جاقىندا استانا قالالىق ءماسليحاتىندا دەپۋتاتتار قالانىڭ دەنساۋلىق ساقتاۋ سالاسىندا بىلىكتى كادرلاردىڭ جەتىسپەۋشىلىگى, ارنايى تەحنيكانىڭ تومەن جاعدايى جانە باسقا دا وزەكتى ماسەلەلەردى تالقىلادى
– بۇگىن ءبىز حالىققا كورسەتىلەتىن قىزمەتتەردىڭ ساپاسى مەن جەدەل مەديتسينالىق جاردەم ستانتسيالارىنىڭ پروبلەمالىق ماسەلەلەرى تاقىرىبىنا قايتا ورالدىق. ەلوردادا جەدەل مەديتسينالىق كومەك كورسەتۋ بويىنشا 11 پۋنكت بار, ولاردىڭ كادرلارمەن قامتىلۋى 90 پايىزدى قۇرايدى. بىراق مامانداردى, اسىرەسە جۇرگىزۋشىلەردى ىرىكتەۋگە قاتىستى شاعىم كوپ ءتۇسىپ وتىر. جەدەل جاردەم جۇرگىزۋشىلەرىنىڭ قاتىسۋىمەن جول-كولىك وقيعالارىنىڭ وسكەنى بايقالۋدا. ولاردى جۇرگىزۋشى رەتىندە قىزمەتكە الاردا ىرىكتەۋ اشىق تۇردە وتكىزىلمەيدى, سونىمەن بىرگە كولىككە بەكىتىلگەن جۇرگىزۋشىلەر كولىكتىڭ تەحنيكالىق جاي-كۇيىن باقىلامايدى, اۋىسىمدى باسقا جۇرگىزۋشىگە تاپسىرعان كەزدە كولىكتى ءتيىستى دەڭگەيدە قابىلداپ المايدى, – دەدى وتىرىستا قالالىق ءماسليحات توراعاسى ەرلان كاناليموۆ.
سوندىقتان ول جەدەل تارتىپتە اۆتوكولىكتەردىڭ تەحنيكالىق جاي-كۇيىن, جۇرگىزۋشىلەردىڭ جۇمىسىن باقىلاۋ ادىستەمەسىن پىسىقتاۋ, كادرلىق ىرىكتەۋگە, ساپالى ارنايى كولىك ساتىپ الۋعا نازار اۋدارۋ كەرەگىن ايتىپ, سول جۇمىستاردى ءتيىستى تۇلعالار مەن مەكەمەلەرگە تاپسىردى. بۇدان باسقا, ول الداعى 3 جىلعا ارنالعان دەنساۋلىق ساقتاۋ سالاسىن دامىتۋدىڭ كەشەندى جوسپارىندا كوزدەلگەن الماتى, بايقوڭىر جانە نۇرا اۋداندارىندا جەدەل جاردەمنىڭ 3 قوسالقى ستانتسياسىن سالۋ ءۇشىن جەر ۋچاسكەلەرىن ىزدەۋدى جەدەلدەتۋ قاجەتتىگىن اتاپ ءوتتى.
