قازاق ەلىنىڭ ەڭ باعالى بايلىعى – بىرلىگى مەن تۇراقتىلىعى. ال رەسپۋبليكا جۇرتشىلىعى اراسىنداعى رۋحاني كەلىسىم بىرلىك پەن تۇراقتىلىقتىڭ تۇتقاسىنا اينالىپ وتىر. كەشە بەيبىتشىلىك جانە كەلىسىم سارايىندا وتكەن حالىقارالىق كونفەرەنتسيادا قازاق ەلىنىڭ بەرەكە-بىرلىگى ايشىقتالدى.
كەشە استانادا 18 قازان – رۋحاني كەلىسىم كۇنى جانە 25 قازان – رەسپۋبليكا كۇنىنە وراي «رۋحاني كەلىسىم – قازىرگى قوعامداعى بەيبىتشىلىك پەن بىرلىكتىڭ نەگىزى» تاقىرىبىندا حالىقارالىق كونفەرەنتسيا ءوتتى.
استانا قالاسىنىڭ اكىمدىگى, «ن.نازارباەۆتىڭ كونفەسسياارالىق جانە وركەنيەتارالىق ديالوگتى دامىتۋ ورتالىعى» كە اق, سونداي-اق, استانا قالاسىنىڭ دىندەردى زەرتتەۋ ورتالىعى ۇيىمداستىرعان بۇل شاراعا استانا قالاسى ءماسليحاتىنىڭ توراعاسى ەرلان كاناليموۆ, استانا قالاسى اكىمىنىڭ ورىنباسارى ەسەت بايكەن, رۋحاني كەلىسىم كۇنى يدەياسىنىڭ اۆتورى, قر ەڭبەك سىڭىرگەن قايراتكەرى تولەگەن مۇحامەدجانوۆ جانە ءدىني بىرلەستىكتەردىڭ باسشىلارى, سونداي-اق, اقش, ليۆان, ءۇندىستان, شۆەيتساريا, گەرمانيا, رەسەي جانە قىرعىزستان ەلدەرىنەن كەلگەن قوناقتار قاتىستى.
– قازاقستاندا ءدىني سەنىم بوستاندىعىنا كەپىلدىك بەرىلگەن. بۇل تۋرالى اتا زاڭىمىزدا, سونداي-اق, ءدىني قىزمەت جانە بىرلەستىك تۋرالى زاڭنامادا ناقتى ايقىندالعان. ەلىمىزدە ءتۇرلى ۇلت پەن ءدىن وكىلدەرىنىڭ قۇقىعى تەڭ قارالىپ, رۋحاني تۇرعىدان قاتار دامۋىنا مۇمكىندىك بەرىلدى. سونىڭ نەگىزىندە ەلىمىزدە 18 كونفەسسيانىڭ دوكتريناسى قالىپتاسىپ, قوعامدا ورنىقتى. قازاق حالقىنىڭ سالت-ءداستۇرى مەن ادەت-عۇرپى دىنمەن ۇشتاسقان. ساليقالى ءومىر ءسۇرۋ, ۇرپاقتى دۇرىس تاربيەلەۋ, كەلەر ۇرپاققا ۇلگى-ونەگە كورسەتۋ ءدىن مەن ءداستۇرىمىزدىڭ ءوزارا ساباقتاسقان ەرەكشەلىگى دەپ ايتۋعا بولادى. رۋحاني كەلىسىم, ۇلتتار مەن ءداستۇرلى دىندەر اراسىنداعى بىرلىك – ءبىزدىڭ باعا جەتپەس بايلىعىمىز, تۇراقتىلىق تۇعىرىمىز. ەلدىڭ الەۋمەتتىك-ەكونوميكالىق كورسەتكىشى حالىقتاردىڭ تاتۋلىعىن تۇعىر ەتىپ, دامي تۇسەدى. وزگەرىسكە تولى ءارى بەلگىسىزدىك بەلەڭ العان قازىرگى تاڭدا بۇگىنگى باسقوسۋدىڭ ءمان-ماڭىزى ايرىقشا, – دەدى ەرلان كاناليموۆ.
«تاتۋلىق, بەرەكە, بىرلىك ۇيىعان ەلگە باق قونادى» دەپ ءسوز باستاعان قالا اكىمىنىڭ ورىنباسارى ەسەت بايكەن قازاق قاشاندا بىرلىكتى تۋ ەتكەن حالىق ەكەنىن ايرىقشا اتاپ ءوتتى.
«مايقى ءبيدىڭ «التاۋ الا بولسا, اۋىزداعى كەتەدى. تورتەۋ تۇگەل بولسا, توبەدەگى كەلەدى» دەگەن ناقىل ءسوزى قانشا عاسىر وتسە دە ءوز قۇنىن جويعان جوق. حالقىمىز ءۇشىن بەرەكە-بىرلىكتىڭ ماڭىزى قاشاندا زور. سول سەبەپتى ەلىمىزدە 130-دان استام ۇلت پەن ۇلىستىڭ بەيبىتشىلىكتە قاتار ءومىر ءسۇرۋى مەن دىنارالىق كەلىسىمنىڭ ادەمى كورىنىسىن بۇكىل الەمگە تانىتىپ كەلەمىز. مەملەكەت باسشىسى قاسىم-جومارت توقاەۆ «حالقىمىزدىڭ ىنتىماق, بىرلىگى بۇل تاعدىردىڭ بەرە سالعان سىيى ەمەس, بۇل, ەڭ الدىمەن, جۇرتىمىزدىڭ كۇندەلىكتى تاباندى ەڭبەگىنىڭ ارقاسى ەكەنىن دۇرىس ءتۇسىنۋىمىز كەرەك. سوندىقتان ءبىز بىرلىگىمىزدى كۇن سايىن نىعايتىپ وتىرۋىمىز قاجەت, ياعني تاتۋلىق پەن كەلىسىم حالقىمىزدىڭ ءومىر سالتىنا اينالۋى ءتيىس» دەپ ايتقان بولاتىن. دەمەك, ءبىز ءۇشىن تاتۋلىقتان وتكەن بەرىك تۇعىر جوق» دەدى اكىم ورىنباسارى.
ەسكە سالا كەتەيىك, 1992 جىلى 18 قازاندا الماتىدا ءبىرىنشى دۇنيەجۇزىلىك رۋحاني كەلىسىم كونگرەسى ءوتتى. ادامزات تاريحىندا تۇڭعىش رەت بارلىق دىندەردىڭ, بىتىمگەرشىلىك قوزعالىستار مەن قوعامدىق ۇيىمداردىڭ وكىلدەرى, رۋحانيات پەن ادام ءومىرىنىڭ ماسەلەلەرىنە الاڭدايتىن بەلگىلى عالىمدار مەن مادەنيەت قايراتكەرلەرى ءبىر ۇستەل باسىنا جينالدى. وسى جينالىسقا قاتىسۋشىلار 18 قازاندى رۋحاني كەلىسىم كۇنى – قاقتىعىستار مەن قاقتىعىستارعا موراتوري كۇنى, ادامدار اراسىندا ءوزارا تۇسىنىستىك ورناتۋ كۇنى, مەيىرىمدىلىك پەن كورشىسىنە كومەك كۇنى دەپ جاريالادى. سودان بەرى قازاقستاندا جىل سايىن 18 قازان – رۋحاني كەلىسىم كۇنى, الەۋمەتتىك ماڭىزى بار كۇن. ال كونفەرەنتسيا سوڭى سالتاناتتى كونتسەرتكە ۇلاستى.
