قىس ايلارىندا كۇن سۋىتقان كەزىندە 1-4 سىنىپ وقۋشىلارى ءۇشىن اۋا تەمپەراتۋراسى – 25 گرادۋس جانە ودان دا تومەن بولعاندا ساباق توقتاتىلادى. -30 گرادۋس جانە ودان تومەن بولسا 1-9 سىنىپتاردا, – 35 گرادۋس جانە ودان دا تومەن بولسا 1-11 (12) سىنىپتاردا, كاسىپتىك ليتسەيلەردە, كوللەدجدەردە (1-2 كۋرس ستۋدەنتتەرى ءۇشىن) ساباق توقتاتىلادى, مەكتەپ باعدارلاماسىنان قالىپ قويعان پاندەر قوسىمشا ساباق ارقىلى يگەرىلەتىن بولادى, دەپ مالىمەت بەردى astana.kz سايتىنا استانا قالاسى ءبىلىم باسقارماسىنىڭ ءبولىم باسشىسى ءمادينا سۇلەيمەنوۆا.
ساباقتى توقتاتۋ حابارلاماسى تاڭەرتەڭگى 6.30-دان 7-گە دەيىنگى ۋاقىتتا جانە تۇسكى 12.15-تەن 12.45-كە دەيىنگى ارالىقتا «31 كانال», «ستۆ» ارنالارىندا جۇگىرتپە جولدار ارقىلى بەرىلەدى. ال, «ەۆرازيا», «قازاقستان», «حابار» ارنالارى ارقىلى داۋىستىق حابارلامامەن جەتكىزىلەدى.
سونىمەن قاتار ساباقتىڭ توقتاتىلعانى تۋرالى اقپاراتتى 118-01, 169, 109 تەلەفون نومىرلەرى ارقىلى جانە استانا قالاسىنىڭ رەسمي سايتى www.astana.gov.kz ارقىلى دا الۋعا بولادى.
