استانا قالاسىنىڭ تۇرعىن ءۇي قورىن جاڭارتۋ مەن جاڭعىرتۋدىڭ 2028 جىلعا دەيىنگى باعدارلاماسى اياسىندا بايقوڭىر اۋدانىندا ەسكى, اپاتتى جاعدايداعى 62 تۇرعىن ءۇيدى ىسىرۋ جوسپارلانعان. جاقىندا اتالمىش اۋدان اكىمى تالعات راحمانبەردى وسى اۋدان اۋماعىندا كوپپاتەرلى تۇرعىن ءۇي قۇرىلىسى جۇمىسىن جۇرگىزەتىن قۇرىلىس كومپانيالارىنىڭ وكىلدەرىمەن كەزدەسىپ, بوسايتىن اۋماقتا سالىناتىن نىساندار ماسەلەلەرىن تالقىلادى.
«ەلوردا ينفراقۇرىلىمىن جاڭالاۋ كوپتەن بەرى كۇن تارتىبىنەن تۇسپەي كەلەدى. جاڭالاۋ, ياعني رەنوۆاتسيا – قالانىڭ قالىپتاسقان بولىگىن جۇيەلى تۇردە قايتا قۇرۋ ارقىلى ەلوردانىڭ كەلبەتىن جاڭا قالىپقا كەلتىرۋ. بۇگىندە رەنوۆاتسيا اياسىندا توزىعى جەتكەن ەسكى ۇيلەردى ىسىرۋ, ورنىنا جاڭا ينفراقۇرىلىم جايلاستىرۋ اسا وزەكتى. وسىنداي وزەكتى ماسەلەنىڭ باستى شەشىمى – ينۆەستيتسيا تارتۋ. ينۆەستيتسيا تارتۋ – پەرسپەكتيۆالى جوبالاردى ازىرلەۋگە جانە ىسكە اسىرۋعا, الەۋمەتتىك ماڭىزى بار نىساندار قۇرىلىسىندا اسا ماڭىزدى. بۇل ەڭ الدىمەن كرەاتيۆتى كلاستەرلەردى دامىتۋ, سونىڭ ىشىندە جاڭا تەحنولوگيالاردى قولدانا وتىرىپ, ينفراقۇرىلىم قۇرۋ قارقىنىن ارتتىرادى» دەدى تالعات راحمانبەردى.
جيىن بارىسىندا اۋدان اۋماعىندا كەشەندى جوسپارلاۋ جوباسى اياسىندا كوپقاباتتى تۇرعىن ءۇي كەشەندەرىن سالۋ جانە ينفراقۇرىلىم جۇيەسىن دامىتۋ ماسەلەلەرى ءسوز بولدى. قۇرىلىس كومپانيالارىنىڭ وكىلدەرىنە بايقوڭىر اۋدانىنىڭ كەشەندى جوسپارلاۋ جوباسى ۇسىنىلدى. اۋدان اكىمدىگى تاراپىنان اۋدانداعى كوپقاباتتى تۇرعىن ۇيلەردى كوبەيتۋ جۇمىسى ۇسىنىلدى.
