جاقىندا وتكەن «ەكسپو-2017» حالىقارالىق مامانداندىرىلعان كورمەسىنە دايىندىق جونىندەگى ارنايى كەڭەستە ەلباسىنىڭ قاتاڭ ەسكەرتۋىنەن كەيىن ءتيىستى ورگاندار استانا قالاسىنداعى «رەزەڭكە پاتەرلەردى» انىقتاپ, ناقتى شارالار قولدانا باستادى. وسى ماسەلەنى ءبىزدىڭ گازەتىمىز ۇستىمىزدەگى جىلعى 25 ءساۋىر كۇنگى نومىرىندە قوزعاعان بولاتىن.
جۇيەلى جۇرگىزىلگەن رەيدتەردىڭ ناتيجەسىندە زاڭسىزدىققا جول بەرگەن 200-دەن اسا پاتەر يەسى اكىمشىلىك جاۋاپكەرشىلىككە تارتىلىپ, تىركەۋسىز جۇرگەن 100000-نان اسا ازامات ەسەپكە الىنعان ەدى.
بۇل جۇمىس ودان ءارى قارقىندى جالعاسۋدا. وتكەن اپتادا استانا قالاسىنىڭ پروكۋراتۋراسى قالا اكىمدىگىمەن جانە قۇقىق قورعاۋ ورگانى قىزمەتكەرلەرىمەن بىرلەسە وتىرىپ, تۇرعىن ۇيلەر مەن ۋاقىتشا باسپانالاردى ارالاعان ەدى. ناتيجەسىندە 30-دان 2500-گە دەيىن ادام زاڭسىز تىركەلگەن ونداعان پاتەر مەن جەكەمەنشىك ءۇي انىقتالدى. الايدا وسىنشاما ادام تىركەلگەنىمەن, ول ۇيلەردە بىردە-ءبىرى تۇرمايتىن بولىپ شىقتى.
«بۇگىنگى تاڭدا جەرگىلىكتى پوليتسيا قىزمەتى وسىنداي قۇقىق بۇزۋشىلىققا جول بەرگەن 88 پاتەر يەسىن اكىمشىلىك جاۋاپكەرشىلىككە تارتتى. ال زاڭسىز تىركەلگەن 4000-نان اسا ادام تىركەۋدەن شىعارىلدى. ءبىر ايتا كەتەرلىگى, ولاردىڭ اراسىندا شەتەلدىك ازاماتتار دا بار. الداعى ۋاقىتتا مۇنداي ءتارتىپ بۇزعان ازاماتتارعا مەملەكەتتىك قىزمەت كورسەتۋ ءتۇرى شەكتەلەدى. اتاپ ايتقاندا, ولار ەندى مەملەكەتتىك تۇرعىن ءۇي قورىنان پاتەر الا المايدى.
سونداي-اق, «رەزەڭكە پاتەرلەردە» تىركەلگەن ادام سانىنا بايلانىستى كوممۋنالدىق قىزمەت (جارىق, گاز, سۋمەن جابدىقتاۋ, قوقىس شىعارۋ) كورسەتۋ باعالارى قايتا ەسەپتەلەتىن بولادى» دەدى قالالىق پروكۋراتۋرانىڭ ءباسپاسوز قىزمەتى.
قازىر قالادا كريمينوگەندىك جاعدايدى ساۋىقتىرۋ ماقساتىندا ءجۇرىپ جاتقان «قۇقىقتىق ءتارتىپ» شۇعىل-الدىن الۋ ءىس-شاراسىنىڭ العاشقى ون كۇنىندە ءتۇرلى باپ بويىنشا 10000-نان اسا ادام اكىمشىلىك جاۋاپكەرشىلىككە تارتىلسا, بەلگىلى تۇراعى جوق 336 ادام ۋاقىتشا بەيىمدەۋ ورتالىعىنا ورنالاستىرىلعان.
كوشى-قون ەرەجەسىن بۇزعان 1320 ادامعا ايىپپۇل سالىنسا, 73 شەتەلدىك ەلدەن شىعارىلدى.
تاڭاتار تولەۋعاليەۆ
