كەشە استانادا قىتاي كينوسىنىڭ فەستيۆالى باستالدى.
ايتۋلى فەستيۆال الداعى سەنبى كۇنى جۇمىسىن باستايتىن ەكسپو اياسىنداعى ەلەۋلى شارالاردىڭ ءبىرى بولىپ وتىر. قازاقستان مەن قىتاي اراسىنداعى مادەني بايلانىستى نىعايتۋدى كوزدەگەن فەستيۆالدىڭ اشىلۋ سالتاناتىندا قر اقپارات جانە كوممۋنيكاتسيالار ءمينيسترى داۋرەن اباەۆ ءسوز سويلەپ, كورەرمەن قاۋىمدى ەكى ەلدىڭ ىنتىماعىنا دانەكەر بولاتىن ونەر مەرەكەسىنىڭ اشىلۋىمەن قۇتتىقتادى.
فەستيۆالدىڭ قۇرمەتتى قوناعى بولىپ كەلگەن اسپان استى ەلىنىڭ اتاقتى اكتەرى دجەكي چان «قازمەديا» كينوزالىنا كىرىپ كەلگەندە قالىڭ كورەرمەن ورىندارىنان تۇرىپ قۇرمەت ءبىلدىردى. تالانتىمەن الەمدى تامساندىرعان, «وسكار» سىيلىعىنىڭ يەگەرى ءوز كەزەگىندە كورەرمەنگە ىستىق ءىلتيپاتىن ءبىلدىردى.
قىتاي كينوسى فەستيۆالىنىڭ اشىلۋ سالتاناتىنا كەلگەن كورەرمەن الدىندا دجەكي چان مەن قازاق ونەرىنىڭ جۇلدىزدارى ديماش قۇدايبەرگەن, مايرا مۇحامەدقىزى, نۇرعالي ءنۇسىپجانوۆ ءان شىرقادى. كونتسەرتتەن كەيىن باستى ءرولدى دجەكي چان سومداعان «كۋنگ-فۋ يوگا» ءفيلمى كورسەتىلدى.
سونداي-اق كينوفەستيۆال اياسىندا ەلوردالىقتار مەن قالا قوناقتارى «ىلە وزەنى», «قاتەرلى ىسىك مىرزا, كەتىڭىز», «گۇلىم», «شىنايى ماحاببات», «قاسقىر توتەمى» اتتى فيلمدەردى تاماشالايتىن بولادى.
عالىم قوجابەكوۆ
