استانادا وتكەن بيللي دجين كينگ كۋبوگىنىڭ ىرىكتەۋ كەزەڭىندە قازاقستاننىڭ ايەلدەر قۇراماسى پولشا تەننيسشىلەرىن ۇتىپ, الەم چەمپيوناتىنا جولداما الدى.
ءبىرىنشى ويىندا يۋليا پۋتينتسەۆا الەمنىڭ 19-راكەتكاسى ماگدا لينەتتى ەكى سەتتە ۇتىپ ەسەپ اشسا, ەكىنشى ويىندا ەلەنا رىباكينا ۆەرونيكا فالكوۆسكانى 6:3 جانە 6:4 ەسەبىمەن تىزە بۇكتىردى.
ەكىنشى كۇنى ەلىمىزدىڭ ءبىرىنشى, الەمنىڭ 7-راكەتكاسى ەلەنا رىباكينا ىرىكتەۋ كەزەڭىندەگى ەكىنشى قارسىلاسى لينەتتى 2:0 ەسەبىمەن ۇتىپ, جالپى ەسەپتى 3:0-گە جەتكىزىپ, قازاقستان قۇراماسىن الەم چەمپيوناتىنىڭ فينالىنا الدان الا شىعارىپ قويدى. سوڭعى جۇپتىق ويىندا اننا دانيلينا مەن يۋليا پۋتينتسەۆا قارسىلاستارىنا جول بەرگەنمەن, بۇل ويىنننىڭ ناتيجەسى جالپى كورسەتكىشكە اسەر ەتپەدى.
فينالدىق كەزەڭدە قازاقستان قۇراماسى شۆەيتساريا نەمەسە اۆستراليا قىزدارىمەن وينايتىن بولادى.
