىندا جۇزدەن جۇيرىك شىققانداردىڭ قاراسى كوپ بولدى. الدىمەن, 1 شاقىرىمعا سوزىلعان سيمۆولدىق جارىستا بارىنەن بۇرىن دەپۋتات اباي تاسبولاتوۆ كەلدى. كۇشتىك قۇرىلىمدار جىگىتتەرىنىڭ ىشىنەن رۋسلان قوجاەۆ شاڭعى تەبۋدە الدىنا جان سالمادى. قىزداردىڭ اراسىندا نۇرساۋلە داۋلەتقاليەۆا ءبىرىنشى بولدى.
كەزەك بالالار مەن جاسوسپىرىمدەرگە كەلگەندە, ولاردىڭ اراسىنان ءتۇرلى جاس ەرەكشەلىكتەرىنە قاراي بەرىك بورانباەۆ, ۆسەۆولود گەراميشەنكو, دميتري اداموۆيچ, نيكيتا افاناسەۆ, ءامىر ابدۋاحيتوۆ, يۆان افاناسەۆ ەسىمدى ۇلدار بارىنەن ۇزدىك شىقتى. ال قىزداردان ەلميرا مولداشەۆا, انگەلينا سولوۆەۆا, ماريا گەراششەنكو, ەكاتەرينا موسكالەنكو ەسىمدى ارۋلار التىننان القا تاقتى.
سونىمەن قاتار, ارداگەرلەردىڭ ىشىنەن اندرەي گەراسيمەنكو (40-49 جاس), رومان كازەميرچيك (50-59 جاس), ۆاسيلي كۋشين (60-69 جاس) جەڭىمپاز بولدى. 50 جاسقا دەيىنگى ايەلدەردىڭ ىشىنەن ولگا سەلەزنەۆا مارە سىزىعىن ءبىرىنشى بولىپ كەستى.
بەلبەۋ كۇرەسىنەن ەرنار قوزى (75 كگ) مەن جالعاس شىنكەەۆ (+75 كگ) چەمپيون اتاندى. 16 كەلى تارتاتىن كىر تاسىن سەرىك ابداحين مەن 24 كەلىلىكتى ماعجان احمەتوۆ ەڭ كوپ كوتەردى.
سونداي-اق, ارقان تارتۋ, قول كۇرەس, شاعىن فۋتبول, شايبالى حوككەي, موتوكروسس سەكىلدى سپورت تۇرلەرىنەن جەڭىمپازدار انىقتالدى.
ورىنبەك وتەمۇرات
